Josuë
17 Tsëpitanam sortiayanqanchö+ Manasespa kastankunata+ herenciankuna tocarqan. Y Makirmi+ valienti soldädu kanqampita, Galaadchö y Basanchö+ markakunata chaskirqan. Makirqa Galaadpa papänin y Manasespa mayor tsurinmi karqan, y Manasesnam Josëpa mayor tsurin karqan.+ 2 Manasespa wakin kastankunaqa, familiapam herenciankuna chaskiyarqan: Abi-Ezerpa+ tsurinkuna, Hëlecpa tsurinkuna, Asrielpa tsurinkuna, Siquempa tsurinkuna, Hëferpa tsurinkuna y Semidäpa tsurinkuna. Pëkunam kayarqan Manasespa kastankunapa ollqu familiankuna. Manasesqa Josëpa tsurinmi karqan.+ 3 Peru Zelofehadpaqa+ warmillam wamrankuna karqan, y jutinkunam karqan Mahlä, Noä, Hoglä, Milcä y Tirzä. Zelofehadqa Hëferpa tsurinmi karqan, Hëfernam Galaadpa tsurin karqan, Galaadnam Makirpa tsurin karqan y Makirnam Manasespa tsurin karqan. 4 Zelofehadpa wamrankunam sacerdöti Eleazarman,+ Nunpa tsurin Josuëman y dirigeqkunaman ëwar niyarqan: “Teytantsik Jehovämi Moisesta mandarqan familiäkunata tocanqan herenciata entregayämänampaq”.+ Tsënö niyaptinmi Jehovä Dios mandakunqannölla papänimpa wawqinkunata tocanqanchö, herenciankuna entreguëkuyarqan.+
5 Manasespa kastankunaqa Jordan mayuta* manaraq tsimparmi* Galaadchö y Basanchö markakunata chaskishqa kayarqan. Y Jordan mayuta+ tsimparirpis* chunka markakuna mastam chaskiyarqan. 6 Manasespa kastankunaqa, warmipis ollqupis llapankunam herenciankuna chaskiyarqan. Y Manasespa kastampita wakin familiakunapa herenciankunaqa, Galaadchö markakunam karqan.
7 Manases kastapa lindërunqa, Aser kastapa lindërumpita Siquem+ markapa frentinchö Micmetat+ markayaqmi ëwaq. Tsëpitanam uraq* En-Tapüah nunakuna kawayanqan markakunayaq. 8 Tapüahchö+ markakunaqa, Manasespa kastankunapam karqan. Peru Manasespa kastankunapa lindërunchö këkaq Tapüah markaqa, Efrainpa kastankunapam karqan. 9 Lindërunqa Canä mayupa* lädunyaqmi* uraq. Y Efrainpa kastankunapa wakin markankunaqa, Manasespa+ kastankunata tocanqan markakunapa rurinchömi karqan. Y Manasespa kastankunapa lindërunqa, mayu lädumpam* karqan, y lamarchömi ushareq.+ 10 Sur läduchö markakunaqa Efrainpa kastankunapam karqan, y norti läduchö kaqnam Manasespa kastankunapa karqan,+ y lamarmi lindërunkuna karqan. Manasespa kastankunapa norti läduchö lindërunqa, Aser kastapa herencianwanmi tinkoq y inti o rupay yarqamunan lädupanam Isacar kastapa herencianwan colindaq.
11 Isacarpa y Aserpa kastankunapa herencian rurinchömi, Manasespa kastankunaqa Bet-Sean markata y ichik markankunata,* Ibleam+ markata y ichik markankunata, y Dor+ markata y ichik markankunata chaskiyarqan. Y kima jirkakunachönam kë markakunata chaskirqan: En-Dor+ markata y ichik markankunata, Taanac+ markata y ichik markankunata y Meguidö markata y ichik markankunata.
12 Peru Manasespa kastankunaqa, manam tsë markakunapa duëñun këta puëdiyarqantsu. Tsë markakunataqa manam cananeu nunakuna dejayarqantsu.+ 13 Israelïtakuna mas puëdeq tikrarirqa, cananeu nunakunatam esclävunkuna tikratsiyarqan,+ peru wakin markakunapitaqa manam qarquyta puëdiyarqantsu.+
14 Tsënam Josëpa tsurinkunapa kastankunaqa Josuëta niyarqan: “¿Imanirtan sorteuchöqa wallkallata markäkuna entregayämarqunki?+ Noqakunaqa, kananyaqpis Jehovä Dios bendiciyämaptin mëtsikaqmi kayä”.+ 15 Tsënam Josuëqa kënö nirqan: “Efrainpa kastankuna+ chaskiyanqan jirkachö markakunaqa, manam llapëkipaq tinkunqatsu. Mëtsikaq këkarninqa, montikunaman witsarnin perizïta nunakuna+ y refaim nunakuna+ kawayanqan wakin markakunaman yëkuyë”. 16 Tsënam Josëpa tsurinkunapa familiankunaqa Josuëta niyarqan: “Jirkachö markakunaqa manam noqakunapaq tinkunqatsu. Peru ura pampachö kawaq cananeukunaqa, fiërrupita höciyoq* guërrapaq carrëtakunayoqmi* kayan,+ tsënöllam kayan Bet-Sean+ markachö y ichik markankunachö* y Jezreel+ ura pampachö täkoqkunapis”.* 17 Tsënam Josuëqa, Josëpa tsurinkuna Efrainpa y Manasespa kastankunata kënö nirqan: “Qamkunaqa puëdeq y mëtsikaqmi kayanki, tsëmi wallka markakunallatatsu chaskiyanki,+ 18 sinöqa jirkakunachö llapan markakunam qamkunapaq kanqa.+ Montikuna kaptimpis, limpiariyankim, y tsëyaqmi lindëruykikuna kanqa. Cananeu nunakunataqa, puëdeq kayaptimpis y guërrapaq carrëtankunapa ruëdankunachö jatusaq höcikuna* kaptimpis venciyankim”.+