Nahum
3 ¡Allaw nuna mayinta wanutseq o wañutseq nunakuna kawayanqan marka!
Tsë markachö nunakunaqa engañanakur y suwapänakurmi kakuyan.
Tsëchö nunakunaqa suwakuyllamanmi yarparäkuyan.
2 Chikutikuna waqanqanta y carrëtakunapa ruëdankuna büllanqantam wiyä.
Cörrikaq cawallukunata y saltëkachar-raq cörrikaq carrëtakunatam rikä.
3 Tsënöllam rikä, cawallun montashqa soldädukunata, chipapaq espädakunata y lanzakunata,
mëtsika wanushqakunata y mëtsika ayakunata,
yupëtapis mana puëdipaq jitarëkaq ayakunata.
Tsë ayakunawanmi nunakunapis trompizar ushayan.
4 Tsënöqa pasanqa jukwan jukwan kakur* mana allikunata ruranqampitam.
Pëqa shumaq y kuyëllapaq kar y brujerïa rurëta yacharmi,
qellëpaq jukwan jukwan kakoq* warminö mëtsika nacionkunata engañashqa y mëtsika familiakunata brujerïa rurar mana allikunaman ishkitsin.
5 Angelkunata mandaq Teyta Jehovämi nin:+ “¡Rikë këchömi qampa* contrëki këkä!”
Llapan nacionkuna qalapächuta rikäyäshunëkipaqmi,
cärëkiyaq faldëkita qarirkamushaq.
Penqakatsiyäshunqëkitam mëtsë nacion nunakuna rikäyanqa.
6 Janëkiman basürata jichamurmi
melanëpaqta tikratsishqëki,
y pasashunqëkipita nunakuna yachakuyänampaqmi penqakatsishqëki.+
7 Llapan rikäyäshoqnikikunam kënö nir qeshpir ëwakuyanqa:+
‘¡Nïnivi markaqa pasëpam* ushakashqa!
¿Piraq pëta llakipanqa?’.*
¿Pillaraq shoqashunki?
8 ¿Nïlu mayuman*+ ëwaq sekyakuna amänunchö këkaq No-Amonpita*+ mas alliku kanki?
Tsë markapaqa entëru lädumpam yaku karqan,
lamarchö imëka allikunata tariptinmi lamar murällan cuenta karqan.
9 Etiopïa y Egiptu nunakunam mana ushakaq kallpan cuenta kayarqan.
Putpita+ y Libiapita nunakunanam yanapaqninkuna kayarqan.+
10 Tsënö kaptimpis, tsë marka nunakunapis
juk markamanmi apashqa kayarqan.+
Wamrankunatapis cällikunapa esquïnankunachömi mana llakipar* wanutsiyarqan.
Respetashqa nunakunatapis sortiëkurmi apakuyarqan,
y reqishqa nunakunatapis cadenarkurmi prësu apakuyarqan.
11 Tsënöllam qamkunapis machashqanö portakuyanki,+
mana tariyäshunëkipaqmi mana ni pï rikäyäshunëkiman ëwakuyanki.
Chikishoqnikikunapita qeshpiyänëkipaqmi següru sitiuta ashiyanki.
12 Murällëkikunapis poqu frütayoq hïgus plantanömi kayan,
kuyurkatsiyaptinllam hïguskunaqa mikoqkunapa shiminkunaman jeqarkamun.
13 Soldäduykikunapis warmikunanö kallpannaqmi kayan.
Chikiyäshoqnikikuna yëkayämunampaqmi markëkikunapa punkunkunapis kicharëkanqa.
Punkuykikunata trancayänëki qerukunatapis ninam ushanqa.
14 ¡Cercashqa kayanqëki junaqpaq yakuta alistayë!+
Murällëkikunata alli segurayë.
Oqu allpaman yëkuykur poqunqanyaq jaruyë,
y adobëruwan ladrïlluta rurayë.
15 Tsëkunata rurëkarpis, ninawanmi ushakätsishqa kanki,
y espädawanmi wanutsiyäshunki o wañutsiyäshunki.+
Chukllushkunanö* mëtsika tikrayaptiki y chukllushkunanö mirayaptikipis,
chukllushkuna imëkata mikur ushakätsiyanqannömi,
16 Qamchö këkaq negociantikunaqa, ciëluchö estrëllakunapitapis masmi mirayashqa.
Chukllushkunaqa* qarankunata dejëkurmi* ëwakuyan.
17 Markëkichö täpakoqkunaqa chukllushkunanömi* kayan,
soldäduykikunata dirigeqkunapis mëtsika chukllushkunanömi kayan.
Alalë junaqchöqa rumipita rurashqa corralkunachömi quedakuyan,
peru inti o rupay yarqaramuptinqa volarmi* ëwakuyan,
y manam ni pï musyantsu mëta ëwayanqanta.
18 Asiriata gobernaq dirigeqnikikunataqa punuymi vencikan,
carguyoq nunëkikunaqa wayinkunachömi quedakuyan.
Markëkichö nunakunaqa jirkakunapam wakpa këpa ëwakuyashqa,
y manam ni pï pëkunata juntantsu.+
19 Mana allikunapa pasaptikiqa manam ni pï yanapashunkitsu.
Herïdëkipaqqa manam jampi kannatsu.