2 Crönicas
5 Gobernanti Salomonqa Jehovä Diospa templunta usharatsirmi,+ papänin David alistanqan cösaskunata aparqan.+ Plätata, öruta y mas cösaskunatam Teyta Diospa väleq cösasninkuna churaränan cuartuman churarqan.+ 2 Tsë witsanmi Salomonqa Israelchö cada kastapa dirigeqninkunata y cada familiapa dirigeqninkunata qayatsirqan. Tsëmi pëkunaqa Jerusalenta ëwayarqan Sion markapita+ o David Markapita+ Jehovä Diospa Sagrädu Cäjanta apayänampaq. 3 Llapan nunakunam watapa qanchis kaq killanchö gobernanti kaqta ëwayarqan, tsë witsanqa Ramäda Fiesta witsanmi karqan.+
4 Llapan dirigeqkuna chäriyaptinmi, Sagrädu Cäjata+ hombrurkur sacerdötikuna apayarqan. 5 Sagrädu Cäjata, carpa* wayita+ y utilizäyanqan sagrädu cösaskunatam sacerdötikuna y levïta nunakuna apayarqan. 6 Templuman chäratsirnam, Salomonwan llapan nunakuna Sagrädu Cäja puntanman juntakäyarqan. Pishtëkur rupëkätsiyanqan törukunawan üshakunaqa+ yupëtapis mana puëdipaqmi mëtsika karqan. 7 Tsëpitanam sacerdötikunaqa Alläpa Sagrädu Cuartuman Jehoväpa Sagrädu Cäjanta yëkatsiyarqan. Y querubin angelkunapa älankuna topanakunqan jawanmanmi* churayarqan.+ 8 Sagrädu Cäja janampa y puritsiyänan listonkuna+ janampam querubinkunapa älankunaqa këkarqan. 9 Sagrädu Cäjata puritsiyänan listonqa largum karqan, tsëmi Sagrädu Cuartuyaq rikakamoq, y mas waqtamanqa manam rikakamoqnatsu. Tsëchömi kananyaqpis këkan. 10 Tsë Sagrädu Cäja rurinchöqa, Horeb+ jirkachö Moises churanqan ishkë palta rumikunam karqan. Tsëtaqa churarqan, israelïtakuna Egiptupita yarqayämuptin+ Teyta Jehovä pëkunawan acuerduta ruranqan+ witsanmi.
11 Tsëchö këkaq sacerdötikunaqa mëqan grüpupita karpis+ llapanmi limpiuyätsishqa kayarqan.+ Tsëmi sagrädu sitiupita yarqayämunampaqqa, 12 Asafpa,+ Hemanpa,+ Jedutunpa,+ tsurinkunapa y wawqinkunapa grüpunkunachö cantar yanapakoq levïtakuna+ alli kaq tëlawan vistishqa y platïllunkuna, cuerdayoq instrumentunkuna y arpankuna aptashqa altar lädunchö* shëkäyarqan.* Y pëkunawan juntum cientu veinti sacerdötikunapis+ trompëtankunata tocar këkäyarqan. 13 Tsënam trompëtakunata, platïllukunata y wakin instrumentukunatapis tocarnin Jehovä Diosta alabayarqan. “Pëqa allim, pëqa imëpis alläpa kuyakoqllam këkan”+ nirmi Teyta Jehoväpaq cantayarqan. Tsë höram pukutë urämurnin Jehoväpa templunman juntarirqan.+ 14 Jehovä Diospa podernin pukutënöraq templuman juntariptinmi, sacerdötikunaqa tsëchö trabajëta puëdiyarqannatsu.+