Jeremïas
11 Jeremïastam Teyta Jehovä kënö nirqan: 2 “¡Sirwimaq nunakuna, acuerduta rurar ninqäkunata yarpäyë!
Judäpita y Jerusalenpita nunakunata tsëkunata willë,* 3 y kënö nï: ‘Israelpa Diosnin Teyta Jehovämi këta nin: “Kë acuerdu ninqanta mana cäsukoq nunaqa, maldicishqam kanqa.+ 4 Tsë acuerduchö ninqantaqa, hiërruta tsullutsiyänan+ hornuchönö Egiptu+ nacionchö këkäyanqampita pushamurmi, unë kastëkikunata kënö nir mandarqä: ‘Ninqäkunata cäsukuyaptiki y llapan mandakunqäkunata rurayaptikiqa, sirwimaqnïkunam kayanki y noqanam Diosnikikuna kashaq.+ 5 Tsëtaqa rurarqä, lichipis, mielpis mëtsika kanqan+ markakunata entreganäpaq* unë kastëkikunata jurar äninqäta cumplinäpaqmi, tsëtam kanan rikëkäyanki’”’”.
Tsënam noqaqa, “tsënö kallätsun* Teyta Jehovä” nirqä.
6 Tsënam Teyta Jehoväqa kënö nimarqan: “Judä markakunachö y Jerusalenpa cällinkunachö, kë llapan ninqäkunata willakuy: ‘Kë acuerduchö ninqankunata wiyakuyë y tsëkunata cäsukuyë. 7 Unë kastëkikunata Egiptupita jipimunqäpita kananyaqmi, “ninqäkunata wiyakuyë” nir kutin kutin pëkunata nirqö.+ 8 Peru pëkunaqa manam wiyayämarqantsu ni cäsuyämarqantsu. Tsëpa rantinqa, kutin kutinmi mana alli shonqunkuna ninqanta rurayarqan.+ Pëkunaqa manam mandakunqäkunata cäsukuyta munayarqantsu. Tsëmi tsë acuerduchö ninqannö pëkunata castigashaq’”.
9 Tsëpitanam Teyta Jehoväqa kënö nimarqan: “Judäpita y Jerusalenpita nunakunaqa, conträ kayänampaqmi yachatsinakuyashqa. 10 Pëkunaqa unë kastankunanöllam mandakunqäkunata cäsukuyta munayantsu,+ y imëkata rurarmi santukunata adorayashqa.+ Tsëkunata rurarmi, Israelpita y Judäpita nunakunaqa, unë kastankunawan ruranqä acuerduta cumpliyashqatsu.+ 11 Tsëmi noqa Jehovä këta nï: ‘Imëka mana allikunatam qamkunaman chätsimushaq,+ y tsëkunapitaqa manam salvakuyta puëdiyankitsu. Y yanapëkunäpaq* rogakayämaptikipis, manam qamkunata yanapayashqëkitsu.+ 12 Tsëmi Judäpita y Jerusalenpita nunakunaqa, qarëkunata rupatsir adorayanqan santukunaman yanapëkunampaq rogakoq ëwayanqa.+ Peru tsë santukunaqa, manam sufrikäyanqampita ni imanöpapis salvëta puëdiyanqatsu. 13 Qamkuna adorayanqëki santukunaqa, Judächö markakunanömi mëtsika kayan. Y mana imapaqpis väleq Baal+ santupaq rurayanqëki altarkunapis, Jerusalenpa cällinkunanömi mëtsika kayan’.
14 Imëka mana allikunapa pasarnin, yanapëkunäpaq rogayämaptinqa manam pëkunata yanapashaqtsu. Tsëmi qampis Jeremïas, ama pëkunata yanapëkunäpaq mañakamëtsu.+ Pëkunapaq mañakamaptiki y pëkunapa favornin rogakamaptikiqa manam wiyashqëkitsu.
15 Kikinkunapita atskaq mana allikunata rurëkäyaptinqa,
¿ima derëchuwantaq kuyë sirwimaqnïkuna* wayïchö këkäyan?
Imëka mana allikuna qamkunaman chämuptinqa,
¿templuchö rurayanqëki qarëkunatsuraq salvayäshunki? ¿Tsëta rurayanqëkipitatsuraq kushikuyanki?
16 Unë witsanqa mëtsika rämayoq olïvus planta nirmi noqa Jehovä qamkunata reqirqä,*
y rikënïpaqqa shumaq y mëtsikata wayoq plantanömi kayarqëki.
Peru kananqa chikiyäshoqnikikunam rämëkikunata pakiyämushqa
y büllata rurëkäyaptikim ushakätsiyäshunëkipaq ninata tsaritsiyashqa.
17 Israelpita y Judäpita nunakuna, qamkunaqa imëka mana allikunatam rurayarqunki y Baal santupaq qarëkunata rupatsirmi alläpa cöleratsiyämarqunki.+ Tsëmi qamkunata plantaq noqa angelkunata mandaq Jehovä, imëka mana allikuna qamkunaman chämunampaq willakurqö”.+
18 Tsëkunata musyanäpaqmi qam Teyta Jehovä tsëkunata willamarqunki,
y pëkuna rurëkäyanqantam rikätsimarqunki.
19 Noqaqa, pishtayänampaq apayanqan üshanömi karqä,
y manam musyarqätsu conträ kënö parlayanqanta:+
“Jutinta mana imëpis yarpäyänampaq,
tsë plantata y wayunqanta
kawëkaqkuna këkäyanqan patsapita ushakätsishun”.
20 Peru angelkunata mandaq Teyta Jehoväqa, allita rurarmi pitapis juzgan.
Pëqa nunakuna imata pensayanqanta y shonqunkunachö ima kanqantam* alli musyan.+
Juiciuchö defendimänëkipaqmi qamman confiakamü.
Pëkunata imanö castiganëkipaq kaqta musyëkatsillämë.
21 Teyta Jehovämi, wanutsishuynikita munaq Anatotpita+ nunakunapaq nin, pëkunaqa kënömi niyan: “Mana wanutsiyänaqta munarqa, ama Jehoväpa jutinchö willakuytsu”.+ 22 Tsëmi Teyta Dios pëkunapaq kënö nin. Awmi, angelkunata mandaq Teyta Jehovämi këta nin: “Pëkunata castigaptïmi jövinkunata espädawan wanutsiyanqa,+ y warmi y ollqu tsurinkunanam mallaqëpita wanuyanqa.+ 23 Anatotpita+ nunakunata castiganqä wataqa, pëkunamanmi imëka mana allikunata chätsimushaq, y pëkunapitaqa manam ni jukllëllapis kawëkar quedanqatsu”.