Juan
21 Tsëpitanam Jesusqa Tiberïadis qocha kuchunchö qateqninkunata yapë yuripurqan, y tsëqa kënömi pasarqan. 2 Simon Pëdru, Millish niyanqan Tomas,+ Galilëa provinciachö Canäpita Natanael,+ Zebedeupa tsurinkuna+ y ishkaq mas qateqninkunam, llapankuna juntu këkäyarqan. 3 Tsënam Simon Pëdruqa pëkunata, “pescaqmi ëwä” nirqan. Pëkunanam, “aku noqakunawampis ëwashun” niyarqan. Tsëmi ëwar barcuman yëkur pescaq ëwayarqan, peru tsë paqasqa manam imatapis pescayarqantsu.+
4 Patsa warëqa, Jesusqa qocha kuchunchömi këkarqan, peru qateqninkunaqa manam pë kanqanta cuentata qokuyarqantsu.+ 5 Tsënam Jesusqa, “wamralläkuna, manam mikuyänëkipaq imëkikunallapis* kantsu, ¿aw?” nirqan. Pëkunanam, “¡manam!” nir contestayarqan. 6 Tsënam pëqa, “imallatapis tariyänëkipaq barcupa derëcha lädumpa mällata jitayë” nirqan. Jitarkurqa mëtsika pescädukuna kaptinmi sutamuyta puëdiyarqantsu.+ 7 Tsënam Jesuspa kuyë qateqninqa,+ Pëdruta “¡Señormi!” nirqan. Señor kanqanta wiyëkurmi Simon Pëdruqa qalapächu* këkanqampita röpanta vistikurkur* qochaman saltarkurqan. 8 Peru wakin qateqninkunaqa, qocha kuchunman chäyänampaq mana karuna kaptinmi, mälla junta pescäduta qaracharkur ichikllan barcuwan yarqayämurqan. Awmi, qochapa kuchunqa noventa metruschönöllanam* këkarqan.
9 Qocha kuchunman chëkurqa, shanshëkaq o shankëkaq nina jananchömi pescädu churarëkaqta y tantata rikäyarqan. 10 Tsënam Jesusqa, “pescayanqëkipita juk ishkë pescädukunata apayämuy” nirqan. 11 Tsënam Simon Pëdruqa barcuman yëkur, jatusaq pescädukunawan junta këkaq mällata qocha kuchunman sutamurqan, y cientu cincuenta y tres pescädukunam kanaq. Peru mëtsika kaptimpis, manam mällaqa rachirqantsu. 12 Jesusnam “desayunaq shayämuy” nirqan. Señor kanqanta musyarmi ni mëqan qateqnimpis, “¿pitan kanki?” nir tapuyta valurarqantsu. 13 Tsënam Jesusqa witïkur tantankuna qararqan, y tsënöllam pescädunkunapis qararqan. 14 Tsë kutiwanqa kawarimunqampita kima kutinam Jesus qateqninkunata yuripurqan.+
15 Desayunar ushariyaptinmi Jesusqa Simon Pëdruta kënö tapurqan: “Juanpa tsurin Simon, ¿tsëkunata kuyanqëkipitapis masku kuyamanki?”. Tsënam pëqa, “awmi Teytë, qamqa musyankim kuyanqaqta” nirqan. Jesusnam, “üshäkunata pachan qarë”+ nirqan. 16 Y yapëmi, “Juanpa tsurin Simon, ¿kuyamankiku?” nir tapurqan. Pënam, “awmi Teytë, qamqa musyankim kuyanqaqta” nirqan. Tsënam Jesusqa, “üshalläkunata mitsi” nirqan.+ 17 Y kima kutichöpis, “Juanpa tsurin Simon, ¿kuyamankiku?” nirmi tapurqan. Kima kutipana, “¿kuyamankiku?” nir tapuptinmi Pëdruqa alläpa llakikurqan. Tsëmi nirqan: “Teytë, qamqa llapantam musyanki; qamqa allim musyanki imanö kuyanqaqta”. Tsënam Jesusqa kënö nirqan: “Üshalläkunata shumaq mitsi.+ 18 Rasunllatam qamta neq, jövin karqa kikikim vistikoq kanki, y munanqëkipam ëwaq kanki. Peru awkinyarqa, juk vistitsishunëkipaqmi makikikunata pallarinki,* y mana munanqëkimanmi apayäshunki”. 19 Tsënöqa nirqan, Pëdru imanö wanunampaq kaqta musyatsikur y wanunqanwan Teyta Dios alabashqa kanampaq kaqta rikätsikurmi. Tsënö nïkurnam, “qatimar sïgui”+ nirqan.
20 Pëdruqa tumëkurmi rikarqan Jesuspa mas kuyë qateqnin qepankunata ëwëkaqta.+ Pëmi cenayanqan höra Jesuspa pëchuman jitakëkur, “Teytë, ¿pitan traicionashunki?” nir tapushqa karqan. 21 Tsëmi pëta rikëkur Pëdruqa, “Teytë, ¿y pëtaqa imatan pasanqa?” nir tapurqan. 22 Tsënam Jesusqa nirqan: “Noqa kutimunqäyaq pë këchö këkänanta munaptïqa, ¿qamtaqa imataq qokushunki? Qamqa qatimarlla sïgui”. 23 Tsëmi Jesuspa qateqninkunaqa, tsë qateqnin mana wanunampaq kaqta parlayarqan. Peru Jesusqa manam mana wanunampaq o wañunampaq kaqtatsu nikarqan, sinöqa “noqa kutimunqäyaq pë këchö këkänanta munaptïqa, ¿qamtaqa imataq qokushunki?” nirqanmi.
24 Tsë qateqninmi+ tsëkunata willakun, y tsëkunata qellqashqa, y musyantsikmi pë willakunqanqa rasunlla kanqanta.
25 Rasumpa kaqchöqa, Jesusqa imëka maskunatam rurarqan. Tsë llapanta imëllapis qellqayaptinqa, manachi sitiu tinkunmantsu tsë röllukunata churayänampaq.+