Isaïas
2 Këchömi qellqarëkan Judächö y Jerusalenchö nunakunata ima pasanampaq kaqta Amozpa tsurin Isaïas revelacionchö rikanqan:+
2 Ushanan junaqkunachöqa,
Teyta Jehoväpa wayin këkanqan jirkam
wakin jirkakunapitapis mas alli patsakashqa kanqa.+
Taksha jirkakunapitapis mas jatunmi kanqa,
tsëmanmi mëtsë nacionpita nunakuna ëwayanqa.+
3 Llapan nacionpita nunakunam tsëman ëwar niyanqa:
“Aku, Teyta Jehoväpa wayin kanqan jirkaman witsäshun.
Jacobpa Diosnimpa wayinman ëwashun.+
Pëmi mandamientunkunata yachatsimäshun,
y noqantsiknam pë munanqannö kawashun”.+
Sionpitam Teyta Dios mandakunqankunata willakayämunqa,
y Jerusalenpitam Teyta Jehovä parlanqankunapita yachatsikayämunqa.+
4 Pëmi mëtsë nacionpita nunakunapaq jueznin kanqa,
y mëtsë markakunachömi imëka mana allikunata correginqa.
Manam juk nacion nunakuna juk nacion nunakunawan
pelyayänampaq espädankunata aptayanqanatsu,
y manam guërrachö pelyayänampaq yachakuyanqanatsu.+
5 Jacobpa kastankuna,
Teyta Jehovä mandakunqannö kawashun.+
6 Jacobpa kastan sirwishoqnikikunaqa,
inti o rupay jeqanan läduchö nunakunapa costumbrinkunatam qatiyan.+
Filistëapita nunakunanömi magiata rurayan
y markankunachöqa juk nacion nunakunapa tsurinkunam mëtsika kan,
tsëmi qamqa Teyta Dios pëkunata dejarqunki.+
7 Markankunachöqa plätapis örupis mëtsikam kan,
y väleq cösasninkunapis mana yupëta puëdipaqmi.
Cawallunkunapis mëtsikam kan,
y guërrapaq carrëtankunapis mana yupëta puëdipaqmi.+
8 Markankunachöqa mëtsëchömi
imapaqpis mana sirweq santukuna kan,+
y kikinkuna rurayanqan santukunatam adorayan.
9 Tsënömi Jacobpa kastankunaqa,
imapaqpis mana väleq kayanqanta rikätsikuyan.
Tsëmi pëkunataqa imëpis perdonankinatsu.
10 Teyta Jehovä cöleranqanta
y puëdeq kanqanta mantsar qaqachö uchkuman yëkuyë
y patsata uchkur tsëman yëkuyë.+
11 Orgullösu kaqkuna y allish tukoq kaqkunapis
penqakatsishqam kayanqa.
Tsë junaqqa, llapan nunakunapis Teyta Jehovällatam alabayanqa.
12 Tsë tiempuqa angelkunata mandaq Teyta Jehovämi,+
orgullösukunata y allish tukoqkunata
reqishqa o mana reqishqa kayaptimpis castiganqa.+
13 Tsë tiempuqa Lïbanuchö jatusaq cedrukunapis
y Basanchö robli qerukunapis,
14 jatusaq jirkakunapis
y taksha jirkakunapis,
15 jatusaq törrikuna y alli rurashqa murällakunapis castïgutam chaskiyanqa.
17 Orgullösu kaqkuna y allish tukoq kaqkunapis
penqakatsishqam kayanqa.
Tsë junaqqa, llapan nunakunapis Teyta Jehovällatam alabayanqa.
18 Imapaqpis mana sirweq santukunaqa llapanmi ushakäyanqa.+
19 Teyta Jehovä cöleranqanta y puëdeq kanqanta mantsarmi+
nunakunaqa qaqakunachö uchkukunaman yëkuyanqa+
y patsata uchkurmi tsëman yëkuyanqa.
Tsë tiempuqa patsata kuyutsirmi nunakunata mantsakätsinqa.
20 Tsë tiempuqa, llapan nunakunam adorayänampaq rurayanqan
plätapita y örupita mana imapaqpis sirweq santunkunata,
21 Tsëtaqa rurayanqa Teyta Jehovä cöleranqanta
y puëdeq kanqanta mantsar, qaqakunachö uchkukunaman
y jatusaq qaqakunapa chowpinchö* uchkukunaman yëkuyänampaqmi.
Tsë tiempuqa patsata kuyutsirmi nunakunata mantsakätsinqa.
22 Qamkunapa biennikikunapaq ama wanoqlla o wañoqlla nunaman confiakuyëtsu.
Pëkunaqa jamaninnö ushakaqllam kayan.
Tsëqa, ¿imanirtan nunata cuentaman churankiman?