Jeremïas
8 Teyta Jehovämi këta nin: “Tsë witsanqa Judächö gobernaqkunapa, dirigeqkunapa, sacerdötikunapa, willakoqkunapa y Jerusalenpita nunakunapa tullunkunatam sepultürakunapita jipiyanki. 2 Intipa o rupaypa, killapa y ciëluchö kaqkunapa rikëninchömi mashtaräyanqa. Tsëkunatam pëkunaqa kuyayarqan, sirwiyarqan, qatiyarqan, ashiyarqan y puntankunaman qonqurikuykur adorayarqan.+ Pëkunataqa manam juntayanqatsu ni pampayanqatsu, animalkunapa ismaninnömi wakchö këchö jitaräyanqa”.+
3 “Juk nacionman apashqa kayanqanchö, kë mana allita ruraq nunakunapita kawëkar quedaqkunaqa, kawëta munayänampa rantinmi wanuyta munayanqa” ninmi angelkunata mandaq Teyta Jehovä.
4 “Pëkunatam kënö ninëki: ‘Teyta Jehovämi këta nin:
“¿Pï nunallapis ishkirqa manatsuraq yapë sharkunqa?
¿Pillapis qepaman kutikuptinqa manatsuraq wakinkunapis tsënölla rurayanqa?
5 ¿Imanirtan Jerusalenpita nunakunaqa
traicionakoq këta dejayantsu?+
Pëkunaqa imëpis engañakurllam këkäyan, y manam dejëta munayantsu.
6 Pëkuna imanö parlayanqantam alkäbu wiyarqö, peru manam allitatsu parlayan.
Mana allikunata rurayanqampitaqa manam arrepentikuyantsu
y manam, ‘¿imatataq rurëkantsik?’+ nir tapukuyantsu.
Guërraman cörreq cawallukunanömi wakinkuna rurayanqanllata kutin kutin rurayan.
7 Cigüëñapis musyanmi ima tiempuchö juk sitiuman ëwanampaq kaqta.
Tsënöllam kullkush, vencëju y tordu* pishqukunapis
pärayanqan sitiuman ima tiempuchö kutiyänampaq kaqta musyayan.
Peru sirwimaqnïkunaqa manam musyayantsu noqa Jehovä pëkunata imë juzganäpaq kaqta”’.+
8 ‘¿Tsënö këkarku qamkunaqa, “yachaqmi kayä
y Teyta Jehoväpa leyninkunatam* katsiyä” niyanki? Rasumpa kaqchöqa, leyta qellqaqkunapis*
mana rasumpa kaqta qellqayänanllapaqmi lapicërunkunata utilizäyashqa.+
9 Yachaq nunakunapis penqakuychömi ushayashqa.+
Alläpam mantsakäyanqa, y trampakunamanmi ishkiyanqa.
¡Rikäyë! Pëkunaqa noqa Jehovä ninqätam
mana kaqpaq churayashqa, ¿tsëtsuraq yachaq kayanman?
10 Ichikpis jatumpis jukkunata engañarmi imatapis tariyan,+
willakoqkuna y sacerdötikunapis wakinkunatam engañayan.+
Tsëmi warminkunatapis
y chakrankunatapis jukkunatana entregashaq.+
11 Pëkunaqa sirwimaqnïkunapa herïdankunata* jananllapa jampeqnömi
yamë mana këkäyaptimpis,
“¡Yamëmi këkantsik! ¡Allim këkantsik!”+ nir engañayan.
12 ¿Penqakuyanku imëka melanëpaqkunata rurayanqampita?
¡Pëkunaqa manam ichikllapis penqakuyantsu!
¡Manam penqakuy ima kanqantapis musyayantsu!+
Pëkunata castigaptïqa ishkirmi ushayanqa
y wakinkunanöllam pëkunapis wanuyanqa o wañuyanqa’+ ninmi Teyta Jehovä.
13 ‘Juntëkurqa llapankunatam ushakätsishaq.
Üvas plantachöpis manam üvas quedanqatsu
y hïgus plantachöpis manam hïgus quedanqatsu, y raprankunapis tsakirmi ushakärinqa.
Tsënömi pëkunapis llapan entreganqäta oqrayanqa’ ninmi Teyta Jehovä”.
14 “¿Imatataq këchö rurëkantsik?
Juntakäshun, y murallashqa markakunaman yëkur tsëchö ushakäshun.+
y ushakätsimäshunmi.
15 Yamë këta shuyashqapis mana allikunallam chämushqa.
Jampishqa këtam shuyarqantsik, peru alläpa mantsakashqam usharquntsik.+
16 Dan kinrëchömi cawallunkuna büllayanqan wiyakan.
Padrïllu cawallunkuna büllayaptinqa entëru patsam kuyun.
Chikeqninkuna charqa entëru nacionta,
tsëchö llapan kaqkunatam ushakätsiyan.
Awmi, kikin markata y tsë markachö kawaq nunakunatapis llapantam ushakätsiyan”.
17 “¡Rikäyë! Qamkunamanmi venënuyoq y wanutsikoq culebrakunata mandëkämü.
Tsë culebrakunataqa manam ima rurëta puëdiyankitsu,
y kanirmi ushayäshunki” ninmi Teyta Jehovä.
18 Llakikuynïtaqa manam ni imapis ushakätsintsu,
y shonqüchöpis alläpam nanatsikü.
19 Karu nacionchö këkaq warmi tsurï cuenta marka mayïkuna
rogakur mañakuyanqanmi kënö wiyakan:
“¿Manaku Sionchö Teyta Jehovä këkan? ¿Manaku tsëchö gobernaqnin këkan?”.
“¿Imanirtan rurayanqëki santukunata
y juk nacion nunakuna adorayanqan santukunata
adorar cöleratsiyämarqunki?”.
20 “Cosëcha tiempu y usya tiempupis pasarishqanam,
peru noqantsikqa manam salvashqatsu karquntsik”.
21 Warmi tsurï cuenta marka mayïkuna+
imëkapa pasayanqanta rikarmi alläpa llakishqa këkä.
Awmi, alläpa mantsakashqam këkä.
22 ¿Manaku Galaadchöqa+ ima balsamullapis* kan?
¿Manaku tsëchö doctorkuna* kan?+
¿Imanirtan tsurï cuenta marka mayïkunata jampiyashqaraqtsu?+