Jeremïas
38 Matanpa tsurin Sefatïas, Pasjurpa+ tsurin Guedalïas, Selemïaspa tsurin Jucal+ y Malkïyapa tsurin Pasjurmi, markachö nunakunata Jeremïas kënö nikanqanta wiyayarqan: 2 “Teyta Jehovämi këta nin: ‘Kë markachö quedakoqkunataqa espädawanmi ushakätsiyäshunki, y mallaqëkipita y qeshyawanmi wanuyanki.+ Peru Caldëapita soldädukunaman entregakurqa, kawarmi sïguiyanki y wanur ushakäyänëkipitam salvakuyanki’.+ 3 Teyta Jehoväqa kënöpis ninmi: ‘Babiloniachö gobernaqpa soldädunkunapa makinmanmi kë markata entregashaq, y Babiloniachö gobernaqqa kë markatam duëñutsakunqa’”.+
4 Dirigeqkunam gobernaqta kënö niyarqan: “Kë nunata wanutsiyänampaq mandakuy.+ Kë nunaqa kë markachö quedaq soldädukunata y llapan nunakunatam willakunqanwan mantsakëkätsin. Pëqa manam kë markachö yamë kë kananta munantsu, sinöqa imëka mana allikuna pasakunantam munan”. 5 Tsënam gobernaq Sedequïasqa nirqan: “Rikäyë, makikikunachömi këkan. Pëwan imata rurëta munayaptikipis, noqaqa manam michäkuyta puëdïtsu”.
6 Tsënam pëkunaqa, Soldädukunapa Patiun+ niyanqanchö këkaq gobernaqpa tsurin Malkïyapa pözunman, Jeremïasta waskawan kacharpuyarqan. Tsë pözu rurinchöqa leqitallam karqan, y manam yaku karqantsu. Tsëmi Jeremïasqa tsë leqitachö hundikar qallëkurqan.
7 Gobernaqpa palaciunchö* carguyoq* Etiopïapita Ëbed-Mëlecmi,+ Jeremïasta pözuman jitarkushqa kayanqanta musyaskirqan. Y gobernaqqa, Benjamin Punku niyanqanchömi tëkarqan.+ 8 Tsënam Ëbed-Mëlecqa, gobernaqpa palaciumpita yarqëkamur gobernaqta kënö nirqan: 9 “¡Señorllä gobernaq, tsë nunakunaqa alläpa mana allitam, Diospa willakoqnin Jeremïaswan rurayashqa! Pëkunaqa pözumanmi jitarkuyashqa y entëru markachö tanta manana kaptinmi, tsëchöqa mallaqëpita wanunqa”.+
10 Tsënam gobernaqqa, Etiopïapita Ëbed-Mëlecta kënö nir mandarqan: “Treinta nunakunata pusharkur, pözuchö manaraq wanuptin, Diospa willakoqnin Jeremïasta jipimoq ëwë”. 11 Tsënam Ëbed-Mëlecqa, tsë nunakunata pusharkur gobernaqpa wayinman ëwarqan, y imëka väleqkuna churayänan cuartu jawampitam,*+ makwa ratashkunata y taksha tëlakunata apayarqan. Tsë ratashkunata waskawan watëkurmi, pözuchö këkaq Jeremïasman bajatsiyarqan. 12 Tsëpitanam Etiopïapita Ëbed-Mëlecqa Jeremïasta, “waska mana nanatsishunëkipaq, rikrëki rurinman tsë ratashkunata y taksha tëlakunata churakuy” nirqan. Y Jeremïasqa tsënömi rurarqan, 13 pëkunaqa waskawan sutarmi pözupita jipiyämurqan. Tsëpitaqa Soldädukunapa Patiun niyanqanllachönam Jeremïas prësurarqan.+
14 Tsëpitanam gobernaq Sedequïasqa, Teyta Jehoväpa wayinchö, kima kaq yëkunaman Jeremïasta qayëkatsir, “qamtam jukta tapuynikita munä, y rasumpa kaqta nimänëkitam munä” nirqan. 15 Tsënam Jeremïasqa Sedequïasta kënö nirqan: “Rasumpa kaqta nipteqqa wanutsimankim y qamta consejapteqpis manam cäsumankitsu”. 16 Tsënam Sedequïasqa Jeremïasta kënö nirqan: “Kawanantsikta permiteq Teyta Jehovä imëpis kawanqannöllam, qamtaqa manam wanutsishqëkitsu ni wanutsishuynikita munaq nunakunapa makinman entregashqëkitsu”.
17 Tsënam Jeremïasqa Sedequïasta nirqan: “Israel nunakunapa Diosnin, angelkunata mandaq Teyta Jehovämi këta nin: ‘Babiloniachö gobernaqpa dirigeqninkunaman entregakurqa kawarmi sïguinki, y manam kë markata ninawan ushakätsiyanqatsu, qampis y familiëkipis manam wanuyankitsu.+ 18 Peru Babiloniachö gobernaqpa dirigeqninkunaman mana entregakuptikiqa, kë entëru markam Caldëa nunakunapa makinchö ushanqa, pëkunaqa ninawanmi ushakätsiyanqa+ y qampis manam pëkunapita salvakunkitsu’”.+
19 Tsënam gobernaq Sedequïasqa Jeremïasta nirqan: “Caldëapita soldädukunata yanapaq judïukunatam alläpa mantsä. Caldëa nunakunapa makinman entregayämaptinqa, capazchi pëkunaqa alläpa mana alli tratayämanqa”. 20 Peru Jeremïasqa kënömi nirqan: “Manam pëkunapa makinman entregayäshunkitsu. Tsëmi rogakoq, Teyta Jehovä nishunqëkita wiyakunëkipaq y ninqaqkunata ruranëkipaq. Tsëta rurarqa, allim kanki y kawarmi sïguinki. 21 Peru mana entregakuptikiqa, Teyta Jehovämi këkuna pasanampaq kaqta nin: 22 Judächö gobernaqpa palaciunchö quedaq warmikunatam, Babiloniachö gobernaqpa dirigeqninkunaman apayanqa+ y tsë warmikunaqa kënö nirmi ëwayanqa:
‘Confiakuyanqëki nunakunam engañayäshurqunki y venciyäshurqunki.+
Pëkunapa culpanmi chakikikunapis leqitaman hundikashqa,
y kananqa tumaskirmi ëwakuyashqa’.
23 Llapan warmikikunata y tsurikikunatam Caldëa soldädukunata entregayanqa, qampis manam pëkunapa makimpita salvakunkitsu, sinöqa Babiloniachö gobernaqmi+ prësu apashunki y qampa culpëkim kë markäta ninawan ushakätsiyanqa”.+
24 Tsëpitanam Sedequïasqa Jeremïasta kënö nirqan: “Wanuyta o wañuyta mana munarqa, ama kë nimanqëkita pitapis willankitsu. 25 Dirigeqkuna qamwan parlanqäta musyëkur qamman shamur, ‘gobernaqta ninqëkita willëkayämë, ama noqakunapita imatapis pakëtsu y manam wanutsiyashqëkitsu,+ ¿y gobernaqqa imatataq nishurqunki?’ nir tapuyäshuptikiqa, 26 pëkunata kënö ninki: ‘Jehonatanpa wayinman kutitsiyämaptin tsëchö mana wanunapaqmi, tsëman mana kutitsiyämänampaq gobernaqta rogakurqö’”.+
27 Tiempu pasariptinnam dirigeqkunaqa Jeremïasta rikaq ëwayarqan y tapupäyarqan. Jeremïasqa gobernaq ninqanllatam nirqan. Y dirigeqkunaqa parlayanqanta mana wiyashqa karmi, masqa tapupäyarqannatsu. 28 Caldëa soldädukuna Jerusalenman yëkuyanqan witsanyaqmi, Jeremïasqa Soldädukunapa Patiun+ niyanqanchö prësurëkarqan. Awmi, Jerusalenman yëkuyanqan junaqpis tsëchömi këkarqan.+