Jeremïas

24 Judä nacionchö gobernaq Jehoiaquimpa+ tsurin Jeconïasta,*+ Judächö dirigeqkunata, imëkata rurë yachaqkunata y herrërukunata Babiloniachö gobernaq Nabucodonosor Jerusalenpita nacionninman apanqan witsanmi,+ Teyta Jehoväpa templun frentinchö ishkë canastachö hïguskunata rikarqä. Tsëtaqa kikin Teyta Jehovämi rikätsimarqan. 2 Juk kaq canastachöqa punta poqoq hïguskunanömi mikukuyllapaq hïguskuna karqan. Juknin kaq canastachöqa melanëpaq y mikuytapis mana munëpaqmi hïguskuna karqan.

3 Tsëpitanam Teyta Jehoväqa “Jeremïas ¿imatataq rikëkanki?” nir tapumarqan. Y noqanam nirqä: “Hïguskunatam rikëkä. Wakinqa mikukuyta munëllapaqmi kayan, y wakinnam melanëpaq y mikuytapis mana munëpaq kayan”.+

4 Tsëpitanam Teyta Jehoväqa kënö nimarqan: 5 “Israel nunakunapa Diosnin noqa Jehovämi këta nï: ‘Noqa permitiptï Caldëapita nunakuna nacionninkunaman apakuyanqan Judäpita nunakunatam tsë alli kaq hïgustanö rikäshaq. 6 Bienninkunapaqmi pëkunata cuidashaq, y kë markakunamanmi kutitsimushaq.+ Alli kawakuyänampaqmi yanapashaq y manam ushakätsishaqnatsu. Imatapis plantaqnömi cuidashaq y manam markankunapita qarqushaqnatsu.+ 7 Noqa Jehovä kanqäta musyayänampaqmi+ shonqunkunachö reqimëta munayänanta permitishaq. Y llapan shonqunkunawan noqaman kutiyämuptinmi pëkunapa Diosninkuna kashaq+ y pëkunanam sirwimaqnïkuna kayanqa.+

8 Peru melanëpaq y mana mikuytapis munëpaq hïguskunapaqmi+ Teyta Jehovä këta nin: “Judächö gobernaq Sedequïasta, dirigeqkunata,+ kë nacionchö quedakoq Jerusalenpita nunakunata y Egiptu nacionchö kawëkaq nunakunatam tsë mana alli hïguskunatanö rikäshaq.+ 9 Pëkunaman imëka mana allikunata apamunqäta rikarmi mëtsë nacionpita nunakunapis alläpa mantsakäyanqa.+ Nunakunaqa pëkunatam insultayanqa, pëkunapitam burlakuyanqa, mëtsëman apayanqanchömi maldicir ushayanqa,+ pëkunapaq parlarqa mana allichö ushayanqanllatam imëpis parlayanqa.+ 10 Pëkunata y unë kastankunata entreganqä markakunachö ushakäyanqanyaqmi espädawan wanutsiyänanta+ y mallaqëpita y qeshyawan wanuyänanta permitishaq”’”.+