Amos
2 Teyta Jehovämi kënö nin:
‘“Moab+ nunakunataqa, mana cäsukur jutsata* rurayanqampitam castigashaq, manam castïgunnaqtaqa dejashaqtsu.
Pëkunaqa Edomchö gobernantipa tulluntam uchpayanqanyaq rupatsiyarqan.
2 Tsënö kayanqampitam, Moabtaqa imëka ninawannö ushakätsishaq,
tsëmi Queriyot+ sitiuchö alli murallashqa törrinkunapis ushakanqa.
Guërrachö qayëkachëkäyaptin, büllata rurëkäyaptin y waqrapita trompëtata toquëkäyaptinmi
moabïta nunakunaqa wanur ushakäyanqa.+
3 Gobernantintam ushakätsishaq
y dirigentinkunatapis wanutsishaqmi”+ ninmi Teyta Jehovä’.
4 Jehovä Diosmi kënö nin:
‘Judä nunakunataqa, mana cäsukur jutsata*+ rurayanqampitam castigashaq, manam castïgunnaqtaqa dejashaqtsu.
Pëkunaqa noqa Jehovä entreganqä leytam cäsukuyashqatsu,
y mandakunqätapis manam wiyakuyashqatsu.+
Pëkunaqa unë kastankunanöllam engañayanqanta creir, imëka mana allikunaman chäyashqa.+
5 Tsënö kayanqampitam, Judätaqa imëka ninawannö ushakätsishaq,
tsëmi Jerusalen markapa alli murallashqa törrinkunapis ushakanqa’.+
6 Jehovä Diosmi kënö nin:
‘Israel nunakunataqa, mana cäsukur jutsata* rurayanqampitam+ castigashaq, manam castïgunnaqtaqa dejashaqtsu.
Qellëta kuyarmi pëkunaqa culpannaq nunakunata rantikuyashqa
y waktsa nunakunatam juk par llanqiwan cambiayashqa.+
Papänin kakunqan* warmiwanmi tsurimpis kakun,
tsëkunata rurarmi limpiu jutïta mana allichö quedatsiyashqa.
8 Prenda quedatsiyanqan+ röpakunatam llapan altarkunapa+ lädunchö qopikuyan,
multata cobrakuyanqan qellëwan vïnuta rantïkurmi santunkunapa templunchö upyakuyan’.
9 ‘Peru noqam sirwimaqnïkuna libri pasayänampaq amorreu+ nunakunataqa ushakätsirqä.
Amorreukunaqa cedrunö jatusaq y roblinö chukrum kayarqan.
Tsënö këkäyaptimpis llapan wayunqanta y troncuntapis ushakätsirqämi.+
10 Sirwimaqnïkunataqa noqam yanaparqä Egiptupita yarqayämunampaq+
y cuarenta watapam tsunyaq jirkakunapa pushamurqä,+
tsëpitanam amorreu nunakunapa markankunata entregarqä.
Israel nunakuna, ¿manaku tsënö karqan?’ ninmi Teyta Jehovä.
12 ‘Peru sirwiyämänampaq akranqä nunakunatam* vïnuta upyatsiyarqunki+
y willakoqnïkunatam, “ama willakuyënatsu” niyarqunki.+
13 Imanömi segashqa trïgun cargakushqa carrëta ëwar imatapis jarur ushakätsin,
tsënömi qamkunata tsëllachö ushakätsiyashqëki.
14 Alli cörreq karpis manam mëmampis qeshpita puëdinqatsu,+
kallpasapa karpis manam defendikuyta puëdinqatsu,
y guërrachö alli pelyëta yacharpis manam salvakunqatsu.
15 Flechana arcuta manejaqpis manam flechëta puëdinqatsu,
alli cörreq karpis manam qeshpita puëdinqatsu,
y cawallun montashqa soldädupis manam salvakunqatsu.
16 Tsë junaqqa guërrakunachö alli pelyaq valienti soldädu karpis
qalapächum qeshpir ëwakunqa’+ ninmi Teyta Jehovä”.