Josuë
11 Hazor markachö gobernaq Jabinmi, tsë llapan pasakunqanta musyaskirqan. Tsëmi willakoqkunata mandarqan Madon markachö gobernanti+ Jobabman, Simron markachö gobernantiman, Acsaf markachö gobernantiman,+ 2 jirkakunapa lädunkunachö* këkaq markakunachö gobernantikunaman, Kinëret lädun* pampakunachö* gobernantikunaman, Sefelächö gobernantikunaman, Dor markapa lädun* ladërakunachö+ gobernantikunaman, 3 inti o rupay yarqamunan y jeqanan läduchö cananeu nunakunaman,+ amorreu nunakunaman,+ hitïta nunakunaman, perizïta nunakunaman, jirkakuna lädunchö jebuseu nunakunaman y Hermon jirka+ chakinchö këkaq Mizpächö mandakoq heveu nunakunaman.+ 4 Tsënam pëkunaqa lamar kuchunchö arënanöraq yupëtapis mana puëdipaq mëtsika soldädunkunawan, mëtsika cawallunkunawan y guërrapaq carrëtankunawan ëwayarqan. 5 Tsë llapan gobernantikunam juntakäyarqan, y israelïtakunawan pelyayänampaqmi Merom marka lädumpa pasaq yaku kuchunchö campamentunkuna rurayarqan.
6 Tsënam Jehovä Diosqa Josuëta kënö nirqan: “Ama pëkunata mantsëtsu.+ Warë kënö höram, llapankunata wanutsiyänëkipaq entregayashqëki. Cawallunkunapa ankunkunatam roqukacharkuyänëki+ y guërrapaq carrëtankunamanmi ninata prendïkunëki”. 7 Tsënam Josuëwan soldädunkunaqa, Merom marka lädumpa pasaq yaku kuchunman illaqpita chëkur pëkunawan pelyar qallëkuyarqan. 8 Israelïta soldädukunaqa Jehovä Dios yanapaptinmi llapankunata wanutsiyarqan o wañutsiyarqan.+ Qeshpir ëwaqkunatapis, jatun Sidon markayaq,+ Misrefot-Mäim sitiuyaq+ y Mizpë* pampayaqmi qatipayarqan. Llapankunatam wanutsiyarqan, manam ni jukllëllatapis kawëkaqtaqa dejayarqantsu.+ 9 Tsëpitanam Josuëqa Jehovä Dios mandanqannölla, cawallunkunapa ankunkunata roqukacharkurqan y guërrapaq carrëtankunaman ninata prendïkurqan.+
10 Tsëpitanam, Josuëqa kutïkurnin Hazor markaman yëkurqan, y gobernantitam espädawan wanuratsirqan.+ Tsë läduchö gobernantikuna mandakuyanqan markakunapitaqa, Hazor markam mas reqishqa karqan. 11 Tsë markachö llapan nunakunatam espädawan wanutsiyarqan,+ manam ni jukllëllatapis kawëkaqtaqa dejayarqantsu.+ Tsëpitanam Josuëqa Hazor markaman ninata prendïkurqan. 12 Tsë gobernantikuna mandakuyanqan markakunaman yëkuskirmi, Josuëqa gobernantinkunata espädawan wanutsirqan.+ Jehoväpa sirweqnin Moises mandanqannömi, tsë markakunachö llapan nunakunata wanutsirqan.+ 13 Tsënö kaptimpis, jirkankunachö këkaq markakunamanqa, manam israelïtakuna ninata prendiyarqantsu. Hazor markallamanmi Josuëqa ninan prendïkurqan. 14 Israelïtakunaqa tsë markakunachö llapan täkoqkunatam espädawan wanutsiyarqan,+ manam ni jukllëllatapis kawëkaqtaqa dejayarqantsu.+ Cösasninkunatawan animalninkunataqa, kikinkunapaqmi apakuyarqan.+ 15 Teyta Jehovä llapan mandanqantam Moisesqa Josuëta mandarqan,+ y Josuënam Moises ninqannölla Jehovä Dios llapan mandakunqanta rurarqan.+
16 Josuëqa, jirkakuna kanqan läduchö, Nëguebchö,+ Gosenchö, Sefelächö,+ Arabächö,+ Israelpa jirkankunachö y ichikllan jirkankunachö markakunapa duëñunmi tikrarirqan. 17 Seir jirka lädunmampa këkaq Halac jirkapita hasta Lïbanu pampachö këkaq Baal-Gad+ markayaqmi duëñu tukurqan. Lïbanuqa Hermon jirkapa+ chakinchömi këkan. Tsë entëru markakunachö gobernantikunatam prësurqan y wanutsirqan. 18 Josuëqa atska tiempupam tsë gobernantikunawan guërrachö karqan. 19 Gabaonchö+ kawaq heveu nunakunallam, israelïtakunawan alli kawakuyänampaq acuerduta rurayarqan. Tsëpita kaqqa, manam ni mëqan markapis pëkunawan acuerduta rurarqantsu. Tsëmi israelïtakunaqa guërrata rurarnin tsë markakunapa duëñun tikrayarqan.+ 20 Jehovä Diosmi tsë markakunachö nunakuna chukru shonqu tikrayänanta dejarqan,+ tsënöpa israelïtakunawan guërrata rurayaptin ushakätsinampaq.+ Moisesta Jehovä mandanqannömi, pëkunataqa llapanta ushakätsiyänan karqan.+
21 Tsë witsanmi Josuëqa, jirkakuna kanqan läduchö, Hebron markachö, Debir markachö, Anab markachö, Judäpa jirkankunachö y Israelpa jirkankunachö kawaq llapan Anaquim nunakunata+ y markankunata ushakätsirqan.+ 22 Israelïtakuna kawayanqan markakunachöqa, manam Anaquim nunakuna karqannatsu. Pëkunaqa Gäza,+ Gat+ y Asdod+ markakunallachönam quedayarqan.+ 23 Moisesta Teyta Jehovä äninqannöllam,+ Josuëqa tsë entëru markakunapa duëñun tikrarqan. Tsëpitanam cada ünuta tocanqanmannö, Israelchö llapan kastakunata herenciankuna entregarqan.+ Tsëpitaqa manam tsë markakunachö guërra karqannatsu.+