Levïticu
10 Tsëpitanam Aaronpa tsurinkuna Nadabwan Abihüqa,+ inciensu winakunaman ninata winarkur+ Teyta Jehoväpaq inciensuta rupëkätsiyarqan. Tsënö kaptimpis, manam Teyta Dios mandakunqannötsu rurëkäyarqan.+ 2 Tsëmi Teyta Jehoväpita nina yarqur pëkunata rupar ushakätsirqan,+ y Teyta Jehoväpa rikëninchömi wanuyarqan o wañuyarqan.+ 3 Y Moisesqa Aarontam nirqan: “Teyta Jehovämi këta nishqa: ‘Noqaman witimoq kaqkunaqa, limpiu Teyta Dios kanqätam yarpäyänan,+ y qamkunapa puntëkikunachömi alläpa puëdeq kanqäta rikätsikushaq’”. Moises tsënö niptinmi Aaronqa imatapis nirqannatsu.
4 Tsënam Moisesqa, Aaronpa tiyun Uzielpa tsurinkuna Misaelta y Elzafanta qayëkatsir+ nirqan: “Kastëkikunata carpa* wayipa patiumpita jipiyë, y campamentupita karuman apayë”. 5 Tsëmi pëkunaqa Moises mandanqannölla kastankunapa ayankunata largu röpankuna vistishqallata campamentupita karuman apayarqan.
6 Tsëpitanam Moisesqa Aaronta y Aaronpa tsurinkuna Eleazarta y Itamarta kënö nirqan: “Qamkunapis mana wanuyänëkipaq o wañuyänëkipaq, y israelïtakunawan Teyta Diosnintsik mana cölerakunampaqmi aqtsëkikunata shumaq naqtsakuyänëki, y manam llakikur röpëkikunata rachiyänëkitsu.+ Teyta Jehovä ninawan wanutsinqan kastëkikunapaqqa, israelïta mayintsikkunallam waqayanqa. 7 Teyta Jehoväqa sagrädu aceitiwanmi akrayäshurqunki, tsëmi mana wanuyänëkipaq carpa* wayipita yarquyänëkitsu”.+ Pëkunaqa Moises ninqannöllam rurayarqan.
8 Tsëpitanam Teyta Jehoväqa Aaronta kënö nirqan: 9 “Carpa* wayïman yëkurqa, mana wanuyänëkipaqmi qam ni tsurikikunapis vïnuta o imatapis machatsikoqtaqa upuyänëkitsu.+ Kë mandakunqätaqa qam, tsurikikuna y tsëpita yureq tsurikikunapis cäsukuyänëkim. 10 Tsënöpam musyayanki ima sagrädu kanqanta y ima mana sagrädu kanqantapis, ima limpiu kanqanta y ima mana limpiu kanqantapis.+ 11 Y noqa Jehovä sirwimaqnï Moiseswan mandakunqätam israelïtakunata yachatsiyänëki”.+
12 Tsëpitanam Moisesqa Aaronta y tsurinkuna Eleazarta y Itamarta kënö nirqan: “Teyta Jehoväpaq rupatsiyänampaq apayämunqan harina sobranqanwanqa, mikuyänëkipaq levadürannaq tantakunata rurayë.+ Tsë sobraq harinaqa alläpa sagrädum kanqa.+ 13 Tsë harinapita rurayanqëki tantataqa sagrädu sitiuchömi mikuyänëki.+ Teyta Diosmi tsënö rurayänëkipaq mandakushqa. Teyta Jehoväpaq rupatsiyänampaq apayämunqan harinapita sobranqanqa, qampaq y tsurikikunapaqmi imëpis kanqa. 14 Y puntaman y qepaman kuyutsiyanqëki animalpa pëchunta y chankantaqa, qam y tsurikikunam limpiu sitiuchö mikuyänëki.+ Teyta Dioswan amïgu kayanqanta rikätsikur israelïtakuna apayämunqan animalkunapitaqa, tsë ëtsakunatam qampaq y tsurikikunapaq Teyta Dios dispunishqa.+ 15 Israelïtakunam tsë animalpa chankanta, pëchunta y rupatsiyänëkipaq wirata apayämunqa. Tsëtaqa, puntaman y qepaman Teyta Jehoväpa rikëninchö kuyutsiyänëkipaqmi apayämunqa. Tsë animalpa pëchun y chankanqa, Teyta Jehovä mandakunqannöllam, qamkunapaq y tsëpita yureq tsurikikunapaq imëpis kanqa”.+
16 Moisesqa, israelïtakuna jutsankunapita* perdonashqa kayänampaq apayanqan chïvupa* sobraq ëtsantam wakpa këpa ashirqan,+ y Teyta Diospaq rupëkatsishqa kayanqantam musyarirqan. Tsëmi Aaronpa tsurinkuna Eleazarwan y Itamarwan cölerakurnin kënö nirqan: 17 “Jutsankunapita* perdonashqa kayänampaq apayämunqan animalpita sobraq ëtsaqa alläpa sagrädum. Tsëqa, ¿imanirtaq sagrädu sitiuchö mikuyarqunkitsu?+ Tsëtaqa qamkunapaqmi Teyta Jehovä dispunishqa, tsë ëtsata mikuyaptiki israelïtakuna jutsata rurayanqampita perdonashqa kayänampaq. 18 Y qamkunaqa manam tsë animalpa yawarninta carpa* wayiman apayarqunkitsu.+ Tsë ëtsataqa, Teyta Diosnintsik mandakunqannöllam carpa wayipa patiunchö* mikuyänëki kashqa”. 19 Tsënam Aaronqa Moisesta nirqan: “Israelïtakunaqa jutsankunapita* perdonashqa kayänampaq qarëta y ushakanqanyaq rupatsina qarëkunatam Teyta Jehoväpaq apayämushqa,+ peru kanan junaqqa imëka mana allikunapam pasarqö. Tsënö këkarnin apayämunqan ëtsata mikuptïqa, ¿Teyta Jehoväpa rikënimpaq allitsuraq kanman karqan?”. 20 Aaron tsënö niptinmi Moisesqa imatapis nirqannatsu.