Ezequiel
31 Onci watachömi, kima killapa punta kaq junaqninchö, Teyta Jehovä yapë parlapämarqan. Kënömi nimarqan: 2 “Nunapa tsurin, Egiptuchö gobernaq faraonta y llapan soldädunkunata kënö nï:+
‘¿Poderösu kanqëkitaqa imawantan igualatsïman?
3 Qamqa asiriu nunanömi kanki, Lïbanuchö shumaq rämayoq cedru qerunö.
Tsë planta atska rämayoq kaptinmi, pïmëpis tsëchö arwäkuyaq o llantukuyaq.
Jatunmi karqan, tsëmi puntanqa pukutëyaq charqan.
4 Atska yaku kaptinmi allipa jatunyarqan. Mëtsika yaku kaptinmi alli jatun winarqan.
Plantaranqan lädupam mëtsika yaku ëwaq.
Canalkunapa ëwaq yakum wakin montikunamampis chaq.
5 Tsënö mëtsika yaku kaptinmi, wakin qerukunapitapis o montikunapitapis mas jatun winarqan,
rämampis mëtsikam karqan
y entëru lädupam mashtakarqan.
6 Tukuyläya pishqukunam rämankunachö qeshunkunata rurayaq,
tsë jatun qerupa o jatun montipa chakinchönam chukaru animalkuna wachayaq,
y jatusaq nacionkunapita nunakunam arwanchö o llantunchö täkuyaq.*
7 Watsinkuna o matsunkuna* atska yakuta tarishqa kaptinmi,
alläpa shumaq tikrarqan y mëtsika rämayoq karqan.
8 Diospa huertanchö këkaq cedrupis+ manam tsë plantawanqa igualarqantsu.
Manam enebrupa rämankunapis tsë plantawanqa igualarqantsu. Manam plätanupa* rämampis igualarqantsu.
Diospa huertanchö këkaq plantakunapis manam igualarqantsu.
Tsë plantaqa alläpa shumaqmi karqan.
9 Atska rämayoqtam alläpa shumaqta tikratsirqä.
Tsënö shumaq kaptinmi Eden huertachö këkaq, Teyta Diospa huertanchö këkaq, llapan jatusaq qerukunapis o montikunapis chikipäyaq’.
10 Tsëmi Llapanta Gobernaq Teyta Jehoväqa kënö nin: ‘Tsë plantaqa alläpam jatunyarqan,* puntampis pukutëyaqmi charqan. Peru jatun karmi orgullösu tikrakurirqan. 11 Tsëmi kananqa, nacionkunachö mandakoq puëdeq gobernantita entreguëkushaq.+ Pëmi castiganqa, y mana allikunata ruranqampitam noqapis despreciashaq. 12 Llakipäkuyta* mana yachaq, juk nacion nunakunam muturir jirkachö dejëkuyanqa. Tsëmi rämankunapis mëtsë pampakunachö mashtaräkunqa, y pakishqa rämankunapis mayu* kuchunkunachömi mashtaräkunqa.+ Wäninchö o llantunchö täkoq* mëtsë markakunapita nunakunapis dejaskirmi ëwakuyanqa. 13 Y jitarëkaq qeruchöqa tukuyläya pishqukunam kayanqa. Tsënöllam rämankunachöpis chukaru animalkuna pärayanqa.+ 14 Tsëqa pasanqa, atska yaku kuchunchö këkaq jatusaq qerukuna o montikuna alläpa jatun mana winayänampaq, puntankunapis pukutëyaq mana chänampaq y atska yakuyoq qerukunapis o montikunapis tsë plantanö jatun mana winayänampaqmi. Llapankunam wanuyanqa o wañuyanqa y sepultürachö pamparaq nunakunanömi pamparäyanqa’.
15 Llapanta Gobernaq Teyta Jehovämi kënö nin: ‘Pë wanurir o wañuskir Sepultüraman* yëkunqan junaqqa, llapan rikëkaqkunam llakikur waqayanqa. Pëpaq llakikuyänampaqmi atska yakutapis tsaparkushaq, ëwëkaq yakutapis päratsishaqmi. Lïbanutapis ampïratsishaqmi o tsakäratsishaqmi,* y mëtsëchö këkaq jatusaq qerukunam o montikunam tsakinqa. 16 Wakin wanushqakunawan o wañushqakunawan juntu Sepultüraman* ishkeqta wiyarmi, mëtsë nacionkuna mantsakar karkaryäyanqa. Eden+ huertachö këkaq llapan plantakuna, Lïbanuchö këkaq mas allin kaq plantakuna y atska yakuyoq plantakunapis patsa rurinchömi consuëluta tariyanqa. 17 Pëkunapis pëwan juntum Sepultüraman* yëkuyashqa, espädawan wanoq nunakuna këkäyanqan sitiuman.+ Tsënöllam llapan yanapaqninkunapis, pëwan juntu sepultüraman yëkuyashqa. Pëkunaqa arwanchö o llantunchö täkoq* nacionkunam kayarqan’.+
18 ‘Qamqa alläpa shumaqmi kanki. ¿Qamwanqa Eden huertachö këkaq mëqan plantaraq igualanman?+ Tsënö këkarpis, Eden huertachö këkaq plantakunawan juntum patsa rurinman pampakanki. Espädawan wanutsiyanqan mana señalakushqa* melanëpaq nunakunawan juntum jitaranki. Tsëmi pasanqa faraonta y llapan yanapaqnin nunakunata’. Tsënömi nin Llapanta Gobernaq Teyta Jehovä”.