2 Samuel

24 Israelïtakunapa contran rurananta munaqmi, Davidta kënö nirqan: “Israelchö y Judächö+ ëkaq kayanqanta musyanëkipaq censuta+ ruratsi”. Tsënö ninqanta David cäsushqa kaptinmi Jehovä Diosqa israelïtakunawan+ yapë cölerarqan. 2 Davidqa* soldädukunapa mandaqnin Joabta+ qayëkurmi nirqan: “Ëkaq kayanqanta musyanäpaq Israelchö llapan kastakunaman ëwar, Danpita Beer-Sëbayaq+ censuta ruramuy”. 3 Tsënam Joabqa gobernanti Davidta nirqan: “Teytallë, ¿imapaqtan censuta ruranäta munanki? Nunakunata Jehovä Diosnintsik kanan këkanqampita cien kuti masta atskayätsitsun y rikänëkita permititsun”.

4 Joabwan soldädukunapa mandaqninkuna tsënö niyaptimpis, Davidqa ëwayänanllatam munarqan. Tsënam Joabwan soldädukunapa mandaqninkunaqa David kaqpita yarqurir entëru Israelchö censayänampaq ëwayarqan.+ 5 Jordan mayuta* tsimpaskirmi, Aroer+ markachö y amänun markachöpis* quedakuyarqan. Y gadïta nunakuna kawakuyanqan lädupa ëwarmi, Jazer+ markayaq chäyarqan. 6 Tsëpitanam Galaad+ markakunaman y Tahtim-Hodsïman ëwayarqan. Y Dan-Jaan sitiupa+ ëwarmi Sidonpa tumayämurqan. 7 Tsëpitanam alli murallashqa Tïru markayaq ëwayarqan,+ y heveukunapa+ y cananeukunapa markankunamanmi chäyarqan. Y Nëguebchömi+ censar ushayarqan. Nëguebqa Judächömi karqan, y tsëchömi Beer-Sëba+ markapis karqan. 8 Tsënömi entëru markakunapa tumayämurqan, isqun killa y veinti junaqtam Jerusalen markaman kutiyarqan. 9 Tsëpitanam Joabqa, censanqanta gobernanti Davidta entregarqan. Israelchöqa ochocientus mil guërrapaq espädayoq soldädukunam kayarqan y Judächönam quinientus mil ollqukuna kayarqan.+

10 Peru Davidqa censuta ruratsinqampitam shonqunchö* yarpachakur mantsakarqan,+ tsëmi Jehovä Diosta kënö nirqan: “Këta rurarqa jutsallakurqömi,*+ upakuna rurayanqantam rurarqö.+ Teyta Jehovä perdonëkallämë”.+ 11 Teyta Dios ima ninqanta musyëta munarqa, Davidqa Diospa willakoqnin Gadtam+ imëpis tapoq. Waräninnam, tempränulla David shärikuriptin Teyta Jehoväqa willakoqnin Gadta kënö nirqan: 12 “Ëwar Davidta kënö nï: ‘Jehovämi këta nishunki: “Kë kiman castïgupita jukninta akrë”’”.+ 13 Tsënam Gadqa ëwarnin Davidta kënö tapurqan: “¿Mëqan castïgutataq munanki? ¿Mikuy mana kaptin entëru nacionchö qanchis watapa mallaqë kanantaku?+ ¿Chikiyäshoqnikikuna kima killapa qatikachäyäshunëkitaku?+ O ¿kima junaqpa entëru nacionchö qeshyawan wanuyänantaku?+ Alli pensëkur mëqantapis akrë mandamaqnïta willanäpaq”. 14 Tsënam Davidqa Gadta kënö nirqan: “¡Alläpa llakishqam këkä! Manam chikimaqnïkuna wanutsiyämänanta munätsu. Musyämi Jehovä Dios llakipäkoq* kanqanta,+ mejorqa kikin castiguëkamätsun”.+

15 Tsënam Jehovä Diosqa, patsa waranqampita hasta ninqan junaqyaq entëru Israelchö täkoqkunata* raslla o saslla wanutsikoq qeshyawan castigarqan.+ Danpita Beer-Sëbayaqmi+ setenta mil wanuyarqan o wañuyarqan.+ 16 Y Jerusalen markachö täkoqkunata* angel ushakätsinampaqna këkaptinmi Jehovä Diosqa llakiparqan,*+ y angeltam nirqan: “¡Tsëllachöna, ama wanutsinatsu!”. Jehovä Diospa angelninqa jebuseu+ Arauna+ nunapa ëran lädunmampam këkarqan.

17 Nunakunata angel wanuykätseqta rikëkurmi, Davidqa Teyta Jehoväta nirqan: “Dios Yaya, kë nunakunaqa*+ manam imatapis rurayashqatsu. Noqam culpayoqqa kä, noqam jutsataqa* rurarqö. Noqatawan papänïpa familianta castiguëkayämë”.+

18 Tsë junaqmi Gadqa ëwëkur Davidta nirqan: “Witsarnin jebuseu Arauna nunapa ëranchö Jehovä Diospaq altarta rurë”.+ 19 Gat tsënö willaptinmi Davidqa Jehovä Dios mandanqannö witsarqan. 20 Davidtawan sirweqninkunata witsëkaqta rikëkurmi, Arauna nunaqa ëwar gobernantipa puntanman patsamampis urkun chanqanyaq qonqurikurqan. 21 Araunam gobernanti Davidta, “Teytallë, ¿imanirtan watukallämaq shamurqunki?” nir tapurqan. Davidnam nirqan: “Ërëkita ranteqmi shamurqö, tsëchö Jehovä Diospaq juk altarta ruranäpaq. Tsënöpam nunakuna raslla o saslla wanutsikoq qeshyawan wanuyanqanatsu”.+ 22 Tsënam Arauna nunaqa Davidta nirqan: “Ërataqa qarëkushqëki teytallë, qarëkunata Teyta Diospaq tsëchö rupatsinëkipaq. Këchömi këkan rupatsinëkipaq törukuna, y yantapaqpis törukuna sutayanqan tablakuna y yügukunapis kanmi. 23 Teytallë, kë llapantam qarëkoq”. Tsëpitanam Araunaqa, “Jehovä Diosniki bendicïkushuy” nirqan.

24 Tsënam gobernanti Davidqa Arauna nunata nirqan: “Manam qaramankitsu, pagashqëkim. Qarëtukuyllawanqa manam Jehovä Diospaq pishtashqa animalta rupëkatsïmantsu”. Tsënö nirmi, Davidqa ëratawan törukunata mediu kïlupitapis mas* pläta qellëwan rantirqan.+ 25 Y tsëchömi Davidqa altarta rurëkur,+ Teyta Dioswan amïgu kayanqanta* rikätsikoq qarëkunata y pishtashqa animalkunata Jehovä Diospaq rupatsirqan. Tsëmi Jehoväqa llapan israelïtakunapaq rogakunqanta wiyëkur,+ israelïtakunata qeshyawan wanutsirqannatsu.