Ezequiel
3 Tsëpitanam kënö nimarqan: “Nunapa tsurin, puntëkichö këkaqta mikuy. Kë rölluta mikuy y tsëpitana Israel nunakunata parlapaq ëwë”.+
2 Tsënam shimïta kicharkuptï, rölluta mikutsimarqan. 3 Kënömi nimarqan: “Nunapa tsurin, pachëki juntanqanyaq kë rölluta mikuy”. Tsëmi mikur qallëkurqä, y tsë rölluqa mielnöraqmi shimïchö mishkirqan.+
4 Tsëpitanam kënö nimarqan: “Nunapa tsurin, Israel nunakunaman ëwar ninqaqkunata parlapë. 5 Qamtaqa manam juk idiömata parlaq karu markachö nunakunamantsu, ni mana entiendinqëki idiömata parlaq nunakunamantsu mandëkaq. Sinöqa Israel nunakunamanmi mandëkaq. 6 Manam mëtsë markakunachö juk idiömata parlaq nunakunamantsu, ni mana entiendinqëki idiömata parlaq nunakunamantsu mandëkaq. Pëkunaman mandapteqqa, pëkunaqa willakunqëkita cäsukuyanmanchi.+ 7 Peru Israel nunakunaqa, manam parlapanqäta cäsuyämantsu.+ Tsëmi qam parlapaptikipis cäsuyäshunkitsu. Israel nunakunaqa mana cäsukoq* y rumi shonqum kayan.+ 8 Cärëkitam y urkuykitam, pëkunapa cärankunatanö y urkunkunatanö chukruta tikratsirqö.+ 9 Urkuykitam diamanti rumitanö chukruta tikratsirqö, pedernal rumipitapis mas chukrutam tikratsirqö.+ Ama tsë nunakunata mantsankitsu. Ama mantsanëpaq cärankunata rikarnin mantsankitsu. Pëkunaqa mana cäsukoq nunakunam kayan”.+
10 Tsëpitanam kënö nimarqan: “Nunapa tsurin, parlapanqaqkunata shumaq wiyamë. Parlapanqaqkunaman alli pensë. 11 Babiloniaman apayämunqan marka mayikikuna kaqta ëwar parlapë.+ Wiyakuyänan o mana wiyakuyänan kaptimpis+ kënö ninki: ‘Llapanta Gobernaq Teyta Jehovämi kënö nin’”.
12 Tsëpitanam, Teyta Diospa podernin pushamarqan+ y qepächömi wiyarqä fuertipa kënö nimoqta: “Teyta Jehoväqa këkanqanchö, poderösu kanqampita alabashqa katsun”. 13 Angelkunapa älankuna topanakur büllaqta+ y ruëdakunapis büllaqtam wiyarqä.+ Tsënöllam mas büllatapis wiyarqä. 14 Y Teyta Diospa poderninmi pallarkamar* apakamarqan y noqaqa llakishqa y cölerashqam ëwarqä. Teyta Jehoväpa poderninqa allipam yanapamarqan. 15 Marka mayïkuna këkäyanqan Tel-Abib sitiutam ëwarqä. Pëkunaqa Kebar mayu*+ kuchunchömi täkuyarqan,* y pëkunawanmi quedakurqä. Tsëchömi qanchis junaqpa upayashqa+ kakurqä.
16 Qanchis junaq cumpliriptinnam Teyta Jehovä kënö nimarqan:
17 “Nunapa tsurin, qamtam Israel nacionman churarqoq rikachakur täpakunëkipaq.+ Imatapis parlanqäkunata wiyarqa, noqapa jutïchö willakunki.+ 18 Juk mana alli nunata, ‘qamqa wanunkim’ nïman. Peru qamqa, tsë nunata parlapankimantsu mana alli rurëkunata dejanampaq, ni willankimantsu tsë rurëkunata mana dejarqa wanunampaq kaqta.+ Tsëqa, mana alli kanqampitam+ tsë nunaqa wanunqa. Peru yawarnintaqa, qamtam reclamashqëki mana parlapanqëkipita.+ 19 Peru mana alli rurëkunata dejanampaq parlapëkaptiki mana cäsukurqa, mana allikunata ruranqampitam wanunqa, peru qamqa salvakunkim.+ 20 Y juk alli nuna, alli ruraq këkar mana allikunata rurar qallëkuptinqa, noqam ishkitsishaq y wanunqam.+ Peru mana alli rurëkunata dejanampaq mana parlapashqa kaptikiqa, tsë nunaqa jutsata* ruranqampitam wanunqa y allikunata ruranqantaqa manam ichikllapis yarpäshaqtsu. Peru yawarnintaqa qamtam reclamashqëki.+ 21 Peru alli nunata, jutsata* mana ruranampaq parlapaptiki, cäsukur jutsata mana rurarqa, tsë nunaqa manam wanunqatsu+ y qampis salvakunkim”.
22 Tsë sitiuchömi Teyta Jehoväqa poderninwan yanapamarqan y kënömi nimarqan: “Jinan höra pampata ëwë, tsëchö qamwan parlanäpaq”. 23 Tsëmi jinan höra pampata ëwarqä. Y tsëchömi Teyta Jehoväpa poderninta rikarqä,+ Kebar mayu*+ kuchunchö rikanqänömi karqan. Tsëta rikëkurmi patsamampis urkü chanqanyaq ishkirirqä. 24 Y Teyta Diospa podernin yanapamaptinmi sharkurqä.+ Tsënam Teyta Diosqa parlapämar kënö nimarqan:
“Ëwar wayikiman yëkuri y punkuta wichqarkamuy. 25 Tsëchömi* waskata apëkamur nunakuna watayäshunki. Tsëmi yarqamuyta puëdinkitsu, ni manam nuna mayikikunawampis juntu këta puëdinkitsu. 26 Y noqanam qalluykita paladarnikiman laqakätsishaq y manam parlëta puëdinkitsu. Tsëmi parlëta mana puëdir, tsë nunakunata corregita puëdinkitsu. Tsë nunakunaqa mana cäsukoqmi kayan. 27 Peru noqa parlapäripteqmi shimiki kichakärinqa, tsëmi pëkunata kënö ninëki:+ ‘Llapanta Gobernaq Teyta Jehovämi kënö nin’. Wiyëta munaq kaqqa wiyakutsun,+ peru wiyëta mana munaq kaqqa ama wiyatsuntsu. Pëkunaqa mana cäsukoq nunakunam kayan.+