Jeremïas
43 Jeremïasqa Jehovä Diosninkuna llapan ninqantam llapan nunakunata willarqan. Awmi, Jehovä Diosninkuna llapan ninqantam pëkunata willarqan. Y willar ushariptinnam, 2 Hosäyapa tsurin Azarïas, Carëahpa tsurin Johanan,+ y wakin allish tukoq nunakunaqa Jeremïasta kënö niyarqan: “Jehovä Diosnïkunaqa manam, ‘ama Egiptuman kawaq ëwayëtsu’ nishurqunkitsu. Qamqa mana rasumpa kaqtam nikäyämanki. 3 Nerïaspa tsurin Barucmi+ tsënö niyämänëkipaqqa nishurqunki. Pëqa Caldëa nunakunapa makinchö ushayänäta, pëkuna wanutsiyämänanta y Babiloniaman apayämänantam munan”.+
4 Tsënö nirmi, Carëahpa tsurin Johanan, soldädukunata mandaqkuna y llapan nunakuna, Jehovä ninqankunata cäsukuyarqantsu, y manam Judä kinrë markakunachö quedakuyarqantsu. 5 Tsëpa rantinqa, Carëahpa tsurin Johanan y soldädukunata mandaqkunaqa, mëtsëman qeshpir ëwakuyanqampita Judä kinrëman kutimoq nunakunata pusharkurmi, Egiptuta ëwakuyarqan.+ 6 Awmi, soldädukunata mandaq Nebuzaradan,+ Safanpa+ willkan y Ahicampa+ tsurin Guedalïaspa+ cargunchö dejanqan ollqukunata, warmikunata, wamrakunata, gobernaqpa warmi tsurinkunata y llapan nunakunata aparkurmi ëwakuyarqan. Tsënöllam Diospa willakoqnin Jeremïasta y Nerïaspa tsurin Baructapis apakuyarqan. 7 Teyta Jehovä ninqanta mana cäsukurmi, Egiptuchö këkaq Tahpanhes markayaq chäyarqan.+
8 Tahpanhes markachö këkaptinnam, Teyta Jehoväqa Jeremïasta parlapar kënö nirqan: 9 “Tahpanhes markachö, Egiptuchö gobernaqpa wayin frentinman ëwar, Judäpita nunakuna rikëkäyaptin, ladrïllupita pïsunchö jatusaq ruminkunata mezclawan tsaparkuy. 10 Tsëpitana pëkunata kënö nï: ‘Israel nunakunapa Diosnin angelkunata mandaq Teyta Jehovämi këta nin: “Babiloniachö gobernaq sirwimaqnï Nabucodonosortam qayatsimushaq+ y tsapatsinqä rumikuna jananchö gobernar täkunanta churanantam permitishaq. Tsë rumikuna jananchömi, alläpa shumaq carpanta* armanqa.+ 11 Babiloniachö gobernaq shamurqa, Egiptuchö nunakunawanmi pelyanqa.+ Wakin nunakunam wanutsikoq qeshyawan wanuyanqa, wakintanam juk nacionman apayanqa, y wakintanam espädawan ushakätsiyanqa.+ 12 Pëqa Egiptuchö adorayanqan santukunapa templuntam ninawan ushakätsinqa.+ Wakin santunkunatapis ninawanmi ushakätsinqa, y wakintanam nacionninman apakunqa. Mitsikoq nuna aqshunanta* fäcil-lla aqshukunqannömi, Babiloniachö gobernaqpis, Egiptupita nunakunata fäcil-lla venciskir kushishqa* ëwakunqa. 13 Egiptu nacionchö këkaq Bet-Sëmes* markachö llapan columnakunatam ushakätsinqa. Egiptuchö adorayanqan santukunapa templunkunatam, ninawan ushakätsinqa”’”.