Jeremïas
3 Nunakunaqa kënömi tapukuyan: “Juk nuna warmimpita divorciakuriptin y warmin juk ollqupana warmin kaptinqa, ¿tsë nuna warminwan amishtanmanraqtsuraq?”
Kë kinrë markakunaqa manam Teyta Diospa rikëninchö limpiunatsu kayan.+
“Qamkunaqa mëtsika wënëkikunawanmi oqllanakur kayarqunki.+
¿Tsënö këkarku kananqa noqaman kutiyämunkiman?” nïmi noqa Jehovä.
2 “Mana imapis kanqan taksha jirkakunata rikäyë.
¿Mëchötan violayäshurqunkitsu? Tsunyaq sitiupa pureq nunakunanömi*
pëkunata shuyarnin näni kuchunchö täkuyarqëki.
Qellëpaqrëkur jukwan jukwan kakuyaptiki*
y imëka mana allikunata rurayaptikim
kë kinrë markakunaqa rikënïchö limpiutsu këkäyan.+
3 Tsëmi tamyapis kantsu,+
y qepa tamyapis chämuntsu.
Jukwan jukwan kakurnin* qowëkita o runëkita* engañëkarpis
manam mantsakunkitsu ni ichikllapis penqakunkitsu.+
4 Tsëkunata rurëkarmi kananqa kënö rogakayämanki:
‘¡Kuyë Teytalläkuna, qammi jövin kayanqäpita qowäkunanö o runäkunanö* karqunki!+
5 ¿Mana allikunata rurayanqätatsuraq imëpis yarparëkanki
y noqakunawan cölerashqallatsuraq këkanki?’.
Tsënö nikarpis,
imëka mana allikunata rurarmi sïguiyanki”.+
6 Josïas+ gobernanqan witsanmi Teyta Jehovä kënö nimarqan: “‘¿Rikarqunkiku Israelpita engañakoq nunakuna imanö portakuyanqanta? Pëkunaqa jatusaq jirkakunaman ëwëkur y montikunapa chakinchömi jukwan jukwan kakuyan.*+ 7 Tsë imëka mana allikunata rurëkäyaptimpis, noqaqa noqaman kutiyämunampaqmi nirqä,+ peru manam kutiyämurqantsu. Y Judäpita nunakunapis paninkuna traicionakoq kanqantam rikäyarqan.+ 8 Tsëkunata rikarmi Israelpita traicionamaq nunakunata, jukwan jukwan kakuyanqampita+ divorciu papelnin entreguëkurqä.+ Peru traicionakoq nanan o ñañan Judäpita nunakunaqa, manam ichikllapis mantsakuyarqantsu, y pëkunapis jukwan jukwanmi kakuyarqan.*+ 9 Jukwan jukwan kakurpis* manam imapis qokuyashqatsu, y kë kinrë markakunatam rikënïpaq mana limpiuta tikratsiyashqa. Rumipita y qerupita santukunata adorarmi jukwan jukwan kakoq warminö kayashqa.+ 10 Tsëkunata rurëkarpis traicionakoq nanan o ñañan Judäpita nunakunaqa, manam llapan shonqunkunawantsu noqaman kutiyämurqan, sinöqa janan shonqullam tsëta rurayarqan’ nïmi noqa Jehovä”.
11 Tsëpitanam Teyta Jehoväqa nimarqan: “Israelpita traicionakoq nunakunam, Judäpita traicionakoq nunakunapita mas alli kayanqanta rikätsikuyashqa.+ 12 Ëwar norti läduchö kawaqkunata kë ninqäkunata willë:+
‘“Mana alli portakoq Israelpita nunakuna, noqaman kutiyämuy” ninmi Teyta Jehovä.+ Teyta Jehoväqa kënöpis ninmi: “Mana dejakoq karmi qamkunawanqa cölerashqanatsu kashaq, y mana allikunata rurayanqëkitaqa manam yarpäshaqnatsu.+ 13 Tsënö kanampaqqa, noqa Jehovä Diospa conträ churakäyanqëkita ama negayëtsu. Qamkunaqa montikunapa chakinchömi mana reqiyanqëki nunakunawan* imëpis oqllanakuyarqëki, y noqa ninqäkunataqa manam cäsukuyta munayarqëkitsu” ninmi Teyta Jehovä’”.
14 “Mana alli portakoq tsurikuna noqaman kutiyämuy” ninmi Teyta Jehovä. “Noqam patronnikikuna* tikrarqö. Cada markapita jukta y cada familiapita ishkëtam Sionman apayämushqëki.+ 15 Imatapis munanqänö ruraq+ mitsikoqkunatam qamkunaman churamushaq. Pëkunam yachaq kayänëkipaq y entiendikoq kayänëkipaq yanapayäshunki. 16 Tsë witsanqa, atska tsuriyoq karmi entëru nacionchö mëtsikaq kayanki, ninmi Teyta Jehovä.+ Y manam yapëqa, ‘¡Teyta Jehoväpa sagrädu cäjan!’ niyankinatsu. Manam tsë cäjata yarpäyankitsu ni tsëman pensayankitsu, y manam watukayankitsu ni yapë rurayänëkipaq parlayankitsu. 17 Tsë witsanqa, Jerusalen markatam Teyta Jehovä gobernar täkunan niyanki.+ Mëtsë nacionpita nunakuna Jerusalen markaman ëwarmi Teyta Jehoväpa jutinta alabayanqa.+ Y mana allita munaq shonqunkuna ninqantaqa manam rurayanqanatsu”.
18 “Tsë witsanqa, Judäpita nunakuna y Israelpita nunakunam lädu lädu juntu puriyanqa.+ Ishkankunam norti läduchö markakunapita unë kastëkikunata herenciatanö entreganqä markakunaman shayämunqa.+ 19 Noqaqa kënömi pensarqä: ‘¡Imanö kushishqam, tsurïkunawan juntu kayänëkipaq qamkunata akrarqä.* Y mëtsë nacionpita mas shumaq y munapëpaq markakunatam herenciatanö qamkunata entregarqä!’.*+ Mana imëpis dejarayämänëkipaq kaqta, y ‘¡Teytäkuna!’ nir qayayämänëkipaq kaqtam pensarqä. 20 ‘Peru qowanta o runanta* traicionar ëwakoq warminömi Israelpita nunakuna qamkunaqa traicionayämarqunki’+ ninmi Teyta Jehovä”.
21 Israelpita nunakunaqa imëka mana allikunata rurarmi
Jehovä Diosninkunata qonqëkuyashqa.
Tsëmi mana imapis kanqan taksha jirkakunachö pëkuna waqayanqan
y llakikur rogakuyanqan wiyakan.+
22 “Mana alli portakoq tsurïkuna, noqaman kutiyämuy+
y noqam jukläyana kayänëkipaq yanapayashqëki.
Y manam mana allikunata rurayankinatsu”. Noqakunam kënö niyäshaq:
“¡Jehovä Diosnïkuna kaptikim qamman shayämurqö, y këchömi këkäyä!+
23 Jirkakunachö büllata rurar santukunata adorarqa
kikïkunam engañakuyarqö.+
Rasumpa kaqchöqa, qamllam Jehovä Diosnïkuna kanki,
noqakuna Israel nunakunapa salvamaqnïkuna kanki.+
24 Peru jövin kayanqäpitam, unë kastäkuna alli trabajar tariyanqanta,+
üshankunata, wäkankunata, warmi y ollqu tsurinkunata,
tsë mana imapaqpis väleq santu ushakätsishqa.
Manam qam Jehovä Diosnïkuna niyämanqëkita cäsuyarqötsu.
Tsëmi mana allikunata rurayanqäpita penqakur uchpa jananman jitakäyäshaq
y imëka mana allikunapis noqakunaman chämutsun”.