Josuë
6 Israelïtakuna mana yëkuyänampaqmi, Jericö markaqa alli segurashqa karqan. Tsëmi ni pï yëkoqtsu ni pï yarqoqtsu.+
2 Tsëpitanam Jehovä Diosqa Josuëta kënö nirqan: “Jericö markata, gobernantinta y guërrapaq valienti soldädunkunata ushakätsinëkipaqmi qamta entregarqoq.+ 3 Llapëki valienti soldädukunam, marka waqtampa juk kuti tumayänëki. Tsëtaqa joqta junaqpam rurayänëki. 4 Qanchis sacerdötikunam carnërupa waqrankunata aptashqa, Sagrädu Cäjapa puntanta ëwayänan. Y qanchis kaq junaqqa, qanchis kutim tsë marka waqtampa tumayänëki y sacerdötikunam carnërupa waqranta tocayänan.+ 5 Carnërupa waqranta tocayanqanta* wiyaskirmi, llapan soldädukuna guërrachö këkaqnö fuertipa büllayänan. Tsëmi Jericö markapa murällankuna ishkirinqa+ y këkäyanqan lädupam llapan soldädukuna markaman yëkuyänan”.
6 Tsënam Nunpa tsurin Josuëqa, sacerdötikunata qayëkatsir nirqan: “Jehovä Diospa Sagrädu Cäjanta+ hombrurkur apayë, y carnërupa waqrankunata aptashqa qanchis sacerdötikuna Sagrädu Cäjapa puntata ëwayätsun”. 7 Tsëpitanam soldädukunata nirqan: “Ëwar marka waqtampa tumayämuy y armayoq wakin soldädukunaqa,+ Teyta Jehoväpa Sagrädu Cäjampa puntanta ëwayë”. 8 Josuë ninqannöllam qanchis sacerdötikunaqa, Jehoväpa Sagrädu Cäjampa puntanta, carnërupa waqrankunata tocarëkar ëwayarqan, y qepankunatanam Teyta Jehoväpa Sagrädu Cäjanta apayarqan. 9 Armayoq wakin soldädukunaqa, carnërupa waqrankunata mana pärëpa tocaq sacerdötikunapa puntantam ëwayarqan y wakin soldädukunanam Sagrädu Cäjapa qepanta ëwayarqan.
10 Josuëqa kënö nirmi soldädukunata mandashqa karqan: “Ama qapariyankitsu,* ama imatapis parlayankitsu ni büllayankitsu, ‘¡qapariyë!’ niyanqaqyaq, tsëran fuertipa qapariyänëki”. 11 Tsënam Josuë mandakuptin, Jehovä Diospa Sagrädu Cäjanta Jericö marka waqtampa juk kuti tumatsiyämurqan. Tsëpitanam campamentuman kutikuyarqan y tsëchömi waräyarqan.
12 Waränin junaqnam, Josuëqa patsa manaraq waraptin shärikurqan y sacerdötikunam Jehovä Diospa Sagrädu Cäjanta+ hombrurkuyarqan. 13 Tsënam carnërupa waqranta mana pärëpa tocaq qanchis sacerdötikuna, Jehoväpa Sagrädu Cäjampa puntanta ëwar qallëkuyarqan. Tsë sacerdötikunapa puntantam, armayoq wakin soldädukuna ëwayarqan y wakinnam Teyta Jehoväpa Sagrädu Cäjan qepanta ëwayarqan. 14 Tsë junaqpis Jericö marka waqtampam tumayarqan, y tsëpitanam campamentuman kutikuyarqan. Tsënöllam joqta junaqpa rurayarqan.+
15 Qanchis kaq junaqpis patsa waräriptinllam shärikuyarqan y tsë marka waqtampam qanchis kuti tumayarqan. Tsë junaqllam marka waqtampaqa qanchis kuti tumayarqan.+ 16 Qanchis kutipa tumar ushariyaptinnam, sacerdötikuna carnërupa waqrankunata toquëkäyaptin, soldädukunata Josuë kënö nirqan: “¡Qapariyë,+ Jehovä Diosmi ushakätsiyänëkipaq kë markata entregayäshurqunki! 17 Kë markata y tsëchö llapan tariyanqëkitam ushakätsiyänëki;+ llapampis Jehovä Diospam. Peru qellëpaqrëkur jukwan jukwan kakoq* Rahabta,+ y wayinchö këkaqkunataqa manam wanutsiyänëkitsu. Pëqa rikapakoq shamoqkunatam wayinchö pakarqan.+ 18 Y ushakätsinapaq nimanqantsik cösaskunataqa ama rikapäyankitsu,+ tsënöpa munapar mana quedatsikuyänëkipaq.+ Tsëta rurarqa, ushakëman y imëka mana allikunamanmi llapan israelïtakunata chätsiyanki.+ 19 Peru pläta metal, öru, y cobripita y fiërrupita rurashqa cösaskunaqa, Jehovä Diospaqmi kanan.+ Teyta Jehoväpa väleq cösasninkuna këkanqan wayimanmi apayänëki”.+
20 Tsëpitanam, carnërupa waqranta toquëkäyanqanta wiyaskir, soldädukunaqa fuertipa qapariyarqan.+ Tsë höram Jericö markapa murällan ishkirirqan.+ Tsëpitanam soldädukunaqa, këkäyanqan lädupa yëkur markata duëñu tukuriyarqan. 21 Tsë markachö llapankunatam espädawan ushakätsiyarqan: ollqukunata, warmikunata, jövinkunata y edäyashqakunata, tsënöllam törukunata, üshakunata y ashnukunatapis ushakätsiyarqan.+
22 Tsëpitanam Josuëqa ishkan rikapakoqkunata kënö nirqan: “Qellëpaqrëkur jukwan jukwan kakoq* warmipa wayinta ëwëkur, äniyanqëkinö pëta, familiankunata y sirweqninkunata pushayämuy”.+ 23 Tsënam ishkan rikapakoq jövinkunaqa, Rahabpa wayinta ëwër pëta, papäninta, mamäninta, turinkunata, llapan familiankunata+ y sirweqninkunata pushayämurqan. Awmi, llapan familiantam pushayämurqan y juk següru sitiumanmi apayarqan. Tsë sitiuqa israelïtakuna këkäyanqan campamentupa amänunchömi karqan.
24 Tsëpitanam tsë markaman y tsëchö tariyanqan llapan cösaskunaman ninata prendïkuyarqan. Peru pläta metalta, öruta, y cobripita y fiërrupita rurashqa cösaskunataqa, Teyta Jehoväpa väleq cösasninkunata churayänan wayimanmi apayarqan.+ 25 Y qellëpaqrëkur jukwan jukwan kakoq* Rahabta, familiankunata, sirweqninkunata y papänimpa familiantaqa, manam Josuë wanutsirqantsu;+ kananyaqmi Rahabqa Israelchö kawakun.+ Pëqa Jericö markaman Josuë mandanqan rikapakoqkunatam pakarqan.+
26 Tsë kutichömi Josuëqa kënö cläru parlarqan:* “Jehovä Diospa jutinchömi këta nï: Jericö markata sharkatseq nunaqa, maldicishqam kanqa. Kë markapa cimientunta churanqan höram mayor wamran wanunqa o wañunqa, y kë markapa punkunta churanqan höram, ultimu wamrampis wanunqa”.+
27 Tsënömi Jehovä Diosqa Josuëta yanaparqan+ y mëtsëchömi pëpita musyariyarqan.+