Josuë
14 Tsë sitiukunam israelïtakuna Canaanchö chaskiyanqan markakuna karqan. Tsëtaqa entregayarqan sacerdöti Eleazar, Nunpa tsurin Josuë y Israelchö kastakunata dirigeqkunam.+ 2 Moisesta Jehovä Dios mandanqannömi, Israelchö isqun kastakunata+ y Manasespa pullan kastankunata sorteupa herenciankuna entregayarqan.+ 3 Wakin ishkë kastakunata y Manasespa pullan kastankunataqa, Moisesmi Jordan mayupa*+ wak tsimpanchö* herenciankuna entregashqa karqan. Peru Levïpa kastankunataqa manam herenciankuna entregarqantsu.+ 4 Josëpa tsurinkuna Manaseswan Efrainmi,+ Israelchö ishkë kastaman tikrayarqan.+ Levïpa kastankunaqa manam ima herenciatapis chaskiyarqantsu, pëkunaqa täkuyänampaq* markakunallata+ y animalninkunapaq qewayoq sitiukunallatam chaskiyarqan.+ 5 Tsënömi israelïtakunaqa, ëka kayanqanmannö herenciankuna chaskiyarqan. Tsënö entregayänampaqmi Jehovä Diosqa Moisesta mandashqa karqan.
6 Guilgalchö+ këkarmi, Judäpa kastankuna Josuëman ëwayarqan. Y quenizïta* Jefunëpa tsurin Calebmi+ Josuëta kënö nirqan: “Qamqa wiyarqëkim Cades-Barnëachö+ këkashqa, Jehovä Diosnintsik+ sirweqnin Moisesta ishkantsikpaq ima ninqanta.+ 7 Kë markakunata rikapakunapaq Cades-Barnëapita Jehoväpa sirweqnin Moises mandamanqantsik witsanqa, cuarenta watayoqllaran karqä.+ Y kutiramurqa, rasumpa kaqllatam willakurqä, manam imatapis ulikurqätsu o llullakurqätsu.+ 8 Noqantsikwan ëwaqkuna willakuyanqanwan israelïtakunata mantsakätsishqa kayaptimpis, noqaqa Jehovä Diosnintsik mandakunqantam llapan shonqüwan rurarqä.+ 9 Tsë junaqmi Moisesqa kënö änimarqan: ‘Llapan purimunqëki markakunam qampaq y wamrëkikunapaq imëyaqpis kanqa. Qamqa Jehovä Diosnintsik mandakunqantam llapan shonquykiwan rurarqunki’.+ 10 Israelïtakuna tsunyaq jirkachö këkäyaptin+ Moisesta Jehovä Diosnintsik äninqannöllam,+ Teyta Jehoväqa kë cuarenta y cincu watakuna kawanäta permitimashqa,+ kananqa ochenta y cincu watayoqna këkarpis këchömi këkä. 11 Rikapakoq ëwanapaq Moises mandamanqantsik witsanchönömi, kanampis kallpayoqllaraq këkä. Guërraman ëwanäpaq y juk cösaskunata ruranäpaqpis kallpäqa këkanllaran. 12 Tsëmi shamurqö tsë junaq Jehovä Diosnintsik änimanqannölla, kë jirkachö markakunata entregamänëkipaq. Qamqa wiyarqëkim Anaquim nunakuna,+ tsë alli murallashqa markakunachö kawayanqanta.+ Segürum këkä Teyta Jehovä yanapamänampaq kaqta+ y Jehovä änimanqannölla tsë markakunapa duëñun tikranäpaq kaqta”.+
13 Tsëmi Josuëqa Jefunëpa tsurin Calebta bendicïkunampaq Teyta Diosman mañakurqan. Y Hebron markatam herenciatanö entregarqan.+ 14 Quenizïta Jefunëpa tsurin Calebqa, Israelpa Diosnin Jehovä mandakunqantam llapan shonqunwan rurarqan. Tsëmi Hebron markaqa, kananyaqpis pëta pertenecin.+ 15 Hebron markapa unë jutinqa Quiryat-Arbämi+ karqan (Arbäqa anaquim nunakunachö reqishqa nunam karqan). Y tsëpita witsëpaqa, mananam tsë markakunachö guërra karqannatsu.+