Mateu

24 Jesus templupita yarquykaptinnam, entëru templuta rikätsiyänampaq qateqninkuna pëman witiyarqan. 2 Tsënam pëqa kënö nirqan: “¿Rikäyankiku kë llapankunata? Noqam qamkunata nï,* këchö rumikunaqa manam perqarëkartsu quedayanqa, sinöqa llapanmi patsachö ushanqa”.+

3 Olïvus jirkachö tëkaptinmi qateqninkunaqa pakëllapa witïkur Jesusta kënö tapuyarqan: “Niyämë, ¿imëtan tsëkuna pasanqa, y ima señalta rikartan këkämunqëkitana*+ y ushanan tiempuchöna* kawëkäyanqäta musyayäshaq?”.+

4 Tsënam Jesusqa kënö nirqan: “Cuidädu kayanki mana ni pï engañayäshunëkipaq.*+ 5 Atskaqmi jutïchö shayämunqa, y ‘noqam Cristu kä’ nirmi mëtsikaqta engañayanqa.+ 6 Guërrakuna kanqanta y guërrakuna kanqampaq willakuyanqantam wiyayanki. Ama mantsakäyankitsu. Tsëkunaqa pasanqam, peru manam ushakëraqtsu kanqa.+

7 Juk nacionmi juk nacionwan guërrata ruranqa, juk gobiernum juk gobiernuwan pelyanqa,+ y wakchö këchömi mallaqë+ y terremötukuna kanqa.+ 8 Tsë llapankunaqa alläpa sufrimientukunapa qallananllaran* kanqa.

9 Imëkata rurarmi sufritsiyäshunki+ y wanutsiyäshunki o wañutsiyäshunki,+ y qatimaqnïkuna kayaptikim llapan nacionpita nunakuna chikiyäshunki.+ 10 Mëtsikaqmi Teyta Diosta dejariyanqa, y juknin jukninmi traicionanakuyanqa y chikinakuyanqa. 11 Diospa willakoqnin tukoqkuna yurimurmi mëtsikaq nunakunata engañayanqa,+ 12 y imëpitapis mas mana alli rurëkuna kaptinmi* cäsi llapan nunakunapis kuyakoqnatsu kayanqa. 13 Peru ushananyaq alli tsarakoqqa salvakunqam.+ 14 Y llapan nacionpita nunakuna musyayänampaqmi, Teyta Diospa Gobiernumpita alli noticiakunata entëru patsachö willakuyanqa,+ y tsëpitanam ushakë chämunqa.

15 Tsëmi Diospa willakoqnin Daniel ninqannö, imëkata ushakätseq melanëpaqta sagrädu sitiuchö këkaqta rikëkurqa+ (tsëta leyeqqa,* shumaq entienditsun), 16 Judëa provinciachö këkarqa jirkakunaman qeshpir ëwakuyanki.+ 17 Wayi janan azoteachö këkaqqa, ama imëkanta jipeq wayin rurinman yëkutsunnatsu, 18 y chakrachö këkaqqa, ama janan kaq röpanta asheq kutitsunnatsu. 19 ¡Allaw tsë witsanchö qeshyaq këkaqkuna y llullu wamrayoq warmikuna! 20 Qeshpir ëwakuyänëki höra tamya witsanchö ni säbadu junaqchö mana kanampaq, Teyta Diosman mañakur këkäyë. 21 Tsë witsanqa alläpa sufrimientum* kanqa.+ Tsënö sufrimientuqa manam nunakuna kawar qallanqampita kashqaraqtsu, y manam yapëqa kanqanatsu.+ 22 Tsë tiempu pöcu tiempulla mana kaptinqa, manam ni pï salvakunmantsu, peru akrashqankunapaq yarpachakurmi Teyta Diosqa pöcu tiempulla kananta permitinqa.+

23 Tsëmi, ‘¡rikäyë! Këchömi Cristu këkan’+ o ‘¡washachömi këkan!’ niyäshuptikiqa, ama creiyankitsu.+ 24 Cristu tukoqkuna y Diospa willakoqnin tukoqkunam yuriyämunqa.+ Nunakunata engañayänampaq y puëdirqa akrashqakunatapis engañayänampaqmi+ imëka milagrukunata y espantëpaqkunata rurayanqa. 25 ¡Rikäyë! Kananllapitanam tsëkunata willëkäyaq. 26 Tsëmi, ‘¡tsunyaq sitiuchömi këkan!’ niyäshuptikiqa, ama ëwayankitsu; ‘¡ruri cuartuchömi këkan!’ niyäshuptikipis ama creiyankitsu.+ 27 Inti o rupay yarqamunan läduchö räyu tillapyanqan inti o rupay jeqanan läduyaq rikakunqannömi, Nunapa Tsurin këkämunqampis* cläru rikakunqa.+ 28 Ayakuna këkanqanmanmi pichakkunaqa* juntakäyanqa.+

29 Tsë alläpa sufrimientu witsan pasariptinllam, intipis o rupaypis aktsinqanatsu+ ni killapis atsikyanqanatsu, y estrëllakunapis ciëlupitam jeqayämunqa, y ciëluchö kaqkunapis kuyutsishqam kayanqa.+ 30 Tsënam Nunapa Tsurimpa señalninta ciëluchö rikar llapan nacionpita nunakuna llakikur pëchunkunata kutakuyanqa,+ y pukutë jananchö mëtsika poderyoq y chipapäkur+ shamuykaqtam Nunapa Tsurinta rikäyanqa.+ 31 Trompëtata fuertipa tocarmi pëqa angelninkunata mandanqa, y pëkunam patsapa chuskun lädumpita akrashqankunata juntayanqa, ciëlupa juk kuchumpita juknin kuchunyaq.+

32 Hïgus plantapaq igualatsikuypita yachakuyë. Rämankuna tseqlliptin raprankuna yarqaramuptinqa, musyayankinam usya witsan chämunampaqna kaqta.+ 33 Tsënöllam tsë llapankunata rikarqa, Nunapa Tsurin chämunampaqna këkanqanta musyayanki, awmi, punkuchöna këkanqanta.+ 34 Noqam qamkunata nï,* tsë llapankuna manaraq pasakuptinqa, manam kanan witsan nunakuna imanöpapis wanuyanqatsu. 35 Ciëluwan patsa ushakaptimpis, ninqäkunaqa manam imëpis ushakanqatsu.+

36 Tsëkuna imë junaq y imë höra pasanampaq kaqtaqa manam ni pï musyantsu,+ ni ciëluchö angelkuna ni Tsuripis, sinöqa kikin Teytallam.+ 37 Noëpa+ tiempunchö pasanqannöllam, Nunapa Tsurin këkämunqan* witsampis pasanqa.+ 38 Alläpa Tamya* manaraq kaptinqa, arcaman Noë yëkunqan junaqyaqmi nunakunaqa mikur upur kakuyarqan, y ollqukunapis warmikunapis casakurmi këkäyarqan,+ 39 y Alläpa Tamya shamur llapankunata ushakätsinqan+ junaqyaqmi ichikllapis cäsukuyarqantsu. Tsënöllam Nunapa Tsurin këkämunqan witsampis pasanqa. 40 Ishkaq nunakuna chakrachö këkäyaptinmi, jukninta apakuyanqa, y juknintana dejariyanqa. 41 Ishkaq warmikuna maki mulinuchö aqëkäyaptinmi, jukninta apakuyanqa, y juknintana dejariyanqa.+ 42 Tsënö këkaptinqa, alkäbu alkäbu këkäyë, manam musyayankitsu imë junaq Señornikikuna chämunampaq kaqta.+

43 Këta yarpäyë: paqaspa imë höra suwa shamunampaq kaqta wayiyoq nuna musyarqa,+ wayinman mana yëkunampaqchi mana punushpa këkanman karqan.+ 44 Tsënöllam Nunapa Tsurimpis mana pensayanqëki höra chämunqa,+ tsëmi qamkunapis listu këkäyänëki.

45 ¿Pitan wayinchö sirwipakoqkunata rikänampaq y tiempunchö mikuynin qaranampaq patronnin churanqan alli juiciuyoq* y confiakuypaq sirwipakoq?+ 46 ¡Patronnin char tsënö rurëkaqta tariptinqa, tsë sirwipakoq alläpam kushikunqa!+ 47 Noqam qamkunata nï,* llapan imëkanta rikänampaqmi churanqa.

48 Peru imëllapis tsë sirwipakoq mana alli tikrar* shonqunchö, ‘patronnïqa alläpam demorëkämun’ nir+ 49 sirwipakoq mayinkunata maqar y machakuyta gustaqkunawan mikur y upyar kakuptinqa, 50 tsë sirwipakoq mana musyanqan junaq y mana pensanqan höra patronnin chëkamurmi+ 51 alläpa feyupa castiganqa, y allish tukoqkuna këkäyanqanmanmi qarqunqa. Tsëchömi waqanqa, y cölerarmi kirunkunatapis ruchuchütsinqa.+