1 Rëyes

6 Chusku watapa gobernëkarmi Salomonqa, Ziv* killachö+ (o watapa ishkë kaq killanchö) Jehovä Diospaq wayita* ruratsir qallarqan.+ Tsë witsampaqqa, cuatrocientus ochenta watanam pasashqa karqan israelïtakuna* Egiptupita yarqayämunqampita.+ 2 Jehovä Diospaq Salomon ruratsinqan templupa largunqa veintisiëti metrusmi* karqan, anchunnam isqun metru* karqan y altunnam trëci metrus* pullanyoq karqan.+ 3 Templuman yëkuna pasadïzupa+ anchunnam isqun metru* karqan y largunnam chusku metru pullanyoq* karqan.

4 Salomonqa, ventänakunatapis rëjayoqtam+ ruratsirqan. 5 Y templupa ishkan lädunchö y Alläpa Sagrädu Cuartupa qepanchömi cuartukunata ruratsirqan,+ tsë cuartukunataqa templupa perqanman laqëllapam ruratsirqan.+ 6 Tsë cuartukunaqa kima pïsuyoqmi karqan. Patsa kaq pïsuchö cuartukunapa anchunqa ishkë metru masmi* karqan, ishkë kaq pïsuchö cuartukunapa anchunqa cäsi kima metrum* karqan y kima kaq pïsuchö cuartukunapa anchunqa kima metrum* karqan. Tsë cuartukunata rurayänampaqqa, templuta perqarllanam grädakunata rurayarqan, tsënöqa rurayarqan terrädukunata churar templupa perqanta uchkuyta mana munarmi.+

7 Templuta rurayänampaqqa llaqllashqallatanam rumikunata apayarqan.+ Tsëmi templuta rurayaptinqa ni martilluwan ni hächawan takayanqan, ni ima herramientawan cincelayanqampis wiyakarqantsu. 8 Patsa kaq pïsuchö cuartukunaman yëkuyänampaqqa, templupa derëcha kaq lädumpam punku karqan.+ Y ishkë kaq y kima kaq pïsuman witsäyänampaqqa ruripanam tumëpa tumaq escalëra karqan. 9 Templuta perqar usharatsirqa+ terrädukunatam churatsirqan y terrädu janampam cedru tablakunawan+ entablatsirqan. 10 Tsëpitanam templupa ishkan lädunchö y qepanchö cuartukunata ruratsirqan.+ Y cada pïsupam altunqa ishkë metru mas* karqan. Tsë cuartukunataqa cedru terrädukunawanmi templuman laqëllapa ruratsirqan.

11 Tsë witsanmi Salomonta Jehovä Dios kënö nirqan: 12 “Leynïta, mandakunqäkunata y ninqäkunata cumpliptikiqa+ papäniki Davidta äninqätam cumplishaq.+ Y shäritsinqëki wayichö 13 karmi llapan Israel nunakunata yanapashaq+ y manam imëpis dejashaqtsu”.+

14 Salomonqa templuta ushëkätsirqannam. 15 Templu rurimpaqa entëru perqamanmi, terrädupita qallëkur patsayaq cedru tablata churatsirqan. Y pïsuntanam enebru tablawan+ entablatsirqan. 16 Tsëpitanam templu rurinchö isqun metruta* cedru tablawan rakitsirqan y tsëchömi Alläpa Sagrädu Cuartuta ruratsirqan.+ 17 Alläpa Sagrädu Cuartupita+ waqtaman kaq cuartuqa* dieciöchu metrusmi* medirqan. 18 Y tsë cuartuman churatsinqan cedrupita tablakunachömi, calabäzukunata+ y wëtakunata ruratsirqan.*+ Tsëmi perqayanqan rumikunaqa ni jukllëllapis rikakarqantsu.

19 Jehoväpa Sagrädu Cäjan+ churaränampaqmi Salomonqa Alläpa Sagrädu Cuartuta*+ alistatsirqan. 20 Tsë cuartupa largunqa isqun metrum* medirqan, anchumpis isqun metrum* medirqan y altumpis isqun metrum* medirqan.+ Y chipapänampaqmi entëru cuartuman alli kaq öruta laqatsirqan y altarmampis* entërumpam cedru tablata churatsirqan.+ 21 Salomonqa sagrädu kaq cuartutapis chipapänampaqmi alli kaq öruta laqatsirqan, y Alläpa Sagrädu Cuartupa+ yëkunanmanmi örupita cadënakunata warkutsirqan. Sagrädu kaq cuartumampis+ chipapänampaqmi entërunman öruta laqatsirqan. 22 Tsënömi templu rurintaqa chipapänampaq entërunman öruta laqatsirqan, y Alläpa Sagrädu Cuartupa lädunchö këkaq altartapis+ chipapänampaqmi entërunman öruta laqayarqan.

23 Alläpa Sagrädu Cuartuman churatsinampaqmi, pïnu* qerupita ishkë querubin angelkunata+ ruratsirqan. Tsë querubinkunapa altunqa chusku metru pullanmi* karqan.+ 24 Querubin angelpa älankunaqa cada ünum ishkë metru mas* karqan. Y juk kaq älampa puntampita, juk kaq älampa puntanyaqqa chusku metru pullanyoqmi* karqan. 25 Juknin querubin angelpa älampis chusku metru pullanyoqmi* karqan. Ishkan querubinkunapis tsë niraqlla y tsë tamäñullam kayarqan. 26 Juk kaq querubinpa altunqa chusku metru pullanyoqmi* karqan, tsë tamäñullam juk kaq querubinpis karqan. 27 Tsëpitanam Salomonqa tsë ishkan querubinkunata+ Alläpa Sagrädu Cuartuman churatsirqan. Juk kaq querubinpa mashtarëkaq juknin älanqa juk kaq lädu perqamanmi topaq, tsënöllam juk kaq querubinpa juknin älampis juk kaq lädu perqaman topaq. Y juk kaq älankunanam chowpichö* topaq. 28 Tsë ishkan querubinkunatam chipapänampaq entërumpa öruwan laqatsirqan.

29 Sagrädu cuartupa y Alläpa Sagrädu Cuartupa entëru perqankunachömi querubin angelkunata,+ palmërakunata+ y wëtakunata+ ruratsirqan.* 30 Ishkan cuartukunapa pïsunkunamannam chipapänampaq öruta jichayarqan. 31 Alläpa Sagrädu Cuartuman yëkuna punkukuna, columnankuna y marcumpis pïnu qerupitam karqan. Tsë cuartupaqa pitsqam perqankuna karqan y juk kaqmi yëkunan karqan.* 32 Ishkan punkukunam pïnupita karqan, tsëchömi querubin angelkunata, palmërakunata y wëtakunata ruratsirqan,* y querubin angelkunata y palmërakuna chipapänampaqmi öruta laqatsirqan. 33 Templuman yëkuna punkupa marcuntapis pïnu qerupitam ruratsirqan, tsëqa këkarqan juk kaq perqachömi.* 34 Y ishkan punkukunatam enebru qerupita ruratsirqan y cada punkum ishkë höjayoq karqan. Punkukuna kichakar tumanampaqqa+ umbralchö y jawanchömi* uchkukuna karqan. 35 Tsë punkukunachömi querubin angelkunata, palmërakunata y wëtakunata ruratsirqan* y chipapänampaqmi jananman öruta laqatsirqan.

36 Tsëpitanam ichik patiuta corralatsirqan+ kima hilëra llaqllashqa rumikunawan y jananmannam juk hilëra cedru qeruta churatsirqan.+

37 Salomonqa chusku watapa gobernëkarmi, Ziv* killachö Jehovä Diospa wayimpaq cimientuta churatsir qallarqan.+ 38 Y onci watapa gobernëkarnam, Bul* killachö (o watapa puwaq kaq killanchö), imanö ruranampaq plänu ninqantanölla ruratsir usharqan.+ Qanchis watatam templuta ushatsirqan.