Malaquïas

3 “¡Rikäyë! Willakoqnïtam mandamushaq, pëqa nänita alistarmi puntäta ëwanqa.+ Y ashikäyaptikim llapanta gobernaq Señorqa illaqpita templunman shamunqa.+ Y kushishqa shuyëkäyaptikim acuerdupita willakoq chämunqa. Awmi, rasumpam chämunqa” ninmi angelkunata mandaq Teyta Jehovä.

2 “Pë shamuptinqa, ¿piraq listu këkanqa? Y pë chämuptinqa, ¿piraq shëkar* këkanqa? Pëqa metalta alliyätseq ninanö y röpata taqshayänampaq jabonnömi*+ kanqa. 3 Plätata alliyätseq y limpiuyätseq+ nunanömi, pëqa Levïpa kastankunata limpiuyätsinqa. Y örutanö y plätatanö alliyätsiptinmi, pëkunaqa alli kaqtana rurayanqa, y Teyta Jehoväpaqmi qarëkunata rupatsiyanqa. 4 Unë witsankunanö y unë watakunanömi, Judäpita y Jerusalenpita nunakunapa qarëninkunawan Teyta Jehovä kushikunqa.+

5 Qamkunata juzganäpaqmi* shamushaq, y brüjukunata,+ mana majankunawan oqllanakoqkunata, mana cumpliyänampaq imatapis änikoqkunata,+ forastërukunata yanapëta+ mana munaqkunata,*+ y pëkunapaq trabajaqkunata, viudakunata y papäninnaqkunata+ engañaqkunatam, rasmi o sasmi juzgashaq. Tsë nunakunaqa manam ichikllapis respetayämashqatsu” ninmi angelkunata mandaq Teyta Jehovä.

6 “Noqaqa Jehovämi kä, y manam cambiarqötsu,+ y qamkunaqa Jacobpa kastankunam kayanki, y manam ushakäyarqunkiraqtsu. 7 Unë kastëkikuna kawayanqan witsampitam qamkunaqa mandakunqäkunata cäsukuyarqunkitsu ni rurayarqunkitsu.+ Noqaman kutiyämuptikiqa, noqapis qamkunaman kutimushaqmi”+ ninmi angelkunata mandaq Teyta Jehovä.

Peru qamkunaqa, “mana dejashqa këkarqa, ¿imanöpatan pëman kutishwan?” niyankim.

8 “¿Puëdinmantsuraq pï nunapis Diosta suwapëta? Peru qamkunaqa suwapëkäyämankim”.

Tsënö kaptimpis qamkunaqa, “¿imëtan qamtaqa suwapäyarqoq?” niyankim.

“Tsëtaqa rurayarqunki diezmuta y qarëkunata mana apamurmi. 9 Tsënö suwapäyämanqëkipitam qamkunaqa maldicishqa këkäyanki. Awmi, entëru nacionchömi llapëki tsënö suwapëkäyämanki. 10 Wayïchö mikuy kanampaq+ qarëkunata churayänan cuartuman llapan diezmukunata apayämuy.+ Tsëta rurar probayämaptikiqa, ciëlu punkukunata kichëkurmi imëkawan bendiciyashqëki,+ y manam imëkikunapis faltanqatsu” ninmi angelkunata mandaq Teyta Jehovä.+

11 “Qamkunaman yarparmi murukuynikikunata kurukuna ushakätsiyänanta permitishaqtsu, tsëmi chakrëkikunachö murukuykunata ni üvas plantëkikuna wayunqantapis ushayanqanatsu”+ ninmi angelkunata mandaq Teyta Jehovä.

12 “Qamkunaqa kushishqa kawayanqan nacionchömi kawayanki,+ tsëmi mëtsë nacionpita nunakunapis kushishqa kayanqëkita niyanqa” ninmi angelkunata mandaq Teyta Jehovä.

13 “Qamkunaqa alläpa mana allikunatam noqapaq parlayarqunki” ninmi Teyta Jehovä.

Peru qamkunaqa, “¿imëtan qampaq mana allita parlayarqö?” niyankim.+

14 “Kënöpis niyankim: ‘Teyta Diosta sirwinqantsikpis manam imapaq välintsu.+ Ardëllam* angelkunata mandaq Teyta Jehovä llapan mandamanqantsikta cumplirquntsik, y pëpa puntanchö llakishqa purirquntsik. 15 ¿Manaku allish tukoqkuna kushishqa kawakuyan? ¿Y manaku mana alli nunakuna rurayanqanqa imëkapis allilla yarqun?+ Pëkunaqa mana mantsakushpa Teyta Diosta pruëbaman churarpis, manam ima castïguta chaskiyantsu’”.

16 Tsë witsanmi, Teyta Jehoväta respetaqkunaqa jukninkuna jukninkuna amïgunkunawan parlar qallëkuyarqan, y Teyta Jehoväqa pëkuna parlayanqantam altantu wiyëkarqan. Y pëta respetaqkunata y jutinman pensaqkunata+ yarpänampaqmi, Teyta Jehoväqa pëkunapa jutinkunata libruman qellqayänampaq mandakurqan.+

17 Angelkunata mandaq Teyta Jehovämi kënö nin: “Kuyë sirwimaqnïkuna kayänampaq akranqä junaqmi+ pëkunaqa noqapana kayanqa,+ y cäsukoq tsurinta papänin llakipanqannömi* pëkunata llakipäshaq.+ 18 Qamkunaqa yapëmi rikäyanki allita ruraq nunakuna, mana allita ruraqkunapita+ jukläya kayanqanta, y Teyta Diosta sirweqkuna, pëta mana sirweqkunapita jukläya kayanqanta”.