Ezequiel

20 Qanchis watachömi, pitsqa killapa chunka junaqninchö, Israelchö wakin dirigentikuna shayämurqan Jehoväta tapuyänampaq y puntämanmi jamakayämurqan. 2 Tsënam Teyta Jehoväqa kënö nimarqan: 3 “Nunapa tsurin, Israelchö dirigentikunata kënö nï: ‘Llapanta Gobernaq Teyta Jehovämi kënö niyäshunki: “¿Tapukayämaqku shayämurqunki? ‘Noqa kawëkaq Diosmi nï, manam tapukayämanqëkita contestayashqëkitsu’+ ninmi Llapanta Gobernaq Teyta Jehovä”’.

4 ¿Listuku këkanki juzganëkipaq? Nunapa tsurin, ¿listuku këkanki juzganëkipaq? Unë kastankuna imëka mana allikunata rurayanqanta willë.+ 5 Kënömi ninëki: ‘Llapanta Gobernaq Teyta Jehovämi kënö niyäshunki: “Israelta akranqä junaqqa+ Jacobpa tsurinkunatam jurar änirqä, pëkunaqa Egiptuchömi reqiyämarqan.+ Kënö nirmi änirqä ‘noqam Jehovä Diosnikikuna kä’. 6 Tsë junaqmi pëkunata jurar änirqä, Egiptu markapita pushar, lichipis, mielpis mëtsika kanqan markaman* chätsinäpaq kaqta.+ Tsë markaqa wakin markakunapitapis mas shumaqmi karqan. 7 ‘Adorëkäyanqëki melanëpaq cösaskunata jitar ushayë, Egiptuchö melanëpaq santukunata ama adorayëtsu.+ Noqam Jehovä Diosnikikuna kä’.+

8 Tsënö nikaptïpis, pëkunaqa manam cäsuyämarqantsu. Manam parlapanqäta wiyayarqantsu, tsëmi adorëkäyanqan melanëpaq cösaskunata jitayarqantsu. Egiptuchö melanëpaq santunkunatam adorayarqan.+ Tsëmi castiganäpaq nirqä, Egiptu markachö fuertipa castiganäpaqmi jurarqä. 9 Peru nacionkunachö nunakuna jutïpaq mana allita mana parlayänanta munarmi castigarqätsu.+ Pëkunata,* unë kastëkikunata tsë markapita pushamuptïmi Egiptu nacionchö nunakunaqa musyayarqan pï kanqäta.+ 10 Egiptupitam tsunyaq jirkaman pushamurqä.+

11 Tsëpitanam leynïkunata y ninqäkunata musyatsirqä,+ tsëta cäsukoq kaqkuna kawakuyänampaq.+ 12 Noqam mandarqä säbadu junaq mana trabajayänampaq,+ tsëwanmi yarpäyänan karqan noqa Jehovä Diosninkuna kanäpaq ruranqä acuerduta+ y sirwimaqnïkuna kayänampaq pëkunallata akranqäta.

13 Peru israelïtakunaqa manam tsunyaq sitiuchö cäsuyämarqantsu, manam leynïkunata ni ninqäkunatapis cumpliyarqantsu.+ Tsëkunata cäsukoq kaqqa pï karpis kawakunmanmi. Pëkunaqa säbadu junaqtapis manam respetayarqantsu. Tsëmi tsunyaq sitiuchö castiganäpaq jurarqä.+ 14 Peru nacionkunachö nunakuna jutïpaq mana allita mana parlayänanta munarmi castigarqätsu. Tsë nacion nunakuna rikëkäyaptinmi pëkunata pushamurqä.+ 15 Y jurarmi nirqä lichipis, mielpis mëtsika kanqan markaman+ y wakin markakunapitapis mas shumaq markaman pëkunata manana pushanäpaq kaqta.+ 16 Tsënöqa nirqä, ninqäkunata y leynïkunata mana cumplishqa kayaptin y säbadu junaqtapis mana respetashqa kayaptinmi. Pëkunaqa melanëpaq santukunallamanmi masqa yarparäyaq.+

17 Peru llakiparninmi* ushakätsirqätsu. Manam tsunyaq jirkachö ushakätsirqätsu. 18 Wamrankunatam tsunyaq sitiuchö kënö nirqä:+ ‘Ama unë kastëkikunanöqa kayëtsu.+ Ama niyanqankunata rurayëtsu, ni melanëpaq santukunata adorayëtsu. 19 Noqam, Jehovä Diosnikikuna kä. Leynïkunata y ninqäkunata cäsukur cumpliyë.+ 20 Qamkunapaqqa säbadu junaq sagrädu katsun.+ Tsënöpam yarpäyanki, noqa Jehovä Diosnikikuna kanäpaq ruranqä acuerduta’.+

21 Tsënö nikaptïpis wamrankunaqa manam cäsuyämarqantsu.+ Leynïkunata y ninqäkunatapis manam cumpliyarqantsu. Tsëkunata cäsukoq kaqqa kawakunmanmi. Tsënöllam säbadu junaqtapis respetayarqantsu. Tsëmi tsunyaq sitiuchö jurarnin nirqä, pëkunata fuertipa castiganäpaq kaqta.+ 22 Peru juk nacion nunakuna jutïpaq+ mana allita parlayänanta mana munarmi castigarqätsu.+ Tsë nacion nunakuna rikëkäyaptinmi pëkunata* pushamurqä. 23 Tsënöllam tsunyaq sitiuchö jurarnin nirqä mëtsë nacionkunaman y mëtsë markakunaman qarqunäpaq kaqta.+ 24 Tsënöqa nirqä leynïkunata y ninqäkunata mana cumplishqa kayaptin,+ säbadu junaqtapis mana respetashqa kayaptin y melanëpaq santukunata adorëta mana dejayaptinmi.+ 25 Y mana alli leykunata y ushakëman chätsikoq leykunata cäsukur kakuyänampaqmi dejarirqä.+ 26 Tsënöllam dejarqä mayor wamrankunata ninachö rupatsir jutsata* rurayänantapis.+ Tsënöpa kikinkunalla imëka sufrimientuman chäyänampaq y noqa Jehovä kanqäta musyayänampaq”’.

27 Nunapa tsurin, Israel nunakunata kënö nï: ‘Llapanta Gobernaq Teyta Jehovämi kënö niyäshunki: “Tsënömi unë kastëkikunaqa imëka mana allikunata rurar mana kaqpaq churayämarqan. Manam ni ichikllapis respetayämarqantsu. 28 Y noqaqa, jurar äninqä markamanmi chätsirqä.+ Y pëkunaqa chëkurmi, taksha jirkakunata rikëkur, mëtsika rämayoq qerukunata o montikunata rikëkur tsëkunachö noqapaq qarëkunata rupatsiyämurqan.+ Pukutaq o mushkoq qarëkunatam rupatsiyämurqan y tsë qarëkuna jananmanmi vïnutapis jichayarqan. Peru tsë qarëkunataqa alläpam melanarqä. 29 Tsënam tapurqä, ‘¿imaqtan tsë altu sitiukunaman ëwayanki?’ nir. (Kananyaqpis Sagrädu Altu Sitiukuna nirmi reqiyan)”’.+

30 Kananqa Israel nunakunata kënö nï: ‘Llapanta Gobernaq Teyta Jehovämi kënö niyäshunki: “Qamkunapis unë kastëkikunanöllam noqata dejaramar* santukunata adorar këkäyanki.+ 31 Kananyaqmi melanëpaq santukunata adorar imëka qarëkunata rupëkätsiyanki. Hasta wamrëkikunatapis tsëkunapaqmi ninachö rupatsiyanki.+ Israel nunakuna, ¿tsëkunata rurëkäyaptikitsuraq tapukayämanqëkita contestäman?”’.*+

Noqa Llapanta Gobernaq y kawëkaq Jehovämi nï: ‘Manam tapukayämanqëkita contestayashqëkitsu’.+ 32 Qamkuna pensayanqëkiqa manam rurakanqatsu. Qamkunaqa kënömi niyanki: “Noqantsikpis qeruta y rumita adoraq juk nacion nunakunanö y mëtsë markachö nunakunanö kashun”’”.+

33 Llapanta Gobernaq Teyta Jehovämi kënö nin: “Noqa kawëkaq Diosmi nï: ‘Noqam gobernantikikuna kashaq y puëdeq rikräwan y puëdeq makïwanmi castigayashqëki. Alläpa cölerarmi castigayashqëki.+ 34 Mëtsë markakunachö këkäyaptikim puëdeq makïwan, puëdeq rikräwan castigayarniki llapëkita juntayashqëki y pushayämushqëki.+ 35 Y markakunapa tsunyaq sitiunkunaman apëkurmi juzgayashqëki.+

36 Unë kastëkikunata Egiptu nacionpa tsunyaq jirkankunachö juzganqänömi qamkunatapis juzgayashqëki’. Tsëtam niyäshunki Llapanta Gobernaq Teyta Jehovä. 37 ‘Mitsikoqpa tukrun jawampam* pasatsishqëki.+ Y ruranqä acuerdutam cumplitsiyashqëki. 38 Peru mana cäsumaqkunata y jutsata* ruraqkunataqa rakishaqmi.+ Forastërunö kayanqëki markakunapitam pushayämushqëki. Peru Israel markakunamanqa manam chätsiyashqëkitsu.+ Y qamkunaqa musyariyankim noqa Jehovä kanqäta’.

39 Israel nunakuna, këtam Llapanta Gobernaq Teyta Jehovä niyäshunki: ‘Mana cäsumarqa ëwarnin melanëpaq santukunata adorakuyë.+ Peru yarpäyë, qarëkunata rupatsiyanqëkiwan y melanëpaq santukunata adorayanqëkiwanqa mananam sagrädu jutïta mana allichö quedatsiyankinatsu’.+

40 ‘Israelchömi altu kaq jirkachö, sagrädu jirkächö llapan israelïtakuna sirwiyämanqa.+ Tsë nacionchömi llapankuna sirwiyämanqa’. Tsëtam Llapanta Gobernaq Teyta Jehovä niyäshunki.+ ‘Tsëchö sirwiyämaptinmi kushikushaq. Y qarëkunata apayämunampaq, murukuyanqankunapa punta wawankunata apayämunampaq y imëka qarëkunata apayämunampaqmi mañakushaq.+ 41 Mëtsë markakunachö këkaqta pushamunqäpita y llapëkikunata juntanqäpitam, pukutaq o mushkoq qarëkunata rupatsiyämuptiki kushikushaq.+ Y llapan nacionkunam musyayanqa limpiu Dios kanqäta’.+

42 ‘Unë kastëkikunata jurar äninqä Israel markakunaman chäratsiptïmi,*+ qamkunaqa musyariyanki noqa Jehovä kanqäta.+ 43 Tsëman chëkurqa mana alli portakuyanqëkita y imëka mana allikunata rurayanqëkitam yarpäyanki.+ Imëka mana allikunata rurayanqëkikunata yarparmi alläpa penqakuyanki.+ 44 Israel nunakuna, musyariyankim noqa Jehovä kanqäta. Y musyariyankim jutï respetashqa kananta munar mana alli portakuykäyaptiki+ y imëka mana allikunata rurëkäyaptikipis mana castiganqäta’* ninmi Llapanta Gobernaq Teyta Jehovä”.

45 Teyta Jehoväqa yapëmi parlapämarqan y kënömi nimarqan: 46 “Nunapa tsurin, kananqa sur kaq läduman rikëkur sur kaq läduchö këkaq montikunata ima pasanampaq kaqta willakuy. 47 Sur kaq läduchö këkaq montikunata kënö nï: ‘Teyta Jehovä ninqanta wiyë, kënömi Llapanta Gobernaq Teyta Jehovä nishunki: “Rikë, qamchö këkaq plantakunamanmi ninata prendïkushaq.+ Tsëmi tsakishqa këkaqkunata y llullu këkaq plantakunatapis rupar ushanqa. Ninaqa manam upinqatsu.*+ Sur lädupita norti läduyaqmi llapan plantakuna achachëwan tsakinqa. 48 Y llapan nunakunam musyayanqa, tsë ninata mana upinampaq* noqa Jehovä prendishqa kanqäta”’”.+

49 Tsënam noqaqa nirqä: “¡Llapanta Gobernaq Teyta Jehovä! Nunakunaqa kënömi niyäman: ‘Mana entiendipaqtam* parlan’”.