Jeremïas
23 “¡Allaw cargüchö këkaq üshakunata wakpa këpa qarqoq y ushakätseq mitsikoqkuna!” ninmi Teyta Jehovä.+
2 Üsha cuenta sirweqninkunata cargunkunachö katseqkunapaqmi Israelpa Diosnin Teyta Jehovä këta nin: “Qamkunaqa üshä cuenta sirwimaqnïkunatam wakpa këpa qarquyarqunki, y cuidayänëkipa rantinmi mëtsëman chätsiyarqunki.+
Tsëmi mana allikunata rurayanqëkipita qamkunata castigayashqëki” ninmi Teyta Jehovä.
3 “Tsëpitanam noqa permitiptï mëtsëman apashqa kayanqampita üshä cuenta sirwimaqnïkunata+ qewakuna këkanqanman kutitsimushaq.+ Pëkunaqa mirarninmi atska kayanqa.+ 4 Alli mitsikoqnö nunakunapa cargunmanmi, üshatanö cuidayänampaq churashaq.+ Manam mantsakäyanqanatsu ni imapis mantsakätsinqatsu, y manam ni mëqampis faltanqatsu” ninmi Teyta Jehovä.
5 Teyta Jehovämi këta nin: “Rikäyë, ichikllachönam Davidpa juk kastanta* gobernanampaq churashaq,+ y pëqa imëpis allillata rurarmi gobernanqa.+ Pëqa imatapis allim entiendinqa, justiciatam ruranqa y entëru patsachömi alli kaqllata ruranqa.+ 6 Pë kawanqan witsanqa Judäpita nunakunam salvashqa kayanqa+ y Israelpita nunakunapis segürum kawakuyanqa.+ Noqantsikpaqqa, ‘Jehovämi justiciata ruran’ nirmi reqishqa kanqa”.+
7 “Teyta Jehoväqa kënöpis ninmi: ‘¡Ichikllachönam israelïtakunata Egiptu nacionpita salvamoq Teyta Jehovä imëpis kawanqannöllam!’ nir parlayanqanatsu.+ 8 Tsëpa rantinqa ‘¡norti lädupita y mëtsëman apayanqampita israelïtakunata kutitsimoq Teyta Jehovä imëpis kawanqannölla!’ nirnam parlayanqa. Y pëkunaqa kikinkunapa markankunachömi kawayanqa”.+
9 Teyta Diospa willakoqninkunatam këta nï:
Shonqüchömi alläpa llakikuykä.
Llapan tullükunam karkaryëkäyan.
Teyta Jehovärëkur
y ninqankunarëkurmi machashqanö këkä.
Awmi, vïnuwan machashqa nunanömi këkä.
10 Kë markachöqa nunankunata y warminkunata jukwan engañarmi kayan,+
y maldicishqa karmi kë kinrë markakunaqa llakipëpaq* kayan.+
Tsunyaq sitiuchö qewakunapis tsakishqam këkan.+
Imëka mana allikunatam rurayan y cargunkunapita provechakurmi wakinkunata sufritsiyan.
11 “Noqapita willakoqkuna y sacerdötikunapis manam rikënïchö limpiutsu këkäyan,*+
y wayïchöpis mana allikunata rurayanqantam rikarqö”+ ninmi Teyta Jehovä.
12 “Tsëmi ampirëkaq o tsakëkaq*+ y lutska nänipa purikaqnö këkäyan,
y tanqëkuyaptinllam ishkir ushayanqa.
Pëkunata castiganä wataqa,
imëka mana allikunatam pëkunapaq chätsimushaq” ninmi Teyta Jehovä.
13 “Samariachö+ willakoqkunapis melanëpaqkunatam rurëkäyan.
Pëkunaqa Baalpa jutinchö willakurmi sirwimaqnï
israelïtakunata mana allikunaman chätsiyan.
14 Tsënöllam Jerusalenpita willakoqkunapis imëka melanëpaqkunata rurëkäyan.
Pëkunaqa warminkunatam jukkunawan engañayan.+
Imëpis ulikurmi o llullakurmi këkäyan,+ mana allita ruraqkunatam yanapayan,
y mana allikunata rurayanqampitam arrepentikuyantsu.
Tsëmi noqapaqqa, llapankunapis Sodömapita nunakunanö kayan,+
tsëchö kawaqkunanam Gomörrapita nunakunanö kayan”.+
15 Tsëmi angelkunata mandaq Teyta Jehoväqa pëpita willakoqkunapaq këta nin:
“Jerusalenchö willakoqkunaqa kë entëru nacionchö
nunakunatam noqapa conträ churayashqa. Tsëmi ajenjuta mikuyänanta
y venënuyoq yakuta upuyänanta permitishaq”.+
16 Angelkunata mandaq Teyta Jehoväqa këtapis ninmi:
“Ama willakoqkuna niyäshunqëkita cäsuyëtsu,+
pëkunaqa engañayäshunëkipaqmi imëkata nikäyan.
Pëkuna willakuyanqan revelacionkunaqa manam noqa Jehoväpitatsu shamun.+
Pëkunaqa shonqunkunachö pensayanqantam parlëkäyan.+
17 Mana respetamaqkunatam kutin kutin kënö nikäyan:
‘Teyta Jehovämi këta nishqa: “Qamkunaqa imëpis yamëmi kayanki”’.+
Y mana wiyakoq shonqunkuna ninqanta ruraqkunatanam kutin kutin kënö nikäyan:
‘Qamkunamanqa manam ima mana allipis chämunqatsu’.+
18 ¿Pitan noqa Jehovä ninqäkunata wiyanampaq
y rikänampaq alli amïgükunachö kashqa?
¿Pitan noqa ninqäkunata alkäbu wiyashqa?
19 ¡Rikäyë! Noqa Jehoväpa cöleraqa shukukuy vientunömi shamunqa,
y mana allita ruraq nunakunapa peqankunamanmi o umankunamanmi chämunqa.+
20 Shonqüchö munanqäta cumplinqäyaqmi
noqa Jehoväpa cöleräqa pasanqatsu
y ushanan junaqkunachöran qamkunaqa tsëkunata alli entiendiyanki.
21 Tsë willakoqkunaqa noqa mana mandëkaptïmi cörripa shayämushqa,
y pëkunawan mana parlëkaptïmi pëkunaqa willakur këkayan.+
22 Peru tsë willakoqkuna alli amïgükuna karqa,
ninqäkunata cäsukuyänampaq, mana alli rurëkunata dejayänampaq
y mana alli portakuyanqanta dejayänampaqchi sirwimaqnïkunata niyanman karqan”.+
23 “Amänüchö pasakunqanta y karuchö pasakunqantapis noqaqa musyëkämi” ninmi Teyta Jehovä.
24 “¿Pï nunapis noqapita ratakuyta o tsinkakuyta* puëdinmantsuraq?”+ ninmi Teyta Jehovä.
“¿Manaku noqaqa ciëluchö kaqkunata y patsachö kaqkunatapis rikëkä?”+ ninmi Teyta Jehovä.
25 “Jutïchö willakoqkuna nunakunata engañar ‘¡Këtam suëñurqö! ¡Këtam suëñurqö!’ nikäyanqantam wiyarqö.+ 26 ¿Imëyaqraq kë willakoqkuna mana rasumpa kaqta willakur këkäyanqa? Pëkunaqa shonqunkuna ninqanta parlarmi nunakunata engañar këkäyan.+ 27 Pëkunaqa suëñuyanqanta cuentanakurmi sirwimaqnïkunata jutïta qonqatsiyan. Tsënöllam unë kastankunapis Baalta adorar jutïta qonqëkuyarqan.+ 28 Imatapis suëñur willakoqkunaqa suëñuyanqanta willakuyätsun. Y noqa ninqäta willakoqkunaqa ninqätanölla imatapis willakuyätsun”.
“¿Päjawan trïguqa imallachöpis igualku kayan?” ninmi Teyta Jehovä.
29 “¿Manaku noqa ninqäkunaqa ninanö+ y qaqata pakiyänampaq combanö?” ninmi Teyta Jehovä.+
30 “Tsëmi willakoqnïkuna willakuyanqanta tumaratsir juknöpa willakoqkunata castigashaq” ninmi Teyta Jehovä.+
31 “Tsënöllam ‘¡pëmi këta nin!’ neq willakoqkunatapis castigashaq” ninmi Teyta Jehovä.+
32 “Tsënöllam suëñuyanqanta nir mana rasumpa kaqta willakoqkunata, sirwimaqnïkunata engañar mana alliman chätseqkunata y mana cäbeqkunata willakoqkunatapis castigashaq”+ ninmi Teyta Jehovä.
“Noqa mana mandashqa kaptïmi pëkuna willakuyanqanqa sirwimaqnïkunata imachöpis yanapanqatsu”+ ninmi Teyta Jehovä.
33 “Mëqan nunapis, willakoqpis o sacerdötipis ‘¿Imatan Teyta Jehoväpaqqa lasaq qepinö?’ nir tapuyäshuptikiqa kënömi ninëki ‘“¡Qamkunam noqapaqqa lasaq qepinö kayanki! Tsëmi qamkunata dejariyashqëki”+ ninmi Teyta Jehovä’. 34 Mëqan willakoqpis, sacerdötipis o nunapis ‘¡kë willakunqëkim Jehoväpita lasaq qepinö!’ niptinqa. Tsë nunata y familiantam castigashaq. 35 Qamkunaqa nuna mayikikunata y wawqikikunatam kutin kutin kënö nikäyanki: ‘¿Imatan Jehovä nishqa? ¿Imatataq Jehovä nimarquntsik?’. 36 Qamkunaqa kawëkaq Diosnintsik angelkunata mandaq Teyta Jehovä mana ninqankunatam willakuykäyanki. Tsë willakuyanqëkiqa lasaq qepinömi. Tsëmi ama Jehovä ninqankuna lasaq qepinö kanqanta niyënatsu.
37 Willakoqtam kënö ninëki: ‘¿Ima nintan Teyta Jehovä? ¿Y ima nishurqunkitan Teyta Jehovä?’. 38 “Kë ninqëkikunaqa Teyta Jehoväpita lasaq qepinömi” nir sïguiyaptikiqa, Teyta Jehovämi këta nin: “Ama ‘Jehovä ninqankunaqa lasaq qepinömi’ niyëtsu nikaptïmi ‘qamkunaqa Jehovä ninqankunaqa lasaq qepinömi’ nir këkäyanki”. 39 Tsëmi qamkunata y unë kastëkikunata entreganqa markakunatapis rikënïpita karuman churashaq. 40 Y qamkuna penqakatsishqa y allqutsashqa kayänëkitam permitishaq. Tsëtaqa manam imëpis qonqayankitsu”’”.+