Amos
8 Llapanta Gobernaq Teyta Jehovämi rikätsimarqan, usya witsanchö cosechayanqan poqushqa früta* canastachö winarëkaqta. 2 Tsënam nimarqan: “Amos, ¿imatataq rikëkanki?”. Noqanam nirqä: “Juk canastachö poqushqa früta* winarëkaqtam rikëkä”. Tsënam Jehovä Diosqa nimarqan: “Kananqa sirwimaqnï israelïtakunata ushakätsinä tiempunam chämushqa. Mananam perdonashaqnatsu.+ 3 Llapanta Gobernaq Teyta Jehovämi kënö nishqa: ‘Tsë junaqmi cantayänampa rantin templuchö waqayanqa,+ y mëtsëchömi ayakuna jitaräkunqa.+ ¡Upälla kayë!’.
4 Waktsakunata sufritseqkuna y humildi nunakunata
mana alliman chätseqkuna wiyayämë.+
5 Qamkunam niyanki: ‘Tsaki mikuynintsikta rantikunantsikpaq, ¿imëraq llullu killa fiesta ushanqa?+
¿Imë höraraq säbadu junaq pasanqa+ tsaki mikuynintsikta rantikunantsikpaq?
6 Tsënöpam sirwimänantsikpaq, faltapakoqkunata qellëwan rantishun
y waktsakunatapis juk par llanqiwan rantishun,+
y aquyoq gransakunatapis rantikushun’.
7 Jacobta+ kushitseq Jehovä Diosmi jurar kënö nishqa:
‘Mana allita rurayanqëkitaqa manam qonqashaqtsu.+
8 Tsëta rurayanqëkipitam patsapis kuyunqa
y nacionchö nunakunam mantsakar waqayanqa.+
Egiptuchö Nïlu mayu* miraqnömi imëka mana allikuna miranqa
y Nïlu mayu miraqnö y wallkayaqnömi imëkapis punta kanqannönatsu kanqa’.+
9 Llapanta Gobernaq Teyta Jehovämi kënö nin:
‘Tsë junaqmi, intiqa o rupayqa pullan junaqchö quedanqa,
10 Fiestata rurar kushikuyänëkipa rantinmi llakikur waqayanki,+
cantarpis wanupakushqanömi o wañupakushqanömi waqayanki.
Llakishqa karmi tseqllëkikunamampis chukru tëlakunata watakuyanki y aqtsëkikunatapis llapantam rutukuyanki.
Japallan tsurikikuna wanukuptin waqaqnömi waqayanki
y manam kushishqatsu kayanki’.
11 Llapanta Gobernaq Teyta Jehovämi kënö nin:
‘Entëru patsachö alläpa mallaqë kananta permitinä tiempum chëkämunna.
Peru manam mikuy pishiptintsu mallaqäyanqa ni yaku pishiptintsu yakunäyanqa.
Sinöqa, noqa Jehovä ninqäta wiyëta munarmi.+
12 Tsëmi noqa Jehovä ninqäta wiyëta munar,
lamarpa juknin kuchumpita juknin kuchunyaq ëwayanqa,
y norti kaq lädupita inti o rupay yarqamunan läduyaq ëwayanqa, peru manam tariyanqatsu.
13 Tsë junaqmi, ollquwan manaraq kashqa shumaqllan shipashkuna
y jövinkunapis yakunar desmayayanqa.
14 Pëkunam Samaria+ markachö santukunapa jutinchö,
Dan+ markachö santukunapa jutinchö
y Beer-Sëbaman+ ëwaq sagrädu nänipa jutinchö jurar änikuyan.
Tsë llapankunam ishkiyanqa y manam sharkuyanqanatsu’”.+