Levïticu

11 Tsëpitanam Teyta Jehoväqa Moisestawan Aaronta kënö nirqan: 2 “Israelïtakunatam këta niyänëki: ‘Patsachö kawaq animalkunapitaqa, këkunam mikuyänëkipaq kanqa:+ 3 Ishkë shilluyoq kaqkuna* y mikuyanqan qewata kutipaq kaqkuna.

4 Peru mikuyanqanta kutipayaptimpis mana ishkë shilluyoq kayaptinqa, manam tsë animalkunata mikuyänëkitsu. Tsënöllam ishkë shilluyoq kayaptimpis mikuyanqanta mana kutipaq animalkunataqa mikuyänëkitsu. Camëlluqa mikunqanta kutiparpis manam ishkë shilluyoqtsu, tsëmi mikuyänëkipaqqa limpiutsu kanqa.+ 5 Daman* animalpis,+ mikunqanta kutiparpis manam ishkë shilluyoqtsu, tsëmi mikuyänëkipaq limpiutsu kanqa. 6 Conëjupis mikunqanta kutiparpis manam ishkë shilluyoqtsu, tsëmi mikuyänëkipaq limpiutsu kanqa. 7 Kuchipis+ ishkë shilluyoq karpis* manam mikunqanta kutipantsu, tsëmi mikuyänëkipaq limpiutsu kanqa. 8 Manam tsë animalkunapa ëtsanta mikuyänëkitsu ni wanuyaptimpis o wañuyaptimpis yatayänëkitsu. Tsë animalkunaqa manam mikuyänëkipaq limpiutsu kayanqa.+

9 Yakuchö kawaq pescädukunataqa, lamarchö kawayaptin o mayuchö* kawayaptimpis, alëtayoq y escämayoq kaqkunallatam mikuyänëki.+ 10 Peru lamarchö o mayuchö* kawaq mana alëtayoq o mana escämayoq kaqkunaqa, y grüpuchö pureq ichikllan animalkunaqa, qamkunapaq melanëpaqmi kanqa. 11 Tsë pescädukuna qamkunapaq melanëpaq kaptinmi ëtsantapis mikuyänëkitsu.+ Y tsë pescädukunapa ayampis qamkunapaqqa melanëpaqmi kanqa. 12 Yakuchö kawaq mana alëtayoq o mana escämayoq pescädukunaqa, qamkunapaqqa melanëpaqmi kanqa.

13 Kë pishqukunam qamkunapaq melanëpaq kanqa, y manam mikuyänëkitsu: pichakta,*+ pescädu mikoq pichakta, yana wiskurta,*+ 14 puka halconta,* tukuyläya yana halconta,* 15 tukuyläya cuervuta 16 avestruzta, lechüzata, gaviötata, tukuyläya halconta,* 17 jatun tukuta, taksha tukuta, guanay niyanqan yaku pätuta, 18 cisnita, pelïcanuta, condorta, 19 cigüëñata, tukuyläya garzata, abubïllata ni tsiktsita. 20 Tsënöllam chuskun chakinwan pureq älayoq imëka kurukunapis qamkunapaqqa melanëpaq kanqa.

21 Chusku chakiwan pureq älayoq tukuyläya kurukunapitaqa, saltayänampaq jatun chankayoq kaqkunallatam mikuyänëki. 22 Kë kurukunam mikuyänëkipaq kanqa: tukuyläya saltaq kurukuna+ y chukllushkuna.* 23 Tsënö kaptimpis, chusku chakiwan pureq älayoq wakin kurukunaqa, qamkunapaqqa melanëpaqmi kanqa. 24 Tsë kurukunata mikurqa, manam rikënïpaq limpiutsu kayanki. Y wanushqata yatarqa, tardiyanqanyaqmi rikënïpaq limpiutsu kayanki.+ 25 Mëqëkipis tsë wanushqa kurukunata patsapita pallarqa,* röpëkikunatam taqshayänëki,+ y tardiyanqanyaqmi rikënïpaq limpiutsu kayanki.

26 Shillunkuna chowpinchö ëtsayoq kayaptin y mikunqanta mana kutipayaptinqa, ishkë shilluyoq kayaptimpis, manam tsë animalkunaqa mikuyänëkipaq limpiutsu kayanqa. Tsë animalkunata yatarqa, manam rikënïpaq limpiutsu kayanki.+ 27 Chusku chakiyoq karpis shilluyoq animalkunaqa, manam mikuyänëkipaq limpiutsu kayanqa. Tsë animalkunata yatarqa, tardiyanqanyaqmi rikënïpaq limpiutsu kayanki. 28 Mëqëkipis tsë wanushqa o wañushqa animalkunata yatarqa, röpëkikunatam taqshayänëki,+ y tardiyanqanyaqmi rikënïpaq limpiutsu kayanki.+ Tsë animalkunaqa manam mikuyänëkipaq limpiutsu kayanqa.

29 Grüpu grüpu päraq ichishaq animalkunapitaqa, këkunam mikuyänëkipaq limpiutsu kayanqa: patsata uchkoq räta, ukush,+ tukuyläya arash, 30 gëcu niyanqan, jatun arash, yakuchö kawaq arash, salamandra niyanqan y camaleon niyanqan. 31 Tsë llapan ichisaq animalkunaqa, manam mikuyänëkipaq limpiutsu kayanqa.+ Tsë animalkunata yatarqa, tardiyanqanyaqmi rikënïpaq limpiutsu kayanki.+

32 Tsë animalkuna wanurnin, matiman, putuman, röpa jananman, qaratsaman o chukru tëla jananman jeqaptinqa, manam tsë cösaskunaqa rikënïpaq limpiunatsu kayanqa. Imatapis seguïdu utilizäyanqëkiman winakaptinqa, yakuchömi awiyänëki,* y tardiyanqanyaqmi rikënïpaq limpiutsu kanqa, tsëpitaqa limpiunam kanqa. 33 Tsë animalkuna wanurnin, allpa mankaman winakaptinqa, mankachö llapan winaraqmi rikënïpaq limpiunatsu kanqa, y tsë mankatam pakir ushakätsiyänëki.+ 34 Tsë mankachö yaku ima mikuymampis chaptinqa, manam tsë mikuy rikënïpaq limpiunatsu kanqa. Y tsë mankachö imapis upunapaq kaptinqa, tsë upunapaq kaqpis manam rikënïpaq limpiutsu kanqa. 35 Tsë animalkuna wanurnin, hornuman o tullpaman jeqaptinqa, tsë hornu o tsë tullpaqa, manam imëpis rikënïpaq limpiunatsu kanqa. Tsëmi ushakätsiyänëki. 36 Y pukyuman o pözuman jeqaptinqa, tsë yakuqa limpiullam kanqa. Peru mëqëkipis tsë wanushqa animalkunata yatarqa, manam rikënïpaq limpiunatsu kayanki. 37 Tsë animalkuna wanurnin, muruyänëkipaq rakiyanqëki muruman jeqaptinqa, tsë muruqa limpiullam kanqa. 38 Peru ushmatsiyanqëki muruman jeqaptinqa, manam tsë muruqa rikënïpaq limpiunatsu kanqa.

39 Mikuyänëkipaq kaq animalpa ayanta yatarqa, tardiyanqanyaqmi rikënïpaq limpiutsu kayanki.+ 40 Tsë wanushqa animalpa imanllatapis mikurqa o ayanta apakurqa, röpëkikunatam taqshayänëki, y tardiyanqanyaqmi rikënïpaq limpiutsu kayanki.+ 41 Grüpu grüpu pureq tukuyläya animalkunaqa qamkunapaq melanëpaqmi kanqa,+ y manam mikuyänëkitsu. 42 Melanëpaq kayaptinmi, kë animalkunataqa mikuyänëkitsu:+ lätëpa pureq animalkunata, chuskun chakinwan pureq animalkunata, grüpu grüpu pureq tukuyläya animalkunata y atska chakiyoq animalkunata. 43 Rikënïpaq limpiu këta munarqa, manam tsë animalkunata mikuyänëkitsu.+ 44 Noqam Jehovä Diosnikikuna kä,+ noqaqa limpiu Diosmi kä.+ Tsëmi qamkunaqa imëkachöpis limpiu y sagrädu kayänëki .+ Rikënïpaq imëpis limpiu kayänëkipaqmi, grüpu grüpu pureq tukuyläya animalkunataqa mikuyänëkitsu. 45 Noqa Jehovämi qamkunapa Diosnikikuna kanäpaq, Egiptu nacionpita pushamurqä.*+ Y noqa limpiu kaptïmi,+ qamkunapis imëkachö limpiu kayänëki.+

46 Kë mandakunqänömi patsachö kawaq animalkunawan, pishqukunawan, yakuchö kawaq animalkunawan y grüpu grüpu pureq animalkunawan rurayänëki. 47 Tsënömi musyayanki ima animalkuna limpiu o mana limpiu kanqanta, mikuyänëkipaq o mana mikuyänëkipaq kanqantapis’”.+