2 Rëyes
3 Judächö dieciöchu watapa Jehosafat gobernëkaptinmi, Acabpa tsurin Jehoram+ israelïtakunata gobernar qallëkurqan, y Samaria markapitam döci watapa gobernarqan. 2 Jehoramqa Jehovä Diosta mana cäsurmi mana allikunata rurarqan. Peru papäninwan mamäninmi mas mana allikunataqa rurayarqan. Jehoramqa papänin ruratsinqan Baal santupa sagrädu columnantam juchutsirqan.*+ 3 Tsënö karpis, israelïtakunata jutsata* ruratseq Nebatpa tsurin Jeroboannöllam pëpis imëka jutsata rurarqan.+
4 Moabïta nunakunapa gobernantin Mesämi mëtsika üshata wätarqan. Y Israelpa gobernantinta impuestuta pagarmi, cien mil üshakunata y manaraq rutushqa cien mil carnërukunata entregaq. 5 Peru gobernanti Acab wanuriptinnam,+ gobernanti Mesäqa israelïtakunapa contran churakarqan.+ 6 Tsëmi gobernanti Jehoramqa Samaria markapita ëwarnin llapan israelïta soldädukunata qayatsirqan. 7 Y Judäpa gobernantin Jehosafatmampis kënö niyänampaqmi willakoqkunata mandarqan: “Moabïta nunakunapa gobernantinmi conträ churakashqa, tsëmi pelyaq ëwëkä. ¿Manatsuraq yanapëkallämankiman?”. Jehosafatnam nirqan: “Awmi,+ soldädükunawan y cawallükunawanmi yanapashqëki”.+ 8 Tsënö niskirmi, “¿më nänipatan ëwashun?” nir tapurqan. Tsënam Jehoramqa, “Edom-man ëwaq tsunyaq nänipam ëwashun” nirqan.
9 Tsënö parlarirmi Israelpa gobernantin, Judäpa gobernantin y Edompa+ gobernantin juntakëkur chikeqninkunata atacayänampaq soldädunkunawan ëwayarqan. Y qanchis junaq pasariptinqa manam soldädukunapaq ni animalninkunapaqpis yaku karqannatsu. 10 Tsëmi Israelpa gobernantinqa kënö nirqan: “¡Kananqa imanötan kashun! ¡Kimantsik gobernantikunatam Jehovä Dios këman pushamarquntsik moabïta nunakuna wanutsimänapaq!”. 11 Tsënam Jehosafatqa kënö tapurqan: “¿Këchöqa manaku Jehovä Diospa willakoqnin kan? Pëtachi tapukushwan+ Teyta Jehovä imata ninqanta musyanapaq”. Israelpa gobernantimpa sirweqninnam kënö nirqan: “Awmi, kanmi, Safatpa tsurin Eliseu.+ Pëmi Elïasta+ makinman yakuta jichapur yanapaq”. 12 Tsënö willariptinmi Jehosafatqa, “pëmi Jehovä Dios ima ninqantapis willamäshun” nirqan. Tsëmi Jehosafat, Israelpa gobernantin y Edompa gobernantin Eliseu kaqta ëwayarqan.
13 Chäriyaptinnam Eliseuqa Israelpa gobernantinta kënö nirqan: “¿Imaqtaq noqaman shamurqunki?+ Papänikiwan mamäniki tapukuyanqan willakoqkunaman tapukoq ëwankiman karqan”.+ Peru Israelpa gobernantinnam nirqan: “Manam. Jehovämi kimä gobernantikunata pushayämashqa moabïtakuna ushakätsiyämänampaq”. 14 Tsënam Eliseuqa nirqan: “Sirwinqä angelkunata mandaq Jehovä Diospa jutinchömi nï, Judäpa gobernantin Jehosafat+ këchö mana kaptinqa manam nimanqëkita wiyämantsu karqan ni rikëllapis rikaqmantsu karqan.+ 15 Kananqa arpa tocaqta ashiyämuy”.+ Tsënam arpa tocaq ëwëkur toquëkaptin, Jehovä Diosqa Eliseuta poderninwan yanaparqan.+ 16 Tsëmi kënö nirqan: “Jehovä Diosmi kënö nin: ‘Kë pampachö atska zanjakunata uchkuyë, 17 noqa Jehovämi këta nï: “Mana vientuykämuptimpis y mana tamyëkämuptimpis, animalnikikunapaq y qamkunapaqpis kë pampachömi mëtsika yaku kanqa’”.+ 18 Teyta Jehoväqa manam tsëllatatsu ruramunqa,+ sinöqa moabïta nunakunata venciyänëkipaqmi yanapayäshunki.+ 19 Tsëmi murallashqa markankunata y mas jatun markankunata ushakätsiyänëki,+ mas alli kaq montinkunata o qerunkunata mutuyänëki, llapan pukyunkunata tsapayänëki y muruna chakrankunaman+ rumita qotuyänëki”.
20 Waräninnam patsa waräriptinlla, gränupita rurashqa qarëkunata+ rupatsiyänan höranö, Edompita ëwarnin entëru pampaman yaku juntarqan.
21 Tsëpitanam moabïtakunaqa musyariyarqan pëkunawan pelyayänampaq gobernantikuna ëwashqa kayanqanta. Tsëmi pelyëta yachaq ollqukunata llapanta qayëkatsir, pelyayänampaq lindëruman mandayarqan. 22 Waränin shärikurirnam moabïtakunaqa, yakuman inti o rupay atsikyaptin yakuta rikäyarqan yawartanö pukata. 23 Tsëmi niyarqan: “¡Taqëqa yawarmi! Gobernantikunachi espädawan kikinkunapura wanutsinakuyashqa. ¡Imëkankunata dejayanqanta apakunapaq aku ëwashun!”.+ 24 Tsënö nirmi moabïta soldädukunaqa israelïtakunapa campamentunman yëkuyarqan. Tsënam israelïtakunaqa moabïta soldädukunata wanutsir qallëkuyarqan.+ Y qeshpir ëwakuyaptinmi qepankunata ëwar Moabyaq chäyarqan, y mëtsikaqtam wanutsiyarqan. 25 Markakunata ushakäratsirmi muruna chakrakunaman cada soldädu juk rumita jitarqan, tsëmi chakrakunaqa rumiwan juntarqan. Tsënöllam pukyukunata+ tsapayarqan y alli kaq qerunkunata mutur ushayarqan.+ Tsëpitanam Quir-Harëset markapa+ entëru lädupa churanakuskir, israelïta soldädukunaqa warakawan markata atacayarqan.
26 Soldädunkunata venciyanqanta rikarmi, moabïtakunapa gobernantinqa espädayoq setecientus soldädunkunawan, Edompa+ gobernantin kaqyaq pasëta munayarqan, peru manam puëdiyarqantsu. 27 Tsënam pëpa rantin gobernanampaq kaq mayor tsurinta, murälla jananman churarkur diosnimpaq ruparatsirqan.+ Tsënö rurëkuptinmi soldädukunaqa,* israelïta soldädukunawan cölerakur pelyayarqannatsu, y markankunatam kutikuyarqan.