1 Corintius
1 Teyta Dios munaptin Cristu Jesuspa apostolnin+ kanäpaq akrashqa noqa Pablupita, y wawqintsik Sostenispita, 2 Corintuchö kawaq Teyta Diosman creikoqkunapaq.+ Qamkunaqa limpiuyätsishqam kayarqunki, y Cristu Jesuswanmi juknölla këkäyanki.+ Pëqa mëtsëchö Señornintsik Jesucristuta chaskeqkunawan juntu limpiu nuna* kayänëkipaqmi akrayäshurqunki.+ Jesucristuqa pëkunapa y noqantsikpa Señornintsikmi:
3 Teytantsik Dios y Señornintsik Jesucristu qamkunawan alläpa alli këkuyätsun y yamë kayänëkipaq yanapëkuyäshuy.
4 Cristu Jesusrëkurmi Teyta Diosqa qamkunawan alläpa alli kashqa, tsëmi qamkunapita Teyta Diosnïta imëpis agradecikü. 5 Cristuwan juknölla kayaptikim, qamkunataqa parlëta yachayänëkipaq, llapantapis alli musyayänëkipaq y imëkawan Teyta Dios bendiciyäshurqunki,+ 6 Cristupita willakuyanqanta+ qamkunachö alli patsätsinqannölla. 7 Tsëmi Señornintsik Jesucristu rikakunanta llapan shonquykikunawan shuyarar këkäyanqëkiyaqqa, ima wanayanqëkipis* pishipuyäshunkitsu.+ 8 Señornintsik Jesucristu shamoq tiempuchö shamuptin imapitapis mana acusashqa kayänëkipaqmi, pëqa ushananyaq alli tsarakoqta tikratsiyäshunki.+ 9 Teyta Diosqa confiakuypaqmi.+ Pëmi Tsurin Señornintsik Jesucristuwan juknölla* kayänëkipaq qayayäshurqunki.
10 Kananqa wawqikuna y panikuna, Señornintsik Jesucristupa jutinchömi rogayaq rasun kaqllata parlayänëkipaq, y rakikashqa mana kayänëkipaq,+ sinöqa llapëkipis juk yarpëlla y juk pensëyoqlla kayänëkipaq.+ 11 Cloepa wayimpita wakin kaqkunam musyatsiyämashqa, wawqilläkuna y panilläkuna, qamkuna contranakur këkäyanqëkita. 12 Këtaqa niyaq* cada ünu kënö nir kayaptikim: “Noqaqa Pablupa qateqninmi kä”. “Noqaqa Apöluspa qateqninmi kä”.+ “Noqanam Cëfaspa* qateqnin kä”. “Y noqanam Cristupa qateqnin kä”. 13 ¿Cristuqa rakikashqaku këkan? ¿Manam Pablutsu qamkunarëkur qeruchö wanurqan, aw? ¿O Pablupa jutinchöku bautizashqa kayarqunki? 14 Teyta Diostam agradecikü mëqëkitapis mana bautizayanqaqpita, sinöqa Crisputawan+ Gäyullatam.+ 15 Tsënöpa mëqëkipis jutïchö bautizashqa kayanqëkita mana niyänëkipaq. 16 Rasunmi Estëfanaspa wayimpita kaqkunatapis bautizarqämi.+ Peru tsëpita masqa, manam mëqëkitapis bautizayanqaqta yarpätsu. 17 Cristuqa manam bautizanäpaqtsu mandamarqan, sinöqa alli noticiakunata willakunäpaqmi,+ peru manam yachaq nunakuna parlayanqannö parlar willakunäpaqtsu,* tsënöpa Cristupa sufrimientu qerun* mana kaqchö mana ushanampaq.
18 Rasumpa kaqchöqa, ushakëman ëwëkaqkunapaqqa sufrimientu qerupita parlëqa,+ manam imapaqpis välintsu, peru noqantsikpaq, awmi, salvashqa kaqkunapaqqa, Teyta Diospa poderninmi.+ 19 Kënömi qellqarëkan: “Yachaq nunakunapis manam yachaqtsu kayanqa, y imëkata musyaq nunakuna yachaq kayanqantapis mana kaqpaqmi churashaq”.*+ 20 ¿Mëchötan yachaq nuna këkan? ¿Mëchötan Ley qellqaq* këkan? ¿Mëchötan kanan witsanchö* discutita yachaq nuna këkan? ¿Manaku Teyta Diosqa nunakuna yachaq kayanqanta mana kaqpaq churashqa? 21 Teyta Diospa yachënimpaqqa, kë munduchö nunakunaqa manam imëkata yachayanqanwan Diosta reqita puëdiyarqantsu,+ tsëmi Teyta Diosqa nunakuna mana kaqpaq churayanqan noticiakunawan+ creeq kaqkunata salvashqa.
22 Judïukunaqa milagrukunatam mañakuyan,+ y griëgu nunakunam yachaq këta ashiyan. 23 Peru noqantsikqa Cristu qeruchö wanunqantam willakuntsik. Tsëqa judïukunapaq trompizatsikoq ruminömi,* y juk nacion nunakunapaqnam imapaqpis mana väleqnö.+ 24 Tsënö kaptimpis, qayashqa kaqkunapaqqa, judïu kayaptin o griëgu kayaptimpis, Cristuqa Teyta Dios puëdeq y yachaq kanqantam rikätsikun.+ 25 Nunakuna imapaqpis mana sirweqtanö rikäyanqan Teyta Diospa kaqmi, nunakunapita mas yachëyoq y kallpannaqtanö rikäyanqanmi, nunakunapita mas kallpayoq.+
26 Wawqikuna y panikuna, qamkunaman, awmi, qayashqa kaqkunaman pensariyë: nunakunapa rikënimpaq yachaqkunaqa manam atskaqtsu kayan+ ni alläpa puëdeqkunapis manam atskaqtsu kayan ni reqishqa familiachö yureqkunapis manam atskaqtsu kayan.+ 27 Sinöqa nunakuna imapaqpis mana sirweqtanö churayanqantam, Teyta Diosqa yachaq kaqkunata penqakatsinampaq akrashqa, y nunakunapa rikënimpaq kallpannaq kaqkunatam, Teyta Diosqa fuerti kaqkunata penqakatsinampaq akrashqa.+ 28 Teyta Diosqa väleqpaq churayanqan kaqkunata mana kaqpaq churanampaqmi, nunakuna mana kaqpaq churayanqan kaqkunata y despreciayanqan kaqkunata akrashqa, awmi, mana väleqpaq churayanqan kaqkunatam akrashqa,+ 29 tsënöpa Diospa rikëninchö ni pï mana alabakunampaq. 30 Teyta Diosrëkurmi qamkunaqa Cristu Jesuswan juknölla këkäyanki. Pëqa Teyta Dios yachaq y allita ruraq kanqantam rikätsikun.+ Përëkurmi Diospa rikëninchö limpiu këta puëdintsik,+ y jutsapita* salvamänapaq wanushqa kaptinmi salvakuyta puëdintsik.+ 31 Tsënöpa kënö nir qellqarëkanqannö kanampaq: “Pï nunapis alabakuyta munarqa, Jehoväta* reqinqampita alabakutsun”.+