1 Corintius

15 Wawqikuna y panikuna, kananqa qamkunata willayanqaq* alli noticiakunatam yarpätsiyaq.*+ Tsëkunatam qamkunaqa shumaq chaskikuyarqëki, y kananyaqpis väleqpaq churëkäyanki. 2 Tsë willayanqaq alli noticiakunata väleqpaq churarqa salvakuyankim. Sinöqa envänullam creikoq tikrayarqunki.

3 Puntata willayanqaqkunachöqa noqapis chaskinqä kaqkunam këkarqan. Tsëqa karqan Diospa Palabranchö ninqannö jutsantsikkunarëkur* Cristu wanunqan,+ 4 y Teyta Diospa Palabranchö ninqannö,+ pampashqa kanqan+ y kima junaqta+ kawamunqan,+ 5 y Cëfasta*+ yuripunqan, tsëpita döci apostolkunata yuripunqanmi.+ 6 Tsëpitanam juk kutichö quinientus wawqikunapita y panikunapitapis masta yuripurqan.+ Pëkunapitaqa cäsi llapanmi noqantsikwanraq këkäyan, peru wakinqa wanukuyashqanam. 7 Tsëpitanam Santiäguta+ yuripurir llapan apostolkunata yuripurqan.+ 8 Ultimutanam manaraq killanchö yurishqatanö noqata yuripumarqan.+

9 Apostolkunachöqa mana kaqllam kä, y Diospa congregacionninchö kaqkunata imëkata rurar sufritsishqa karmi, apostolnö reqishqa kanäpaqnötsu kä.+ 10 Peru Teyta Dios noqawan alläpa alli kanqanrëkurmi kanan kanqäqa kä. Y pëkunapitapis mas trabajashqa kaptïmi noqawan alläpa alli kanqanqa envänutsu kashqa. Peru manam kikïpa kallpäwantsu tsëtaqa rurarqö, sinöqa Teyta Dios noqawan alläpa alli kashqa kaptinmi. 11 Tsëqa, noqa o pëkuna karpis, tsënömi willakuyä, y qamkunapis tsënömi creikuyarqunki.

12 Wanushqampita o wañushqampita Cristu kawarimunqanta willakuykashqaqa,+ ¿imanirtan wakinnikiqa wanushqakuna mana kawariyämunqanta niyanki? 13 Rasumpa kaqchöqa, wanushqakuna mana kawariyämunan kaptinqa, Cristupis manam kawarimushqatsu. 14 Peru Cristu mana kawarimushqa kaptinqa, willakunqantsikpis envänum y markäkoq o yärakoq kayanqëkipis envänum. 15 Tsëpitapis masqa, Teyta Diospa uli o llulla testïgunkunam kantsik.+ Awmi, wanushqakuna mana kawayämunan kaptin, Jesusta mana kawaritsimushqa këkaptin, Cristuta kawaritsimushqa kanqanta nirmi,+ Teyta Diospa contran parlarquntsik. 16 Awmi, wanushqakuna mana kawariyämunan kaptinqa, manam Cristupis kawarimushqatsu. 17 Manam tsëllatsu, Cristu mana kawarimushqa kaptinqa, qamkuna markäkoq o yärakoq kayanqëkipis envänum, y manaran jutsëkikunapita* perdonashqaraqtsu kayarqunki.+ 18 Tsëqa Cristuwan juknölla këkar wanoqkunapis llapanmi ushakäyashqa.+ 19 Tsënö kawanallapaq Cristuchö shuyarashqa karqa, wakimpitapis mas llakipëpaqmi* kantsik.

20 Peru Cristuqa, wanunqampitam puntata kawamushqa.+ 21 Juk nunarëkurlla wanuy chämunqannömi,+ wanushqakuna kawariyämunampaq kaqpis juk nunarëkurlla kanqa.+ 22 Adanrëkur llapankuna wanuykäyanqannöllam,+ Cristurëkurpis llapankuna kawariyämunqa.+ 23 Peru cada ünum dispunishqa kanqannö kawariyämunqa: puntata Cristu+ y pë këkämunqan witsan Cristupa kaqkuna.+ 24 Tsëpitanam ushananchö, llapan gobiernukunata, autoridäkunata y poderyoq kaqkunata ushakäratsir, Teyta Diosninta y Teytanta Gobiernuta entreganqa.+ 25 Pëqa, llapan chikeqninkunata chakin jawanman Teyta Dios churanqanyaqmi gobernanan.+ 26 Y ultimu kaq chikimaqnintsik wanuypis, pasëpam* ushakanqa.+ 27 Awmi, Teyta Diosqa “llapan imëkatam cargunman* churashqa”.+ Peru llapan imëkapis cargunman churashqa kanqanta nirqa,+ manam imëkata pëpa cargunman churaqpis cargunchö këkanqantatsu nikan.+ 28 Y llapan imëkapis pëpa cargunman churashqa kaptinqa, Teyta Diosllana llapampa Gobernaqnin kanampaqmi,+ kikin Tsuripis imëkata cargunman churaqpa cargunman churakanqa.+

29 Mana tsënö kaptinqa, ¿imataraq rurayanqa wanushqanö kayänampaq bautizakoq kaqkuna?+ Wanushqakuna mana kawariyämunan kaptinqa, ¿imanirtan pëkunapis wanuyänanllapaq bautizakuyan? 30 ¿Imanirtan noqantsikpis imë hörapis peligruchö këkantsik?+ 31 Cada junaqmi wanuypita salvakü. Tsëpis rasunllam wawqikuna y panikuna, qamkunarëkur, awmi Señornintsik Cristu Jesuspa qateqninkunarëkur alläpa kushikunqänö.* 32 Wakin nunakunanölla* chukaru animalkunawan Ëfesuchö pelyanqäpis,+ ¿imapaqtan sirwiman? Wanushqakuna mana kawariyämunan kaptinqa, “mikushun y upushun warë warätinmi wanukushun”.+ 33 Ama engañakuyëtsu. Mana alli nunakunawan juntakuyqa, alli costumbrikunatam oqratsikun.*+ 34 Wakinkunaqa manam Diospita musyayantsu, tsëmi alli kaqta rurar alli juiciuyoq kayë y ama jutsata* rurar kayëtsu. Tsëtaqa penqakuyänëkipaqmi niyaq.*

35 Tsënö kaptimpis, capaz pï nunapis kënö ninqa: “¿Imanötan wanushqakunaqa kawariyämunqa? Awmi, ¿imanö cuerpuyoqtan kawariyämunqa?”.+ 36 ¡Juiciunnaq nuna! Imatapis murunqëkiqa, wanur-ran jeqamun. 37 Imatapis mururqa manam winashqana plantatatsu murunki, sinöqa trïguta o juk muruta karpis gränullatam murunki, 38 peru Teyta Diosqa munanqan cuerpuyoq kanantam permitin, y cada muru jukläya jukläya cuerpuyoq kanantam permitin. 39 Manam llapan cuerpukunatsu igual kayan, jukläyam nunakunapa cuerpun, wätana animalkunapa cuerpun, pishqukunapa cuerpun, y pescädukunapa cuerpumpis. 40 Kanmi ciëluchö cuerpukunapis+ y patsachö cuerpukunapis.+ Jukläyam ciëluchö cuerpukuna shumaq kayanqan, y jukläyam patsachö cuerpukuna shumaq kayanqampis. 41 Jukläyam inti o rupay shumaq kanqan, y jukläyam killa shumaq kanqan,+ y jukläyam estrëllakuna shumaq kayanqampis. Rasumpa kaqchöqa, juk estrëlla shumaq kanqampis juk estrëlla shumaq kanqampita jukläyam.

42 Tsënöllam wanushqakuna kawariyämuptimpis pasan. Ismur ushakaq cuerpum pampakan, peru ismur mana ushakaq cuerpum kawarimun.+ 43 Penqakuychömi pampakan, peru puëdeqnam kawarimun.+ Mana alli këkarmi pampakan, peru poderyoqmi kawarimun.+ 44 Nuna cuerpuyoqmi pampakan, peru espïritu cuerpuyoqmi kawarimun. Ëtsayoq y yawaryoq cuerpu kaptinqa, espïritu cuerpupis kanmi. 45 Kënömi qellqarëkan: “Punta nuna Adanqa, kawëkaq nunam* karqan”.+ Ultimu kaq Adannam, kawëta apamoq espïritu karqan.+ 46 Tsënö kaptimpis, punta cuerpuqa manam espïritu kaqtsu sinöqa ëtsayoq kaqmi. Punta cuerpuqa ëtsayoq y yawaryoqmi y tsëpitaran espïritu cuerpuqa. 47 Punta nunaqa kë patsapita y allpapita rurashqam,+ peru ishkë kaq nunaqa ciëlupitam.+ 48 Allpapita rurashqa kaqkunaqa allpapita rurashqa kaqnömi kayan, y ciëluchö këkaqkunaqa ciëlupita shamushqa kaqnömi kayan.+ 49 Allpapita rurashqa niraq kanqantsiknöllam,+ ciëlupita shamoq niraqpis kashun.+

50 Peru këtam qamkunata niyaq* wawqikuna y panikuna: ëtsayoq y tulluyoq cuerpuqa* manam Teyta Diospa Gobiernunta chaskinqatsu ni ismur ushakaq kaqpis, ismur mana ushakaqtsu tikran. 51 ¡Rikäyë! Pakarëkaq sagrädu noticiatam qamkunata willayaq:* manam llapantsiktsu wanushun, peru llapantsikmi jukläya tikrashun.+ 52 Tsëqa ultimu trompëta toquëkaptinmi raslla o saslla pasanqa, nawita wichqarkur kichareqnölla. Awmi, trompëta waqaptinmi+ wanushqakunaqa ismur mana ushakaqna kayänampaq kawariyämunqa, y noqantsikpis jukläyanam tikrashun. 53 Awmi, ismur ushakaqmi mana ismur ushakaq tikranan,+ y wanoq kaqmi imëpis mana wanoq tikranan.+ 54 Peru ismur ushakaq mana ismur ushakaq tikraptin, y wanoq kaq mana imëpis wanoq tikraptinqa, kënö qellqarëkanqanmi cumplikanqa: “Wanuytam o wañuytam ushakätsinqa”.+ 55 “Wanuy, ¿mëchötan vencinëkipaq yanapashoqniki kallpa këkan? Wanuy, ¿mëchötan këkan pïmëta sufritseq poderniki?”.+ 56 Wanuyman chätsikoq poderqa jutsam,*+ y jutsata poderyoq tikratseqqa Leymi.+ 57 ¡Peru Señornintsik Jesucristurëkur vencinapaq yanapamanqantsikpita, Teyta Diosta agradecikushun!+

58 Tsëmi kuyë wawqilläkuna y panilläkuna, imëpis alli aguantar firmi kayë+ y Señorpa kaqchö rurayanqëki mana envänu kanqanta yarpar,+ Señorpa kaqchö imëpis ocupädu këkäyë.+