Jeremïas
39 Sedequïas Judächö isqun watapana gobernëkaptin, chunka kaq killam, Babiloniata gobernaq Nabucodonosorqa, llapan soldädunkunawan Jerusalenman shayämurqan, y entëru lädunkunamanmi churakäyarqan.+
2 Sedequïas onci watapana gobernëkaptin, chusku kaq killa y isqun kaq junaqmi, murällankunata uchkur Jerusalenman yëkuyarqan.+ 3 Y Babiloniachö gobernaqpa llapan dirigeqninkuna markaman yëkurmi, Pullan Punku+ niyanqanchö täkuriyarqan. Tsëchöqa këkäyarqan, samgar carguyoq Nergal-Sarëzer, rabsaris carguyoq Nëbu-Sarsekim* y rabmag carguyoq* Nergal-Sarëzer y Babiloniachö gobernaqpa wakin dirigeqninkunam.
4 Tsëta rikëkurqa, Judächö gobernaq Sedequïas y llapan soldädukunam, gobernaqpa huertan kaqpa markapita qeshpir+ paqaspa ëwakuyarqan. Y ishkë murällakuna këkanqan punkupa yarqurmi, Arabäman ëwaq nänipa ëwakuyarqan.+ 5 Tsënö kaptimpis Caldëapita soldädukunaqa qepankunata ëwarmi, Jericö kinrë tsunyaq pampakunachö gobernaq Sedequïasta taripäyarqan,+ y prësurmi Babiloniachö gobernaq Nabucodonosorman apayarqan. Pëqa Hamat kinrëchö+ Riblä markachömi+ këkarqan. Tsëchömi Sedequïasta juzgar ima pasanampaq kaqta nirqan. 6 Tsë Riblä markallachömi Babiloniachö gobernaqqa, Sedequïas rikëkaptin llapan tsurinkunata wanutsiyänampaq mandakurqan. Tsënöllam Babiloniachö gobernaqqa, Judächö carguyoq nunakunata wanutsiyänampaq mandakurqan.+ 7 Sedequïastam wiskuyäratsir o qaprayäratsir y cobripita cadënawan watarkur Babiloniaman aparqan.+
8 Tsëpitanam Caldëapita soldädukunaqa, gobernaqpa wayinta* y nunakunapa wayinta ninawan ushakätsiyarqan.+ Tsënöllam Jerusalenpa murällankunatapis ushakätsiyarqan.+ 9 Soldädukunata mandaq Nebuzaradanqa,+ markachö quedaqkunata, pëkunaman qaqaqkunata y wakin quedaq nunakunatam, Babiloniaman aparqan.
10 Peru soldädukunata mandaq Nebuzaradanqa, waktsa kaqkunata y imannaq kaqkunatam, Judä kinrë markakunachö dejarqan. Tsë junaqmi, üvas chakrankuna y murukuyänampaq mas chakrankuna rikätsirqan.+
11 Babiloniachö gobernaq Nabucodonosorqa, soldädukunata mandaq Nebuzaradantam Jeremïaspaq kënö mandarqan: 12 “Jeremïasta asheq ëwë, y pëta cuidë. Ama imanankitsu, y llapan mañashunqëkita entreganki”.+
13 Tsënam soldädukunata mandaq Nebuzaradan, rabsaris carguyoq* Nebusazban, rabmag carguyoq* Nergal-Sarëzer y Babiloniachö gobernaqpa mandakoq nunankunaqa, 14 Soldädukunapa Patiun+ niyanqampita Jeremïasta jipiskatsimur, Safanpa willkan+ y Ahicampa tsurin+ Guedalïasta entregayarqan,+ y pëqa wayinmanmi apakurqan. Tsënömi Jeremïasqa tsë markachö nunakunawan kawarqan.
15 Soldädukunapa Patiunchö+ prësu këkaptinmi, Teyta Jehoväqa Jeremïasta parlapar kënö nirqan: 16 “Etiopïapita Ëbed-Mëlecman+ ëwar këta nï: ‘Israel nunakunapa Diosnin angelkunata mandaq Teyta Jehovämi këta nin: “Puntallapitana willakunqänömi kë markamanqa, imëka mana allikunata chätsimushaq, y allikunataqa manam apamushaqtsu, y ninqäkuna cumplikanqan junaqtaqa qampis rikankim”’.
17 ‘Peru tsë junaqqa noqam salvashqëki, y manam mantsanqëki nunakunapa makinchö ushankitsu’ ninmi Teyta Jehovä.
18 ‘Awmi, noqa salvapteqmi espädawan wanutsiyäshunkitsu, y noqaman confiakamushqa karmi, wanutsiyäshunëkipita salvakunki’+ ninmi Teyta Jehovä”.