Ezequiel

4 Qamqa, nunapa tsurin, juk ladrïlluta puntëkiman churë y tsë ladrïlluchö Jerusalen markata dibujë. 2 Markapa entërumpa cercuta churë,+ murällan waqtampa altu perqata rurë,+ atacayänampaq murälla waqtampa allpata qotuy,+ lädunkunamanna atacayänampaq soldädukunapa campamentunta churë y murällata ushakätsiyänampaq mäquinakunata rurë.+ 3 Y fiërru tablata churë imëka murällanö qamta y markata rakishunëkipaq. Tsëpitana imëka atacanëkipaqnö alli rikarë y tsëchö tsaparanki, ama ëwakunkitsu. Tsëta rikarmi Israel nunakuna musyayanqa, imapa pasayänampaq kaqta.+

4 Tsëpitana Israel nunakuna jutsata* rurayanqampita, izquierda kaq läduykipa tsë marka lädunchö jitaranki.+ Qammi pëkuna jutsata rurayanqampita llapan junaqkuna izquierda kaq läduykipa jitaranki. 5 Noqam mandëkaq trescientus noventa junaqpa tsënö jitaranëkipaq.+ Tsë junaqkunaran igualanqa Israel nunakuna jutsata* rurar kayanqan watakunawan. Israel nunakunapa jutsankunapitam qamqa tsëta ruranëki. 6 Tsëta cumpliskirnam, derëcha kaq laduykipana cuarenta junaqpa jitaranëki.

Tsëtaqa ruranëki Judä+ nunakuna jutsata* rurayanqampitanam. Juk wata jutsa rurayanqampitam juk junaq jitaranëki, juk watapita juk junaq. Tsëta ruranëkipaqmi mandëkaq. 7 Tsëpitana Jerusalen markapa cercunta alli rikarë+ y makikita remanguëkur ima pasanampaq kaqta willakuy.

8 Juk kaq läduykiman mana tumanëkipaqmi, waskawan alli watashqëki. Tsënöpam ushakätsinëkipaq ninqä junaqkuna cumplinqanyaq jitaranki.

9 Trïguta, cebädata, häbasta, lentëjasta, mïjuta* y centënuta aqaskatsir tazonman winanki y tsëchö pichurir tantata ruranki. Tsë tantata mikunki izquierda kaq läduykipa jitaranqëki trescientus noventa junaqkunapa.+ 10 Cada junaq mikunëkipaq media librallata* pesanki, y cada junaq mikunqëki hörallachö mikunki.

11 Yakutapis medishqallatam upunëki. Cada junaq upunqëki hörachömi ishkë täzallata* upunëki.

12 Y cebädapita rurashqa redondu tantata mikunqëkinölla, tantëkita mikunki. Tsë tantataqa, llapankuna rikëkäyaptin nunapa ismanin karkawan kuwanki”. 13 Tsëpitanam Teyta Jehoväqa kënö nimarqan: “Tsënömi Israelïtakunaqa mëtsë nacionkunaman qarquptï tantankunata melanëpaqta* mikuyanqa”.+

14 Tsënam noqaqa kënö nirqä: “Llapanta Gobernaq Teyta Jehovä, ¡manam tsëtaqa rurëta puëdïtsu! Jövin kanqäpita kananyaqpis manam wanushqa o wañushqa animalta, ni chukaru animal wanutsinqan animalpa ëtsanta mikurqötsu,+ ni manam melanëpaq kaqtaqa ima ëtsatapis mikurqötsu”.+

15 Tsënö niptïnam kënö nimarqan: “Tsëqa nunapa ismanin karkawan kuwanëkipa rantin, wäkapa karkanwan tantëkita kuwë”. 16 Tsëpitanam kënö nimarqan: “Nunapa tsurin, noqa munaptïmi Jerusalenchöqa+ mikuy kanqatsu.* Tsëmi nunakunaqa tantatapis pakipillatana llakishqa mikuyanqa,+ y yakutapis medirmi ichik ichiklla mantsakashqa upuyanqa.+ 17 Tantankunapis, yakunkunapis mana tinkuptinmi mantsakashqa rikaränakuyanqa. Y jutsata* rurayanqampita llakikurmi alläpa yarpachakurlla kakuyanqa.