Levïticu

23 Tsëpitanam Teyta Jehoväqa Moisesta kënö nirqan: 2 “Israelïtakunatam këta ninëki: ‘Teyta Jehoväta adorayänëkipaq juntakäyanqëki fiestakunaqa,+ alläpa sagrädum kanqa. Tsë fiestakunaqa këkunam kayan:+

3 Joqta junaqpam trabajayänëki, peru säbadu junaqqa, Teyta Diosta adorayänëkipaq sagrädu kaptinmi imachöpis trabajayänëkitsu.+ Mëchö kawarnimpis säbadu junaq Teyta Jehoväta adorayänëkipaq kaptinmi, imachöpis trabajayänëkitsu.+

4 Teyta Jehoväta adorayänëkipaq sagrädu fiestakunataqa, pë patsätsinqan junaqchömi rurayänëki. 5 Qallanan killa catorci junaq tardim,*+ Teyta Jehoväpaq Pascua Fiestata rurayänëki.+

6 Qallanan killapa quinci kaq junaqninmi, Levadürannaq Tantata Mikuna Fiestata Teyta Jehoväpaq rurayänëki.+ Y qanchis junaqpam levadürannaq tantata mikuyänëki.+ 7 Qallanan junaqqa Teyta Diosta adorayänëkipaqmi juntakäyänëki,+ y manam trabajayänëkitsu. 8 Tsëpa rantinqa, Teyta Jehoväpaq rupatsiyänampaqmi qanchis junaqpa qarëkunata apayänëki. Y qanchis kaq junaqqa Teyta Diosta adorayänëkipaqmi juntakäyänëki, manam trabajayänëkitsu’”.

9 Tsëpitanam Teyta Jehoväqa Moisesta kënö nirqan: 10 “Israelïtakunatam këta ninëki: ‘Teyta Diosnintsik änimanqantsik markakunachöna këkar punta cosëchapitaqa,+ juk manöjutam sacerdötiman apayänëki.+ 11 Apayanqëki manöjuta säbadu junaqpa waränin puntaman y qepaman sacerdöti kuyuratsiptinmi, Teyta Jehoväqa apayanqëki qarëta chaskinqa. 12 Apayanqëki manöjuta puntaman y qepaman sacerdöti kuyutsinqan junaqmi, juk watayoq sänu carnëruta Teyta Jehoväpaq ushakanqanyaq rupatsina qarëpaq apayänëki. 13 Ishkë kïlunö* alli aqashqa harinata aceitiwan pichurkurmi gränupita rurashqa qarëpaq apayänëki. Tsëqa ninawan rupatsishqa qarëmi kanqa, y ninawan rupanqanqa Teyta Jehoväta alläpam gustanqa. Tsënöllam juk litru* vïnutapis apayänëki. 14 Teyta Diospaq qarënikikunata manaraq aparqa, manam tantata, ankashqa gränukunata ni tsëraq cosechayanqëki gränukunata mikuyänëkitsu. Teyta Diosnintsik tsënö mandakunqantaqa, mëchö kawarnimpis qamkuna y tsëpita yureq tsurikikunapis cumpliyänëkim.

15 Apayanqëki manöjuta puntaman y qepaman sacerdöti kuyutsinqan säbadupa waränin junaqpitam, qanchis säbadu junaqta yupayänëki.+ Tsëqa qanchis semänakunam kanan. 16 Y qanchis kaq säbadupa waräninyaqmi cincuenta junaqta yupayänëki,+ tsë junaqmi tsëllaraq cosechayanqëki gränu qarëkunata Teyta Jehoväpaq apayänëki.+ 17 Puntaman y qepaman Teyta Diospaq kuyutsiyänampaqmi, mëchö kawarnimpis ishkë tantata apayänëki. Tsë tantakunataqa ishkë kïlunö* alli aqashqa harinapitam rurayänëki, y levadürayoqtam kuwayänëki.+ Tsëqa punta cosechayanqëkipita Teyta Jehoväpaq apayanqëki gränu qarëmi kanqa.+ 18 Tsë tantakunatawan juntum, juk watayoq qanchis sänu orqu* üshata, mallwa töruta y ishkë carnëruta apayänëki.+ Tsë qarëkuna, gränupita rurashqa qarë y vïnu qarëqa, Teyta Jehoväpaq ushakanqanyaq rupatsina qarëmi kanqa. Y ninawan rupanqanqa Teyta Jehoväta alläpam gustanqa. 19 Jutsëkikunapita* perdonashqa kayänëkipaqmi mallwa chïvuta* apayänëki,+ y Teyta Dioswan amïgu kayanqëkita rikätsikurmi juk watayoq ishkë orqu* üshata apayänëki.+ 20 Y sacerdötim ishkan orqu* üshapa ëtsanta, y apayanqëki tantakunata qepaman y puntaman kuyutsinqa. Tsë tantakunaqa, punta cosechayanqëki gränukunapita Teyta Jehoväpaq apayanqëki kuyutsishqa qarëmi kanqa. Tsë qarëqa Teyta Jehoväpa rikënimpaq sagrädum kanqa, y sacerdötipaqmi kanqa.+ 21 Tsë junaqmi Teyta Diosta adorayänëkipaq juntakäyänëki,+ y manam trabajayänëkitsu. Teyta Diosnintsik tsënö mandakunqantaqa, mëchö kawarnimpis qamkuna y tsëpita yureq tsurikikunapis cumpliyänëkim.

22 Murukuyanqëkita cosecharqa, manam kuchun kuchunyaq cosechayänëkitsu ni shikwanqantapis pallayänëkitsu.+ Tsëtaqa waktsakunapaq+ y forastërukunapaqmi+ dejayänëki. Noqam Jehovä Diosnikikuna kä’”.

23 Tsëpitanam Teyta Jehoväqa Moisesta kënö nirqan: 24 “Israelïtakunatam këta ninëki: ‘Qanchis kaq killapa punta kaq junaqninqa, manam imachöpis trabajayänëkitsu. Tsë junaqtaqa imëpis yarpäyänëkim, y trompëta waqaqta wiyarmi+ Teyta Diosta adorayänëkipaq juntakäyänëki. 25 Tsë junaqqa Teyta Jehoväpaq rupatsiyänampaqmi qarëkunata apayänëki, y manam trabajayänëkitsu’”.

26 Tsëpitanam Teyta Jehoväqa Moisesta kënö nirqan: 27 “Y qanchis kaq killapa chunka kaq junaqninqa, Jutsata* Rurayanqëkipita Perdonashqa Kayänëkipaq Junaqmi kanqa.+ Tsë junaqqa, noqata adorayämänëkipaqmi juntakäyänëki. Tsë junaqqa jutsata rurayanqëkipitam llakikuyänëki,*+ y noqa Jehoväpaq rupatsiyänampaqmi qarëkunata apayämunëki. 28 Tsë junaqqa noqa Jehovä Diosnikikunapa rikënïchö jutsata* rurayanqëkipita perdonashqa kayänëkipaqmi qarëkunata apayänëki,+ tsëmi imachöpis trabajayänëkitsu. 29 Pï nunapis, jutsata* ruranqampita tsë junaqchö mana llakikuptinqa,* tsë nunaqa wanunanmi o wañunanmi.+ 30 Y pï nunapis tsë junaqchö ima trabäjutapis ruraptinqa, kikïmi wanutsishaq. 31 Tsë junaqqa manam trabajayänëkitsu. Kë mandakunqätaqa, mëchö kawarnimpis qamkuna y tsëpita yureq tsurikikunapis cumpliyänëkim. 32 Tsë säbaduqa, säbadu tardipita waränin tardiyaqmi imachöpis trabajayänëkitsu. Y isqun junaq tardiqa, jutsata* rurayanqëkipitam llakikuyänëki”.+

33 Tsëpitanam Teyta Jehoväqa Moisesta kënö nirqan: 34 “Israelïtakunatam këta ninëki: ‘Qanchis killapa quinci kaq junaqninmi, qanchis junaqpa Teyta Jehoväpaq Ramäda* Fiestata rurayänëki.+ 35 Qallanan junaqqa Teyta Diosta adorayänëkipaqmi juntakäyänëki, y manam trabajayänëkitsu. 36 Qanchis junaqpam Teyta Jehoväpaq rupatsiyänampaq qarëkunata apayänëki. Y puwaq kaq junaqqa Teyta Diosta adorayänëkipaqmi juntakäyänëki, y Teyta Jehoväpaq rupatsiyänampaqmi qarëkunata apayänëki. Tsëqa sagrädu reunionmi kanqa,+ y manam trabajayänëkitsu.

37 Teyta Jehoväta adorayänëkipaq sagrädu fiestakunachöqa,+ Teyta Jehoväpaqmi kë qarëkunata apayänëki: ushakanqanyaq rupatsina qarëkunata,+ gränupita rurashqa qarëkunata+ y vïnuta.+ Tsë qarëkunataqa cada junaqpaq Teyta Diosnintsik mandakunqannömi rupatsiyänëki. 38 Tsë qarëkunaqa, Teyta Jehoväta adorayänëkipaq juntakarnin säbaduchö apayanqëki qarëkunapita apartim kanqa.+ Y apartim kanqa, imatapis änikurnin apayanqëki qarëpita,+ kikikikuna munarnin apayanqëki qarëpita+ y Teyta Jehoväpaq apayanqëki juk qarëkunapita.+ 39 Y qanchis killapa quinci kaq junaqninqa, murukuyanqëkita cosecharirmi qanchis junaqpa Teyta Jehoväpaq fiestata rurayänëki.+ Qallanan kaq junaq y puwaq kaq junaqqa, manam imachöpis trabajayänëkitsu.+ 40 Qallanan junaqqa, shumaq jatun plantakunapa frütanta, palmërapa rämanta,+ atska rämayoq jatun plantakunapa rämanta y pampakunachö winaq plantakunapa* rämantam pallayänëki. Y qanchis junaqpam+ Teyta Jehoväpa rikëninchö kushishqa kayänëki.+ 41 Watapa qanchis killanchömi, qanchis junaqpa Teyta Jehoväpaq tsë fiestata rurayänëki.+ Teyta Diosnintsik tsënö mandakunqantaqa, mëchö kawarnimpis qamkuna y tsëpita yureq tsurikikunapis cumpliyänëkim. 42 Llapëki israelïtakunam qanchis junaqpa ramädakunachö kawayänëki.+ 43 Tsënöpam tsëpita yureq tsurikikuna musyayanqa,+ Egiptupita pushayämupteq ramädakunachö kawayanqëkita.+ Noqam Jehovä Diosnikikuna kä’”.

44 Tsënömi Moisesqa, Teyta Jehoväta adorayänampaq juntakarnin ima fiestakunata rurayänampaq kaqta israelïtakunata willarqan.