Daniel
7 Babiloniachö juk watapana Belsasar+ gobernëkaptinmi, Danielqa juk paqas suëñurqan.+ Y suëñuyninchö rikanqankunatam llapanta qellqarqan.+ 2 Danielmi kënö willakurqan:
“Suëñuynïchömi rikarqä chuskun lädupa vientu* shamur, lamarta pükaptin yaku alläpa laqcheqsaqta.+ 3 Tsë lamarpitam mantsanëpaq chusku animalkuna+ yarqayämurqan, y chuskumpis jukläya jukläyam kayarqan.
4 Punta kaq animalqa leonnömi karqan+ y älankunapis pichakpanömi* karqan.+ Rikarëkaptïmi älankunata rachiriyarqan, tsëpitanam nunanö shäränampaq* sharkatsiyarqan y shonquntapis nunapanö kanampaqmi cambiayarqan.
5 Ishkë kaq animalnam ösunö karqan.+ Juk kaq makintam pallarirëkarqan* y kima costillatam amurëkarqan. Y ‘jinan höra, mëtsika ëtsata melananqëkiyaq mikuy’ niyarqanmi.+
6 Rikarëkaptïmi juk animal mas yarqamurqan. Tsë animalqa leopardunömi karqan+ y waqtanchömi jatun pishqupa älannö chusku älankuna karqan y peqampis o umampis chuskum karqan.+ Y gobernanampaqmi autoridä churayarqan.
7 Tsëpitanam rikarëkaptï juk animal mas yarqamurqan. Wakin animalkunapitaqa jukläyam karqan y alläpa mantsanëpaq y puëdeqmi karqan. Jatusaq kirunkunapis fiërrupitam karqan y chunka waqrayoqmi karqan. Imëkatapis llapantam mikur ushaq y quedaq kaqtanam jarur ushaq.+ 8 Waqrankunata rikarëkaptïmi, tsë waqrakunapa chowpimpa juk taksha waqra yarqaramurqan,+ y yarqaramuptinmi kiman waqrankuna pakirirqan. Tsë yarqamoq waqrapa nawinwan shiminqa, nunapanömi karqan y alabakurmi imëkakunata parlarqan.+
9 Tsënö rikarëkaptïmi gobernar jamakuyänampaq täkunakunata churayarqan y tsëmanmi Unëpitana Kawaq Awkin+ jamakurqan.+ Tsë awkimpa röpanqa rashtanö* yuraqmi karqan+ y aqtsampis yuraq millwanömi karqan. Gobernaqpa täkunan y täkunampa ruëdankunapis ninapürum karqan.+ 10 Jamakunan puntampam mayu* yakunö nina yarqamurqan.+ Sirweqninkunapis mil kuti milmi kayarqan y diez kuti diez milmi puntanchö shëkäyarqan.*+ Jueznam*+ juzganampaq jamakurqan y librukunam kichakarqan.
11 Tsëpitanam, waqra alabakur parlanqanta wiyar quedakurqä.+ Tsënö parlëkaptinmi tsë mantsëpaq animalta wanuratsiyarqan y ninaman jitarkuyaptinmi ushakarqan. 12 Peru wakin animalkunataqa+ manam permitiyarqannatsu mandakuyänanta, y juk tiempu masraq kawayänampaqmi dejayarqan.
13 Tsënö suëñuykarmi, rikarqä ciëlupita nunapa tsurinnö pukutëwan shamuykaqta.+ Y Unëpitana Kawaq Awkinmanmi+ pushayarqan. 14 Pëtam churarqan mëtsë markakunachö+ y nacionkunachö nunakuna respetayänampaq,+ gobernantinkuna kanampaq y imëkatapis poderninchö katsinampaq.+ Pëllam imëyaqpis gobernanqa y manam imëpis ushakanqatsu.+
15 Noqa Danielqa, tsëkunata suëñushqa karmi alläpa mantsakar llakikurqä.+ 16 Tsë rikanqäkuna imapaq kanqanta musyëta munarmi, tsëchö shëkaqkunaman* ëwar jukninta tapurqä, pënam imapaq kanqanta kënö willamarqan:
17 ‘Kë patsachömi chuskoq gobernantikuna kanqa,+ tsëpaqmi tsë mantsanëpaq chusku animalkunata+ rikarqunki. 18 Peru Puëdeq Dios akranqankunam+ gobernantiqa kayanqa,+ y pëkunam imëyaqpis gobernayanqa’.+
19 Tsëmi chusku kaq mantsëpaq animal imapaq kanqanta musyëta munarqä. Tsë animalqa wakin animalkunapita jukläya, alläpa mantsanëpaq y puëdeqmi karqan. Jatusaq kirunkunapis fiërrupitam karqan y shillunkunapis cobripitam karqan. Llapan tarinqantam mikur usharqan, y quedaq kaqtanam jarur usharqan.+ 20 Tsënöllam musyëta munarqä, chunka waqrankuna,+ yarqamoq taksha waqran y taksha waqra yarqaramuptin pakeq kiman waqrankuna+ imapaq kanqanta. Yarqamoq taksha waqraqa nawiyoq y shimiyoqmi karqan, imëkatam alabakurqan y wakinkunapita mas jatunnömi karqan.
21 Rikarëkaptïmi tsë waqraqa Dios akranqankunata atacar vencirqan.+ 22 Tsënöqa vencirqan Unëpitana Kawaq Awkin+ shamur akranqankunata+ yanapanqan junaqyaqmi y gobernayänampaq tiempu chanqan junaqyaqmi.+
23 Tsënam kënö nimarqan: ‘Juk gobiernu masmi kanqa, tsëpaqmi tsë chusku kaq mantsanëpaq animaltaqa rikarqunki. Wakin gobiernukunapita jukläyam kanqa, y llapan tarinqantam mikur usharqan, y quedaq kaqtanam jarur usharqan.+ 24 Chunka waqrankuna rikanqëkinam, tsë gobiernuchö chunka gobernantikuna kanampaq kaq. Pëkuna gobernëkäyaptinmi, juk gobernanti mas kanqa. Tsë gobernantiqa, wakinkunapita jukläyam kanqa y kiman gobernantikunatam dominanqa.+ 25 Llapanta Gobernaq Poderösu Diospa+ contranmi parlanqa y akranqan nunakunatam seguïdu acusanqa. Teyta Dios dispuninqan tiemputa y leytam cambiëta munanqa y Teyta Dios akranqankunatam juk watapa, ishkë watapa y pullan watapa dominanqa.*+ 26 Peru Juez* juzgaptinmi gobernaq kanqampita qarqur ushakätsiyarqan.+
27 Teyta Dios akranqankunallam mandakuyänampaq, puëdeq kayänampaq+ y gobernanti kayänampaq poderta chaskiyarqan. Pëkuna mandakuyanqanqa manam ni imëpis ushakanqatsu,+ patsachö llapan gobiernukunam sirwiyanqa y cäsukuyanqa’.
28 Tsëtam suëñuynïchö rikarqä. Y suëñunqäman alläpa yarpachakurmi alläpa mantsakarqä, peru suëñunqätaqa manam ni pita willarqätsu”.