Levïticu
1 Carpa* wayipita qayarmi Teyta Jehoväqa Moisesta+ nirqan: 2 “Israelïtakunatam* këta ninëki: ‘Mëqëkipis wätakuyanqëki animalta Teyta Jehoväta qarëta munarninqa, wäkata, töruta, cabrata o üshatam apayänëki.+
3 Teyta Diospaq ushakanqanyaq rupatsina qarëpaq töruta aparqa, sänu törutam apayänëki.+ Tsë qarëtaqa shonquykikunachö munarmi rurayänëki,+ y Teyta Jehoväpa rikëninchömi carpa* wayipa yëkunanman apayänëki. 4 Y ushakanqanyaq rupatsina qarëpaq apayanqëki törupa peqanmanmi o umanmanmi makikikunata churayänëki. Tsënöpam Teyta Diosqa qarënikikunata chaskinqa y jutsëkikunapita perdonayäshunki.
5 Tsëpitanam tsë mallwa töruta Teyta Jehoväpa rikëninchö pishtayänan. Y tsë törupa yawarnintam Aaronpa tsurin sacerdötikuna,+ Teyta Diospa rikëninman apayänan, y tsëpitanam altarpa llapan kuchunman pillchitsiyänan.*+ Tsë altarqa carpa* wayipa yëkunanchömi këkan. 6 Tsë apayanqëki animalpa qaranta jipiskirmi, ëtsanta prësa prësa roquyänan.+ 7 Y Aaronpa tsurin sacerdötikunam altarman ninata apayänan,+ y tsë nina jananmanmi yantata churayänan. 8 Tsëpitanam Aaronpa tsurin sacerdötikuna prësa prësa roquyanqan ëtsata,+ tsë animalpa peqanta o umanta y riñonninchö wirata altarchö rawrëkaq o lunyëkaq yanta jananman churayänan. 9 Aqishninta* y chakinkunataqa yakuwanmi awiyänan.* Tsëpitanam sacerdöti altar jananchö rupatsinan. Tsëqa ushakanqanyaq rupatsina qarëmi kanqa, y ninawan rupanqanqa Teyta Jehoväta alläpam gustanqa.+
10 Teyta Diospaq ushakanqanyaq rupatsina qarëpaq mëqëkipis üshata o cabrata aparqa,+ sänuta y orqutam* apayänëki.+ 11 Tsë animaltaqa altarpa izquierda kaq lädunchömi, Teyta Jehoväpa rikëninchö pishtayänan. Y Aaronpa tsurin sacerdötikunam tsë animalpa yawarninta altarpa llapan kuchunman pillchitsiyänan.*+ 12 Tsë animalpa ëtsantam prësa prësa roquyänan. Tsëpitanam peqantawan o umantawan y riñonninchö wiratawan altarchö rawrëkaq o lunyëkaq yanta jananman sacerdöti churanan. 13 Aqishninta* y chakinkunataqa yakuwanmi awiyänan,* y tsë llapantam altar jananchö sacerdöti rupatsinan. Tsëqa ushakanqanyaq rupatsina qarëmi kanqa, y ninawan rupanqanqa Teyta Jehoväta alläpam gustanqa.
14 Teyta Jehoväpaq ushakanqanyaq rupatsina qarëpaq mëqëkipis pishqukunata apëta munarqa, kullkushkunata o llullu palumakunatam apayänëki.+ 15 Y sacerdötim cada animalpa kunkanta tipshir altarpa kuchunman yawarninta shututsinan. Tsëpitanam altar jananchö tsë animalta rupatsinan. 16 Y tsë animalkunapa ukshinta y plümankunata jipiskirmi, altarpa lädunman jitanan, uchpata jitayänan läduman.+ Tsëqa inti o rupay yarqamunan lädupam këkan. 17 Ishkëman mana rakirmi älankuna këkanqampa kichanan. Y sacerdötim altarchö rupëkaq yanta jananchö rupatsinan. Tsëqa ushakanqanyaq rupatsina qarëmi kanqa, y ninawan rupanqanqa Teyta Jehoväta alläpam gustanqa.