Daniel
5 Gobernanti Belsasarmi+ yanapaqnin autoridäkunapaq alli mikuyta cocinatsirqan. Llapan invitädunkunaqa milmi kayarqan, y pëkunawanmi vïnuta upyëkäyarqan.+ 2 Machashqana këkarmi Belsasarqa, papänin Nabucodonosor Jerusalen templupita+ apanqan örupita y pläta metalpita rurashqa cöpakunata apapuyänampaq nirqan. Tsëkunataqa apayänanta munarqan yanapaqnin autoridäkunawan, sirweqnin warminkunawan* y wakin warminkunawan upyayänampaqmi. 3 Tsënam Jerusalenchö këkaq Teyta Diospa templumpita apayanqan örupita cöpakunata Belsasarman apayarqan. Tsëmi pë, yanapaqnin autoridäkuna, sirweqnin warminkuna* y wakin warminkuna tsë cöpakunawan upuyarqan. 4 Vïnuta upyarkurmi örupita, pläta metalpita, cobripita, fiërrupita, qerupita y rumipita rurashqa santukunata alabayarqan.
5 Tsë höram, chiwchi atsikyëkanqan frentinchö juk maki yurirkur palaciu perqachö qellqar qallëkurqan. Tsë maki qellqanqantaqa gobernanti rikarëkarqanmi. 6 Tsënam alläpa mantsakar gobernantiqa yuraqärirqan, tseqllampis y qonqunkunapis o qorqurninkunapis karkaryarqanmi.+
7 Tsëmi gobernantiqa mantsakar brüjukunata, caldeu* nunakunata, estrëllakunata rikëkur+ willakoq nunakunata qayatsirqan. Y Babiloniachö yachaq nunakunatam nirqan: “Kë perqachö qellqarëkaqta leyimoqta y ima ninan kanqanta willamaqtam, granäti röpata vistitsishaq, örupita wallqata wallqatsishaq+ y mandakoq kanampaqmi churashaq, pëpitaqa ishkaqllam mas respetashqa kayanqa”.+
8 Tsënam llapan yachaq nunakuna gobernantiman chäyarqan, peru manam mëqampis perqachö qellqarëkaqta leyita ni imapaq kanqanta willëta puëdiyarqantsu.+ 9 Tsënam gobernanti Belsasarqa alläpa mantsakarnin yuraqärirqan. Yanapaqnin autoridäkunapis manam ima nita puëdiyarqantsu.+
10 Gobernanti ninqanta y yanapaqnin autoridäkuna niyanqanta musyëkurmi, gobernantipa mamanqa* mikuykäyanqanman ëwar gobernantita kënö nirqan: “¡Qamlla imëyaqpis kawëkullë! Ama tsëpaq yarpachakur alläpa mantsakëtsu. 11 Kë mandakunqëki nacionchöqa juk nunatam* dioskuna poderninkunawan yanapayan. Papäniki gobernanqan witsanqa tsë nunaqa dioskunanöran imëkatapis musyaq, entiendeq y yachaq.+ Tsëmi papäniki Nabucodonosorqa brüjukunapa, suerti qateqkunapa, caldeu* nunakunapa y estrëllakunata rikëkur+ willakoqkunapa mandaqnin kanampaq churarqan. 12 Pëpa jutinqa Danielmi, papänikim jutintaqa Beltsasar+ nir cambiarqan. Danielqa alli yachaq karmi, suëñuyanqan imapaq kanqanta musyaq, mana entiendiyanqankunata entiendeq y arreglëta mana puëdiyanqan problëmakunata arreglaq.+ Pëta qayatsimuy ima ninan kanqanta willashunëkipaq”.
13 Danielta chäratsiyaptinmi gobernanti tapurqan: “¿Qamku Daniel kanki? ¿Qamtaku papänï Judäpita+ prësu apamushurqëki?+ 14 Qampaqmi willayämashqa dioskuna poderninkunawan+ yanapayäshunqëkita, tsëshi imëkatapis alli yachanki, entiendinki y musyanki.+ 15 Kë perqachö qellqarëkaqta leyiyämunampaq y ima ninan kanqanta niyämänampaqmi yachaq nunakunata y suerti qateqkunata pushayämushqa. Peru manam mëqampis ima ninan kanqanta musyantsu.+ 16 Tsënö kaptimpis qampaqmi willayämashqa, imëkatapis musyëta puëdinqëkita+ y arreglëta mana puëdiyanqan problëmakunata arreglëta puëdinqëkita. Kananqa perqachö qellqarëkaqta leyir ima ninan kanqanta willamë. Tsëta ruraptikiqa granäti röpatam vistitsishqëki, örupita wallqatam wallqatsishqëki y mandakoq kanëkipaqmi churashqëki, qampa puntëkiman mas respetashqaqa ishkaqllam kayanqa”.+
17 Tsënam Danielqa gobernantita nirqan: “Perqachö qellqarëkaqtaqa leyimushaqmi y ima ninan kanqantapis willashqëkim. Peru qaramänëkipaq kaqqa qampaq kakutsun o pitapis qarëkuy. 18 Teytallë, Llapanta Gobernaq Poderösu Diosmi papäniki Nabucodonosorta gobernanampaq churarqan, Diosmi puëdeqta tikratsirqan y llapan nunakunam respetayaq.+ 19 Puëdeq kanampaq Teyta Dios churashqa kaptinmi, mëtsë markachö nunakuna y ima idiömata parlaqkunapis papänikitaqa mantsayaq.+ Papänikiqa munanqan kaqtam wanutseq o kawëkaqtapis dejaq, tsënöllam munanqan kaqta mandakoq kanampaq churaq o penqakuyman churaq.+ 20 Peru orgullösu tikraptin y mana respetakur munashqanta ruraptinmi+ Teyta Diosqa gobernanti kanqampita qarqurqan y penqakuyman churarqan. 21 Manam nunakunawannatsu kawarqan, tsëpa rantinqa animalkunapanö shonqun tikraptinmi, chukaru ashnukunawan pärarqan. Törunömi qewata mikurqan y cuerpuntapis shullyam* oqurqan. Tsënömi karqan Llapanta Gobernaq Poderösu Dioslla, Gobernanti kanqanta y pitapis gobernanampaq pëlla churëta puëdinqanta cuentata qokunqanyaq.+
22 Teytë Belsasar, qamqa tsurin karmi tsë llapanta musyarqëki, tsënö pasëkaptimpis orgullösum tikrarqunki. 23 Y ciëluchö këkaq Teyta Diostam mana respetar ofendirqunki.+ Jerusalenchö këkaq templupita apayämunqan cöpakunawanmi+ qampis, yanapashoqniki autoridäkunapis, sirwishoqniki warmikikunapis* y wakin warmikikunapis vïnuta upyayarqunki. Tsëpitanam örupita, pläta metalpita, cobripita, fiërrupita, qerupita y rumipita rurashqa santukunata adorayarqunki. Tsë santukunaqa manam ni imata musyayantsu ni wiyayantsu ni rikäyantsu.+ Peru cada junaq kawatsishoqniki y imëkata ruranëkipaq yanapashoqniki Diostaqa manam alabarqunkitsu.+ 24 Tsëmi Teyta Diosqa, qellqanampaq tsë makita mandamushqa.+ 25 Qellqanqanqa, MENË, MENË, TEQUEL y PARSIN ninmi.
26 Kananqa ima ninan kanqanta willashqëki. MENË nirqa, gobernanëkipaq junaqkunaqa yupashqallana këkanqanta y ushanampaqna kanqantam Teyta Diosqa nikan.+
27 TEQUEL nirqa, Teyta Dios balanzanchö pesashuptiki pësuyki pishinqantam nikan.
28 Y PERES nirnam, gobiernuyki ishkëman rakikänampaq kaqta y medu nunakuna y persa nunakuna gobernanampaq kaqta nikan”.+
29 Tsënam Belsasarqa Danielta granäti röpata vistitsiyänampaq y örupita wallqata wallqatsiyänampaq mandakurqan. Tsënöllam mandakurqan, mandakoq kanampaq Danielta churaptin pëpa puntanman mas respetashqa ishkaqllana kayanqanta juk willakoq* fuertipa willakunampaq.+
30 Tsë paqasllam Belsasartaqa wanutsiyarqan. Pëqa caldeu nunam karqan.+ 31 Y Darïu+ jutiyoq medu nunam gobernanti tikrarqan, pëqa sesenta y dos watayoqmi* karqan.