Levïticu

12 Tsëpitanam Teyta Jehoväqa Moisesta kënö nirqan: 2 “Israelïtakunatam këta ninëki: ‘Juk warmi killanwan karninqa, manam Teyta Diospa rikënimpaq limpiutsu kanqa. Tsënöllam ollqu wamran yuriptimpis, qanchis junaqpa Teyta Diospa rikënimpaq limpiutsu kanqa.+ 3 Y yurinqampita puwaq junaq pasariptinmi, tsë wamrata ishpakunampa puntanchö señalatsiyänan.+ 4 Tsëpitanam wamran yuriptin yawarnin ëwanqampita, treinta y tres junaqpa Teyta Diospa rikënimpaq limpiutsu kanqa. Tsë tiempuqa, manam Teyta Diosta adorarnin utilizäyanqan cösaskunata yatanantsu ni sagrädu sitiuman yëkunantsu.

5 Wamran warmi kaptinqa, catorci junaqpam killanwan kaptin pasanqannölla Teyta Diospa rikënimpaq limpiutsu kanqa. Tsëpitaqa wamran yuriptin yawarnin ëwanqampitam, sesenta y seis junaqpa Teyta Diospa rikënimpaq limpiutsu kanqa. 6 Ollqu o warmi wamran yurinqampita Teyta Diospa rikënimpaq yapë limpiuna quedarqa, carpa* wayipa yëkunanmanmi Teyta Diospaq ushakanqanyaq rupatsina qarëpaq juk watayoq carnëruta apanan,+ y jutsampita* perdonashqa kanampaqmi llullu palumata o kullkushta apar sacerdötita entreganan. 7 Tsënam sacerdötiqa, tsë warmi jutsampita* perdonashqa kanampaq tsë apanqan qarëkunata Teyta Diospaq rupatsinqa. Tsënöpam wamran yuriptin yawarnin ëwanqampita Teyta Jehoväpa rikënimpaq limpiuna kanqa. Teyta Diosnintsik mandakunqannömi, juk warmipa ollqu o warmi wamran yuriptin rurayänëki. 8 Üshata rantita mana puëdirninqa, ishkë kullkushta o ishkë llullu palumatam+ Teyta Diospaq apanan. Juk kaqmi ushakanqanyaq rupatsina qarë kanqa, y juknin kaqnam jutsampita* perdonashqa kanampaq qarë kanqa. Sacerdöti tsëkunata Teyta Diospaq rupatsiptinmi, tsë warmiqa Teyta Diospa rikënimpaq limpiuna kanqa’”.