Mateu

21 Jerusalenman yëkuykarnam, Olïvus jirkachö Betfaguëman chëkur Jesusqa ishkë qateqninkunata mandarqan+ 2 kënö nir: “Rikëkäyanqëki caserïuman ëwayë. Tsëman charmi watarëkaq china ashnuta y lädunchö malta ashnuta tariyanki. Tsëta paskëkur noqaman apayämuy. 3 Imatapis niyäshuptikiqa, ‘Señormi wanan’* niyanki, y tsë höram apayämunëkita dejayäshunki”.

4 Tsë llapanqa pasarqan Teyta Diospa willakoqnin kënö ninqan cumplikänampaqmi: 5 “Sionpita nunakunata* kënö niyë: ‘¡Rikë! Gobernaqnikim qamman shamuykan.+ Pëqa humildim+ y ashnun montashqam shamun. Awmi, china ashnupa wawanta montashqam shamun’”.+

6 Tsënam qateqninkunaqa ëwar Jesus mandanqannölla rurayarqan.+ 7 Tsë china ashnutawan wawan malta ashnutam apayämurqan, y janan kaq röpankunata tsë ashnukunaman karunarkuyaptinmi pëqa malta ashnu jananman montarkurqan.+ 8 Mëtsikaqmi janan kaq röpankunata näniman mashtayarqan,+ y wakinnam rämakunata mutuykur näniman mashtayarqan. 9 Pëpa puntanta y qepanta ëwëkaq mëtsikaq nunakunam fuertipa kënö niyarqan: “¡Davidpa Tsurinta+ salvëkunëkipaqmi rogakuyaq!* ¡Bendicishqam Teyta Jehoväpa* jutinchö shamoqqa!+ ¡Salvëkunëkipaqmi rogakuyaq, qamta ciëluchö këkaqta!”.+

10 Jerusalenman yëkuriptinnam, tsë markachö nunakunaqa büllar, “¿pitan kë nunaqa?” niyarqan. 11 Tsënam mëtsikaq nunakuna kënö niyarqan: “¡Pëqa Teyta Diospa willakoqnin Jesusmi!,+ y Galilëa provinciachö këkaq Nazaret markapitam”.

12 Tsëpitanam Jesusqa templuman yëkur tsëchö rantikoqkunata y rantipakoqkunata qarqurqan, y qellëta cambiaqkunapa mësankunata y palumata rantikoqkunapa bancunkunatam jitar usharqan.+ 13 Y kënömi nirqan: “Qellqarëkanmi: ‘Wayïtaqa mañakuyänan wayi nirmi reqiyanqa’,+ peru qamkunaqa suwakoqkunapa machëninmanmi tikrëkätsiyanki”.+ 14 Tsëpitanam templuchö këkaptin pëman witeq wiskukunata o qaprakunata y cöjukunata alliyätsirqan.

15 Espantëpaqkunata ruranqanta rikar y templuchö wamrakuna fuertipa, “¡rogakulläyaqmi, Davidpa Tsurinta salvëkullë!”+ nikäyanqanta wiyarmi, mandakoq sacerdötikuna y Ley qellqaqkunaqa alläpa cölerayarqan.+ 16 Tsëmi Jesusta, “¿wiyankiku këkuna nikäyanqanta?” niyarqan. Tsënam Jesusqa nirqan: “Awmi, wiyëkämi. ¿Qamkunaqa manaku imëpis kënö neqta leyiyashqanki: ‘Qammi nirqunki pishi wamrakuna y chichikaq* wamrakunapis qamta alabayäshunëkipaq kaqta’?”.+ 17 Y pëkunata tsë markachö dejëkurmi Betania markaman ëwakurqan, y tsëchömi tsë paqas quedakurqan.+

18 Tsë markaman tempränulla kutikaptinmi, pachan mallaqaskirqan.+ 19 Tsëmi näni kuchunchö hïgus plantata rikëkur tsëman ëwarqan, peru manam ima frütantapis tarirqantsu, sinöqa rapranllatam,+ tsëmi nirqan: “Kanampitaqa ama imëpis frütëki katsuntsu”.+ Tsë höram tsë hïgus plantaqa tsakiskirqan. 20 Tsëta rikëkurnam qateqninkunaqa alläpa espantakur kënö niyarqan: “¿Imanötan hïgus plantaqa jinan höra tsakishqa?”.+ 21 Tsënam Jesusqa kënö nirqan: “Noqam qamkunata nï,* markäkurqa o yärakurqa y imapitapis següru karqa, manam hïgus plantata ruranqällatatsu rurayanki, sinöqa kë jirkata, ‘sharkur lamarman jeqarpuy’ niyaptikipis, tsënömi pasanqa.+ 22 Markäkur o yärakur imatapis mañakurqa, llapan mañakuyanqëkitam chaskiyanki”.+

23 Templuman yëkur tsëchö yachatsikuykaptinnam, mandakoq sacerdötikuna y markachö dirigeqkunaqa pëman witïkur kënö niyarqan: “¿Ima derëchuwantan tsëkunata ruranki? ¿Pitan tsëkunata ruranëkipaq nishurqunki?”.+ 24 Tsënam Jesusqa kënö contestarqan: “Noqapis jukta tapuyashqëki. Tsëta contestayämaptikiqa, noqapis niyashqëkim ima derëchuwan tsëkunata ruranqäta. 25 ¿Pitan nunakunata bautizanampaq Juanta mandarqan? ¿Teyta Diosku, o nunakunaku?”. Tsënam pëkunaqa kënö ninakuyarqan: “‘Teyta Diosmi’ nishqaqa, ‘tsëqa, ¿imanirtan pëta creiyarqëkitsu?’ nimäshunmi.+ 26 Peru ‘nunakunam’ nishqaqa, Juanta Teyta Diospa willakoqnintanö rikaq nunakunam imatapis rurëkamäshun”. 27 Tsëmi Jesusta contestar, “manam musyayätsu” niyarqan. Tsënam Jesusqa kënö nirqan: “Tsëqa manam noqapis niyashqëkitsu ima derëchuwan tsëkunata ruranqäta.

28 ¿Ima niyankitan? Juk nunapam ishkë tsurinkuna karqan. Punta kaqtam kënö nirqan: ‘Hïju, kanan junaq üvas chakraman trabajaq ëwë’. 29 Tsënam tsurinqa, ‘manam ëwashaqtsu’ nir contestarqan. Peru tsëpitaqa mana alli sientikurmi trabajaq ëwarqan. 30 Tsënam qepa kaq tsurinman witïkur pëtapis tsënölla nirqan, y pëqa, ‘ëwashaqmi papä’ nirqanmi, peru tsëpitaqa manam ëwarqantsu. 31 ¿Ishkampita mëqantan teytan munanqanta rurarqan?”. Pëkunanam, “punta kaqmi” nir contestayarqan. Tsënam Jesusqa kënö nirqan: “Noqam qamkunata nï,* impuestuta cobraqkuna y qellëpaqrëkur jukwan jukwan kakoq* warmikunam Diospa Gobiernunman puntëkikunata yëkuyanqa. 32 Juan shamurqa alli kaqta rurayänëkipaqmi yachatsiyäshurqëki, peru qamkunaqa manam creiyarqëkitsu. Tsënö kaptimpis, impuestuta cobraqkuna y qellëpaqrëkur jukwan jukwan kakoq* warmikunaqa creiyarqanmi,+ peru tsëta rikëkarpis qamkunaqa manam arrepentikuyarqëkitsu ni pëta creiyarqëkitsu.

33 Juk igualatsikuy masta wiyayë: juk nunam chakranman üvaskunata plantëkur+ entëru lädumpa cercarqan, y tsëchömi vïnu rurayänan pözuta y törrita rurarqan.+ Tsëpitanam, üvas chakranta arrendakuykur juk nacionta ëwakurqan.+ 34 Üvas cosëcha witsannam, pëpa kaqta chaskiyänampaq üvas chakranta arrendaqkunaman sirweqninkunata mandarqan. 35 Peru üvas chakrata arrendaqkunaqa, juknin sirweqnintam maqar ushayarqan, juknintam wanutsiyarqan o wañutsiyarqan, y juknintanam rumiwan tsampir o saqmar wanutsiyarqan.+ 36 Yapëmi punta mandanqampita mas atskatana sirweqninkunata mandarqan, peru pëkunatapis tsënöllam rurayarqan.+ 37 Tsëpitanam, ‘tsurïtaqa respetayanqam’ nir tsurintana mandarqan. 38 Tsurinta rikëkurnam, üvas chakrata arrendaqkunaqa kënö ninakuyarqan: ‘Pëmi herenciata chaskinqa.+ ¡Aku, herencianwan quedakunapaq wanuratsishun o wañuskatsishun!’. 39 Tsënö nirmi üvas chakrapita juk läduman apëkur wanutsiyarqan.+ 40 Tsëqa, üvas chakrapa duëñun shamurqa, ¿imataraq ruranqa üvas chakranta arrendaqkunata?”. 41 Tsënam pëta wiyëkaqkunaqa kënö niyarqan: “Mana alli kayanqampitam pëkunata ushakätsinqa, y üvas chakrantam jukkunata arrendëkunqa, y pëkunaqa cosëcha witsanmi pëpa kaqta entregayanqa”.

42 Jesusnam kënö nirqan: “Diospa Palabranchömi nin: ‘Albañilkuna mana väleqtanö rikar jitariyanqan rumim, esquïnachö ëwaq maestra rumi* tikrashqa.+ Tsëqa Teyta Jehoväpitam* shamushqa, y noqantsikpaqqa alläpa shumaqmi’. ¿Manaku tsënö ninqanta imëpis leyiyashqanki?+ 43 Tsëmi qamkunata nï,* Diospa Gobiernunman qamkuna yëkuyänëkipa rantinmi, pë munanqanta ruraq nunakuna yëkuyanqa. 44 Pï nunapis tsë rumi jananman ishkeqqa, pasëpam* ushakanqa.+ Y pipa jananmampis tsë rumi ishkirqa, pasëpam ushakätsinqa”.+

45 Tsë igualatsikuykunata wiyëkurnam, mandakoq sacerdötikuna y fariseukunaqa pëkunapaq parlëkanqanta cuentata qokuriyarqan.+ 46 Peru prësutsita munarpis, Teyta Diospa willakoqnintanö rikäyaptinmi nunakunata mantsayarqan.+