Zacarïas
14 “¡Rikäyë! Teyta Jehovä nunakunata juzganan tiempum chëkämunna, tsë tiempuqa llapan imëkëkikunatam puntëkikunachö rakipänakuyanqa. 2 Jerusalenpita nunakunaman guërrata ruraq ëwayänampaqmi llapan nacionpita nunakunata juntashaq, tsë markaman yëkurmi wayikunapita imëkata apakuyanqa y warmikunata violayanqa. Tsë markapita pullan nunakunatam juk nacionman apakuyanqa, y pullan kaqkunanam tsë markachö quedayanqa.
3 Unë witsan guërrata rurar pelyanqannöllam,+ Teyta Jehoväqa tsë nacionkunaman guërrata ruraq ëwanqa.+ 4 Tsë tiempuqa Jerusalenpa frentin inti o rupay yarqamunan läduchö olïvus+ jirkachömi chakinkuna këkanqa. Olïvus jirkaqa, inti o rupay yarqamunan lädupita, inti o rupay jeqanan läduyaqmi ishkëman rurakanqa, tsë partikar ëwanqanchömi jatun zanja quedanqa. Pullan kaq jirkam norti läduman kichakanqa y pullan kaqnam sur kaq läduman. 5 Qamkunaqa Judächö Uzïas+ gobernanqan witsan patsa feyupa kuyuptin qeshpir ëwakuyanqëkinömi, tsë jirkakunapa chowpinchö* këkaq zanjaman qeshpir ëwayanki. Y Jehovä Diosnïmi juiciuta ruraq shamunqa, y pëpa rikënimpaq limpiu nunakunam pëwan këkäyanqa.+
6 Tsë tiempuqa manam shumaq atsikyaq aktsikuna kanqatsu,+ y imëkapis këkanqanllachömi quedakunqa. 7 Tsë tiemputaqa nunakunata Teyta Jehovä juzganan tiempu nirmi reqiyanqa.+ Tsë tiempuqa manam junaqpis ni paqaspis kanqatsu, y paqasyäriptimpis aktsiqa këkanqallam. 8 Tsë tiempuqa Jerusalenpitam+ kawë apamoq yaku yarqamunqa.+ Pullan kaqmi inti o rupay yarqamunan läduchö lamarman* ëwanqa,+ y pullan kaqnam inti o rupay jeqanan läduchö lamarman* ëwanqa.+ Usya witsan y tamya witsampis tsënöllam kanqa. 9 Teyta Jehovämi entëru patsata gobernanqa.+ Tsë tiempuqa llapankunam Teyta Jehovällatana adorayanqa,+ y pëpa jutinllatana alabayanqa.+
10 Entëru nacionmi, Guëba+ markapita Jerusalenpa derëcha lädunchö Rimon+ markayaq Arabä+ pampanö quedanqa. Jerusalenqa këkanqan sitiuchömi* wakin markakunapita mas reqishqa kanqa,+ y Benjamin Punku+ niyanqampita qallëkur Punta Punku niyanqanyaq, y Esquïna Punku niyanqanyaqmi nunakuna kawayanqa. Tsënöllam Hananel Törri+ niyanqampita, gobernaqpa vïnunta rurayänan* sitiuyaqpis nunakuna kawayanqa. 11 Tsëchö nunakunaqa manam imëpis ushakäyanqatsu.+ Jerusalenchö nunakunaqa segürum kawayanqa.+
12 Teyta Jehoväqa Jerusalenman guërrata ruraq ëwashqa nunakunatam kë qeshyakunawan castiganqa:+ kawëkäyaptinmi ëtsankunapis ismur ushakanqa, nawinkunapis këkanqanchömi ismur ushakäyanqa, tsënöllam qallunkunapis shiminkuna rurinchö ismur ushakanqa.
13 Tsë tiempum Teyta Jehoväqa kikinkunapura pantatsinakur ushayänanta permitinqa, y llapankunam makimpita aptarkur nuna mayinkunata* wanutsiyanqa.+ 14 Judä nunakunapis Jerusalenchö rurayanqan guërrachömi pelyayanqa, y lädunkunachö nacionkunapa örunkunawan, plätankunawan y mëtsika röpankunawanmi quedakuyanqa.+
15 Tsë qeshyallam campamentunkunachö cawallukunaman, mulakunaman, camëllukunaman, ashnukunaman y wakin animalkunamampis chanqa.
16 Jerusalenman guërrata ruraq ëwashqa nacionkunapita quedaqkunaqa, cada watam+ Llapanta Gobernaq y angelkunata mandaq Teyta Jehoväta adoraq,+ y Ramäda* Fiestata ruraq Jerusalenman witsäyanqa.+ 17 Peru tsë nacionkunapita mëqan nunallapis, Llapanta Gobernaq y angelkunata mandaq Teyta Jehoväta adoraq mana ëwaptinqa, manam tsë nacionchö nunakunapaq tamya kanqatsu.+ 18 Egiptupita nunakuna Jerusalenman mana witsäyaptinqa, pëkunapaqpis manam tamya kanqatsu, y Teyta Jehoväqa Ramäda Fiestaman mana ëwaq nacionkunata castiganqan qeshyawanmi pëkunatapis castiganqa. 19 Ramäda Fiestaman mana ëwayaptinqa, Egiptupita nunakunata y wakin nacionpita nunakunatapis Teyta Diosqa tsënömi castiganqa.
20 Tsë tiempuqa cawallukuna wallqaräyanqan taksha campanakunachömi, ‘Teyta Jehoväqa imëkachöpis limpiu Diosmi’+ nir qellqaranqa. Teyta Jehoväpa wayinchö utilizäyanqan mankakunapis*+ altar puntanchö këkaq tazonkunanömi+ kayanqa. 21 Jerusalenchö y Judächö llapan mankakunam* limpiu kayanqa, y angelkunata mandaq Teyta Jehoväpam kayanqa. Y qarëkunata apaqkunam, mikuyninkuna rurayänampaq wakin mankakunata utilizäyanqa. Tsë tiempuqa angelkunata mandaq Teyta Jehoväpa wayinchöqa manam cananeu nunakuna* kayanqanatsu”.+