2 Crönicas

9 Teyta Dios yanapaptinmi Salomonqa alläpa yachaq karqan. Tsëta musyarirmi Säba* markachö gobernaq warmiqa+ imëkata tapupänampaq Jerusalenta ëwarqan. Pukutaq o mushkoq aceitita, cuestaq shumaq rumikunata y mëtsika örutam+ camëllukunawan cargashqa atska yanapaqninkunawan Jerusalen markaman charqan. Tsëchömi llapan pensanqanta gobernanti Salomonta tapuparqan.+ 2 Salomonqa llapan tapunqantam contestarqan. Pëpaqqa llapan tapunqampis fäcil-llam karqan.

3 Säba markachö gobernaq warmiqa, Salomon+ yachaq kanqanta y palaciu wayita ruratsishqa kanqanta rikarmi alläpa espantakurqan.+ 4 Tsënöllam espantakurqan alli allita mikuyanqanta,+ sirweqninkuna imanö jamakuyanqanta, mikuy sirwikoqkunata, vistikuyanqanta, vïnu sirwikoqkunata y vistikuyanqanta, animalkunata pishtëkur Jehovä Diospaq templuchö seguïdu+ rupatsiyanqanta rikarnin. 5 Tsëmi gobernanti Salomonta kënö nirqan: “Imëka ruranqëkikunata* y yachaq kanqëkita nacionnïchö willayämanqanqa rasumpam kanaq. 6 Tsënö willëkäyämaptimpis kikï rikarninran creirqö.+ Kananmi musyarï willayämanqampitapis mas yachaq kanqëkita.+ 7 Yachaq kar shumaq parlapanqëkita wiyarnin, ¡ima kushishqaraq yanapashoqnikikuna y sirwishoqnikikunapis kayan! 8 Jehovä Diosniki alabashqa këkullätsun. Jehovämi kuyashurniki Israelchö imëyaqpis gobernanëkipaq churashurqunki. Israelïtakunata kuyarmi+ alli gobernanëkipaq churashurqunki”.

9 Tsënö nirmi cuatru mil cientu cuatru kïlus* öruta,+ pukutaq o mushkoq mëtsika aceitita y cuestaq rumikunata qararqan. Säba markachö gobernaq warmi, Salomonta qaranqan mëtsika aceititanöqa manam imëpis Israelman apayarqannatsu.+

10 Ofir+ sitiupita öruta apamoq Hirampa sirweqninkunawan Salomonpa sirweqninkunaqa, cuestaq shumaq rumikunata+ y sandalu qerutapis mëtsikatam apayämurqan. 11 Tsë sandalu qerukunapitam Salomonqa, Jehovä Diospa templunchö+ y palaciu wayichöpis escalonkunata+ ruratsirqan. Tsënöllam cantaqkunapaq arpakunata y cuerdayoq instrumentukunatapis ruratsirqan.+ Tsënö mëtsika sandalu qerutaqa, manam imëpis Jerusalen markachö rikashqatsu kayarqan.

12 Säba markachö gobernaq warmitam Salomonqa llapan mañakunqanta qararqan, apamunqampitapis mastam qararqan. Tsëpitanam tsë warmiqa sirweqninkunawan markanta kutikurqan.+

13 Cada watam Salomonqa chaskirqan veintidos mil setecientus setenta y siëti kïlus* öruta.+ 14 Impuestutapis negociuyoq nunakunapita, ärabe gobernantikunapita y Israel nacionchö gobernadorkunapitam öruta y pläta metalta chaskirqan. Tsënöllam kikimpa negociantinkunapis imëkata chätsiyaq.+

15 Gobernanti Salomonqa öruman juk metalkunata takurkurmi doscientus jatusaq escüdukunata ruratsirqan+ (cada escüduchömi cäsi qanchis kïlunö* juk metalkunawan takushqa öru karqan).+ 16 Tsënöllam öruman juk metalkunata takurkur trescientus taksha escüdukunata ruratsirqan (cada escüduchömi ishkë kïlunö* öru karqan). Tsëpitanam Lïbanu Monti niyanqan wayiman churatsirqan.+

17 Tsënöllam Salomonqa gobernar täkunan sïllantapis marfilpita* rurëkatsir alli kaq öruwan laqatsirqan.+ 18 Tsë sïllapa cada lädunchömi rikran jamanampaq örupita rurashqa karqan y tsë lädunchömi ruratsinqan leonkuna+ churararqan. Y sïllaman chänampaqqa joqta grädakunam karqan. 19 Cada grädapa ishkan kuchunchömi ishkë leonkuna churararqan, y llapanqa döci leonkunam+ karqan. Manam ni pï gobernantipapis tsënöqa kapurqantsu. 20 Gobernanti Salomonpa cöpankunaqa llapampis örupitam karqan, tsënöllam Lïbanu Monti niyanqan wayichö utilizanqan cösaskunapis alli kaq örupita karqan. Salomon gobernanqan witsanqa pläta metaltaqa mana valeqtanömi rikäyaq, tsëmi pläta metalpitaqa imatapis ruratsirqantsu.+ 21 Salomonpa barcunkunam Hirampa+ sirweqninkunawan Tarsista+ ëwar, cada kima watata öruta, pläta metalta, marfilta,*+ mönukunata y pävu realkunata Salomonpaq apayämoq.

22 Salomonqa entëru patsachö gobernantikunapitapis mas kapoqyoq y mas yachaqmi karqan.+ 23 Tsëmi Teyta Dios yachaqta tikratsishqa kanqanta musyarir, parlanqanta wiyëta munar mëtsëpita gobernantikuna ëwayaq.+ 24 Tsënö ëwarmi örupita y pläta metalpita rurashqa cösaskunata qarayaq. Tsënöllam apayaq röpakunata,+ armakunata, pukutaq o mushkoq aceitita, cawallukunata y mulakunatapis. Salomonqa cada watam tsëkunata chaskeq. 25 Salomonqa mëtsika carrëtayoq y döci mil cawalluyoqmi*+ karqan, y cawallunkunapa corralnimpis cuatru milmi karqan. Tsëkunataqa katsirqan carrëtakunata churayänan markakunachö y Jerusalen markachömi, palaciupa amänunchö.+ 26 Eufratis mayupita* filisteu nunakunapa markankunayaq y Egiptupa lindërunkunayaq mandakoq gobernantikunatam, Salomonqa mandädunchö katsirqan.+ 27 Jerusalenman Salomonpaq apayanqan pläta metalqa lluta ruminömi mëtsika karqan, y cedru qerupis Sefelächö sicömoru hïgus montikunanömi mëtsika karqan.+ 28 Y Egiptupita+ y wakin nacionkunapitam Salomonpaq cawallukunata apayämoq.

29 Salomon ruranqankunapita+ y yachaq kanqampitaqa, qallanampita ushananyaqmi Teyta Diospa willakoqnin Natan+ qellqanqanchö y silonïta Ahïya+ willakunqanchö qellqarëkan. Tsënöllam Nebatpa tsurin Jeroboanpaq+ Diospa willakoqnin Idö+ rikanqankunachö qellqarëkan. 30 Salomonqa Jerusalen markachömi cuarenta watapa israelïtakunata gobernarqan. 31 Tsëpitanam Salomonqa wanukurqan, y David Marka niyanqanmanmi pampayarqan. Tsëqa papänimpa markanmi karqan.+ Tsëpitanam tsurin Rehoboam gobernar qallëkurqan.+