2 Crönicas
1 Davidpa tsurin Salomonqa mas puëdeq gobernantim tikrarqan. Jehovä Diosnin yanapaptinmi mas reqishqa gobernanti karqan.+
2 Salomonmi qayatsirqan llapan israelïtakunata, mil soldädukunapa mandaqninkunata, cien soldädukunapa mandaqninkunata, juezkunata, Israelchö llapan dirigentikunata y familiankunachö dirigeqkunata. 3 Tsëpitanam Gabaonchö+ sagrädu altu sitiuman llapankuna ëwayarqan. Tsëchömi, Jehoväpa sirweqnin Moises tsunyaq sitiuchö ruranqan Diospa carpa* wayin karqan. 4 Peru Diospa Sagrädu Cäjantaqa, Davidmi carpa* wayita rurëkur Quiryat-Jearim+ markapita, Jerusalenman apashqa karqan.+ 5 Urïpa tsurin y Hurpa willkan Bezalel+ ruranqan cobripita altartaqa,+ Teyta Jehoväpa carpa* wayimpa puntanmanmi churashqa kayarqan. Tsë altarpa puntanchömi Salomonwan israelïtakunaqa Diosman mañakuyaq.* 6 Salomonqa Diospa carpa* wayin puntanchö këkaq altarchömi,+ Jehovä Diospaq animalkunata milta pishtëkur rupatsirqan.
7 Tsë paqasmi Teyta Diosqa Salomonta yuripur, “imatapis munanqëkita mañamë” nirqan.+ 8 Tsënam gobernanti Salomonqa kënö nirqan: “Papänï Davidta+ alläpa kuyarmi pëpa rantin gobernanti kanäpaq churamarqunki.+ 9 Teyta Jehovä, kananqa yupëtapis mana puëdipaq nunakunata gobernanäpaqmi churamarqunki.+ Tsëmi mañakallämü papänï Davidta+ äninqëkita cumplïkunëkipaq. 10 Yanapëkallämë alli yachaq kanäpaq y imatapis alli entiendinäpaq.+ Tsëran kë mëtsika sirwishoqnikikunata gobernëta puëdishaq”.+
11 Tsënam Teyta Diosqa Salomonta nirqan: “Qamqa manam atska wata kawanëkipaqtsu, rïcu kanëkipaqtsu, respetashqa kanëkipaqtsu, ni contrëkikunata ushakätsinäpaqtsu mañakamarqunki. Sinöqa gobernanti kanëkipaq+ churashqa kapteqmi, alli yachaq kanëkipaq y imatapis alli entiendinëkipaq mañakamarqunki, tsënöpa imatapis allita ruranëkipaq. 12 Tsëmi alli yachaq kanëkipaq y imatapis alli entiendinëkipaq yanapashqëki. Tsënöllam mana mañakamashqa këkaptikipis, rïcu kanëkipaq y respetashqa kanëkipaq yanapashqëki. Qamnöqa manam puntëkiman ni qepëkimampis ni pï gobernanti kanqatsu”.+
13 Tsëpitanam Salomonqa, Gabaonchö+ Diospa carpa* wayimpita Jerusalen markata kutikurqan y israelïtakunatam gobernarqan. 14 Salomonqa mastam carrëtakunata y cawallukunata* rantirqan. Tsëmi mil cuatrocientus carrëtankuna y döci mil cawallunkuna*+ kapurqan. Tsëkunataqa katsirqan carrëtakuna churaränan markakunachö+ y Jerusalen markachömi, gobernantipa amänunchö.+ 15 Salomon gobernanqan witsanqa pläta metalwan öruqa lluta ruminömi+ Jerusalen markachö abundu karqan, y cedru qerupis Sefelächö+ sicömoru hïgus montikunanömi mëtsika karqan. 16 Salomonpa negociantinkunaqa, imëpis tsë preciullachömi+ cawallukunata Egiptupita atskata* rantiyämoq.+ 17 Egiptupita rantiyämunqan carrëtakunaqa, cada ünum seiscientus pläta qellë cuestaq y cawallukunanam cientu cincuenta pläta qellë cuestaq. Tsë cawallukunatawan carrëtakunataqa hitïta nunakunapa gobernantinkunata y Siria nunakunapa gobernantinkunatam rantikuyaq.