Juëces

6 Yapëmi israelïtakunaqa Teyta Jehoväta mana cäsukur mana allikunata rurar qallëkuyarqan.+ Tsëmi Jehoväqa madianïta nunakunapa makinchö sufriyänampaq qanchis watapa dejaskirqan.+ 2 Madianïta nunakunam israelïtakunata dominayarqan.+ Pëkunapa culpanmi israelïtakunaqa jirkakunachö, machëkunachö y fäcil-lla mana chänan sitiukunachö* kawayarqan.+ 3 Israelïtakuna cada murukuyaptinmi madianïta y amalequïta+ nunakuna y inti o rupay yarqamunan läduchö+ kawaq nunakuna pëkunawan pelyayaq. 4 Pëkunaqa israelïtakunawan pelyëta munarmi, campamentunkunata armayaq y llapan murukuyanqantam Gäza kinrëyaq ushakätsiyaq. Israelïtakuna mikuyänampaqqa manam imatapis dejayaqtsu, manam üshakunata ni törukunata ni ashnukunatapis dejayaqtsu.+ 5 Animalninkunawan y carpankunawanmi* witsäyaq. Mëtsika chukllushkunanömi*+ kayaq. Pëkunaqa mëtsikam kayaq y camëllunkunapis mëtsikam kaq.+ Entëru nacionman yëkuskirmi llapanta ushakätsiyaq. 6 Tsënö rurarmi madianïta nunakunaqa israelïtakunata pasëpa* waktsayätsiyarqan, tsëmi israelïtakunaqa Jehovä Diosman rogakuyarqan yanapanampaq.+

7 Madianïta nunakunapita salvanampaq Teyta Jehoväman israelïtakuna mañakuyaptinmi,+ 8 Teyta Jehoväqa juk willakoqta mandarqan, pëmi kënö nirqan: “Këtam Israelpa Diosnin Jehovä niyäshunki: ‘Noqam esclävu kayanqëki Egiptupita qamkunata salvamurqä.*+ 9 Egiptupita y llapan sufritsiyäshoqnikikunapitam qamkunata salvamurqä.* Rikëkäyaptikim chikiyäshoqnikikunata ushakätsirqä y markankunatam qamkunata entregarqä.*+ 10 Y kënömi nirqä:* “Noqam Jehovä Diosnikikuna kä.+ Ama këkäyanqëki markakunachö amorreu nunakunapa santunkunata adorayankitsu”.*+ Tsënö nikaptïpis qamkunaqa manam cäsuyämarqunkitsu’”.+

11 Tsëpitanam Teyta Jehoväpa angelnin chëkur,+ Ofrächö këkaq jatun montipa o jatun qerupa chakinchö jamakurqan, tsë montiqa abï-ezrïta+ Joaspam+ karqan. Joaspa tsurin Gedeonqa, madianïta nunakuna gränuta mana rikäyänampaqmi vïnu rurayänan pözuchö* trïguta takëkarqan. 12 Tsëchömi Teyta Jehoväpa angelnin yuripurqan y kënö nirqan: “Qamwanmi Jehovä Dios këkan,+ valienti nuna”. 13 Tsënam Gedeonqa nirqan: “Disculpëkamë teytallë. Noqakunawan Jehovä Dios këkaptinqa, ¿imanirtan kë mana allikuna pasëkäyäman?+ ¿Mëtan unë espantëpaq ruranqan cösaskuna?+ Papänïkunaqa, ‘Jehovä Diosmi Egiptupita salvayämarqan’+ nirmi willayämarqan. Peru kananqa Teyta Jehovä qonqëkayämashqam+ y madianïta nunakuna sufritsiyämänampaqmi dejarayämashqa”. 14 Teyta Jehovänam pëman tumëkur nirqan: “Ëwë, kapushunqëki kallpawanmi madianïta nunakunapa makimpita israelïtakunata salvanki.+ ¿Manaku noqa mandëkaq?”. 15 Y Gedeonnam nirqan: “Perdonëkamë Teyta Jehovä, familiäqa* Manasespa kastanchö mana kaqllam; y papänïpa familianchöqa noqalläpis mana kaqllam kallä. Tsëqa, ¿imanötan Israelta noqa salvashaq?”. 16 Tsënam Teyta Jehoväqa nirqan: “Noqam yanapashqëki+ madianïta nunakunata juk nunatanölla ushakätsinëkipaq”.

17 Tsënam Gedeonqa nirqan: “Rikënikichö alli kallaptïqa, qam parlapëkämanqëkita musyanäpaq juk señalta rikätsimë. 18 Amaraq ëwakuyraqtsu qarëta munanqäta aparamunqäyaq”.+ Tsënam angelqa, “kutimunqëkiyaqmi këchö këkäshaq” nirqan. 19 Y Gedeonqa jinan höra ëwarmi, llullu cabrata pishtëkur cocinarirqan y onci kïlusnö* harinapitam levadürannaq tantata rurarqan.+ Tsëpitanam ëtsata juk canastaman winarqan y calduntanam juk mankaman alistarqan. Tsë llapantam aparqan, y jatun monti o jatun qeru chakinchömi sirwirirqan.

20 Diospa* angelninmi nirqan: “Ëtsata y levadürannaq tantata taqë jatun rumi jananman churarkuy y calduntana jananman jichë”. Y tsëtam Gedeon rurarqan. 21 Tsënam Teyta Jehoväpa angelninqa ëtsata y levadürannaq tantata tukrumpa puntanwan topëkurqan. Tsëmi jatun rumipita nina yarqur, ëtsatawan levadürannaq tantata rupar usharirqan.+ Y Gedeonqa mananam Jehovä Diospa angelninta rikarqannatsu. 22 Tsë höram Gedeonqa Teyta Jehoväpa angelnin kanqanta cuentata qokurqan.+

Tsëmi nirqan: “¡Llapanta Gobernaq Teyta Jehovä, kananqa imaraq pasamanqa! ¡Teyta Jehoväpa angelnintam rikëkurqö!”.+ 23 Tsënam Jehovä Diosqa nirqan: “Ama yarpachakuytsu, ni mantsakëtsu;+ manam wanunkitsu”. 24 Tsëmi Gedeonqa Jehovä Diospaq altarta tsëchö rurarqan y tsëtam Jehovä-Salom*+ nir kananyaq reqiyan. Y abï-ezrïta nunakunapa Ofrä markankunachömi kananyaq këkan.

25 Tsë paqasmi Jehovä Diosqa Gedeonta kënö nirqan: “Papänikipa mallwa törunta apë, qanchis watayoq törunta. Tsëpitana Baal santupaq papäniki ruranqan altarta juchuratsi* y altar lädunchö këkaq Aserä santupa postinta* walluri.+ 26 Tsëpitana, kë jirkachö rumikunata fïlatsipa churar noqa Jehovä Diosnikipaq altarta perqamunki. Tsë altarchö apanqëki mallwa töruta, Aserä santupa posti* qerunwan noqapaq rupatsimunki”. 27 Tsënam Gedeonqa chunka sirweqninkunata qayarqan, y Jehovä Dios mandanqannöllam llapanta rurarqan. Peru papänimpa familiankunata y tsë markachö nunakunata mantsarmi, junaqpa ruranampa rantin paqasllapa rurarqan.

28 Y tsë markachö nunakunaqa waränin shärikurirnam, Baal santupa altarninta juchushqata* y lädunchö Aserä santupa postinta* wallushqata rikäriyarqan. Y juk mushoq altarchö mallwa töruta rupatsiyanqantapis rikäriyarqanmi. 29 Tsëmi kikinkunapura, “¿pitaq këta rurashqa?” nir tapunakuyarqan. Alli musyapakurirnam, “Joaspa tsurin Gedeonmi kashqa” niyarqan. 30 Tsënam tsë nunakunaqa Joasta kënö niyarqan: “¡Tsurikita entregayämë wanutsiyänäpaq! Pëmi Baalpa altarninta juchutsishqa* y lädunchö këkaq Aseräpa postinta* wallushqa”. 31 Tsënam Joasqa+ contran këkaqkunata nirqan: “¿Baalqa wananku qamkuna defendiyänëkita? ¿Wananku salvayänëkita? Pillapis defendeq kaqqa kanan höram wanunqa o wañunqa.+ Altarninta ushakëkätsiyaptinqa, rasumpa dios karqa kikin defendikutsun”.+ 32 Tsë junaqpitam Gedeontaqa Jerubaal* nir qayarqan, tsënöqa qayarqan, “altarninta ushakëkätsiyaptinqa kikin Baal defendikutsun” nishqa karninmi.

33 Madianïta+ nunakuna, amalequïta+ nunakuna y inti o rupay yarqamunan+ läduchö täkoqkunam,* llapan soldädunkunawan juntakarkur mayuta* tsimpar Jezreel pampachö* campamentunkuna rurayarqan. 34 Y Jehovä Diosqa Gedeontam+ poderninwan yanaparqan. Tsëmi waqrapita trompëtata tocariptin+ abï-ezrïta+ familiakuna pëwan ëwayänampaq juntakäyarqan. 35 Manasespa wakin kastankunamampis mandarqanmi willakoqkunata, tsëmi Manasespa kastankunapis juntakärir pëwan ëwayarqan. Tsënöllam Aserpa kastankunaman, Zabulonpa kastankunaman y Neftalïpa kastankunaman willakoqkunata mandarqan, tsëmi pëkunapis Gedeonwan tarinakuyänampaq witsäyarqan.

36 Tsëpitanam Gedeonqa Teyta Diosta kënö nirqan: “Änikunqëkinö Israelta salvanäpaq yanapamänëki kaptinqa,+ 37 mä juk pruëbata rikätsimë: juk vellon millwatam* ëraman* churashaq, y tsë vellon millwata shullya* oquptin y patsa tsakilla kaptinqa, änikunqëkinö Israelta salvanäpaq kaqtam musyashaq”. 38 Y tsënömi pasakurqan. Waränin tempränulla sharkurnam, vellon millwata qaptsirqan y yakuqa jatun tazon juntanömi yarqurqan. 39 Tsënö kaptimpis, Gedeonqa Teyta Diostam nirqan: “Ama cölerakullëtsu, juk masta mañarillashqëki. Kë vellon millwawan juk pruëba masta rurëkallämuy. Patsata shullya* oqüritsun, peru vellon millwalla tsaki quedarillätsun”. 40 Tsëtam tsë paqas Teyta Dios rurarqan. Patsata shullya* oqushqa kaptimpis, vellon millwaqa tsakillam këkarqan.