Levïticu

9 Puwaq kaq junaqnam,+ Moisesqa Aarontawan tsurinkunata y Israelchö dirigeqkunata qayatsirqan. 2 Y Aarontam kënö nirqan: “Jutsëkipita* perdonashqa kanëkipaqmi sänu mallwa töruta apamunëki,+ y ushakanqanyaq rupatsina qarëpaqnam sänu carnëruta apamunëki. Tsëkunataqa Teyta Jehoväpa rikëninmanmi apamunëki. 3 Y israelïta mayintsikkunatam këta ninëki: ‘Jutsëkikunapita* perdonashqa kayänëkipaqmi chïvuta* apayämunëki. Teyta Diospaq ushakanqanyaq rupatsina qarëpaqnam, juk watayoq sänu mallwa töruta y juk watayoq sänu mallwa carnëruta apayämunëki. 4 Teyta Jehoväwan amïgu kayanqëkita rikätsikurmi, pëpa rikëninchö pishtar rupatsiyänampaq juk töruta y juk carnëruta apayämunëki.+ Tsënöllam gränupita rurashqa qarëtapis apayämunëki.+ Kanan junaq Teyta Jehovä yuripuyäshunëki kaptinmi tsëkunataqa rurayänëki’”.+

5 Tsënam israelïtakunaqa Moises apayänampaq ninqanta carpa* wayipa puntanman apayarqan. Y llapankunam Teyta Jehoväpa rikëninchö shëkar* quedakuyarqan. 6 Tsënam Moisesqa pëkunata nirqan: “Teyta Jehovä alläpa puëdeq kanqanta rikäyänëkipaqmi, Teyta Jehoväqa këta rurayänëkipaq mandakushqa”.+ 7 Tsëpitanam Moisesqa Aaronta nirqan: “Jutsëkipita* perdonashqa kanëkipaq qarëta y Teyta Diospaq ushakanqanyaq rupatsina qarëpaq apamunqëki animalkunata pishtar altarchö rupatsi,+ tsënöpa qam+ y familiëkipis jutsata rurayanqëkipita perdonashqa kayanki. Tsënöllam israelïta mayintsikkuna apayämunqan animalkunatapis rupatsinëki,+ tsënöpa jutsankunapita perdonashqa kayänampaq.+ Tsëtaqa ruranëki Teyta Jehovä mandakunqannöllam”.

8 Tsënam Aaronqa altar kaqman ëwëkur jutsampita* perdonashqa kanampaq apanqan mallwa töruta pishtarqan.+ 9 Y tsë törupa yawarninta tsurinkuna makyariyaptinmi,+ Aaronqa yawarman dëdunta tullpurkur altarpa waqrankunata llushirqan. Wakin yawartanam altarpa chakinman jicharqan.+ 10 Tsëpitanam Aaronqa jutsampita* perdonashqa kanampaq apanqan törupa wiranta, ishkan riñonninta y ñatinninchö wirata jipir Teyta Diospaq rupatsirqan. Tsëtaqa rurarqan Teyta Jehovä Moisesta mandanqannöllam.+ 11 Tsë törupa ëtsanta y qarantaqa, campamentupita karuman apëkurmi ushakanqanyaq rupatsirqan.+

12 Tsëpitanam Teyta Diospaq ushakanqanyaq rupatsina qarëpaq apanqan üshata pishtarqan. Y tsë üshapa yawarninta tsurinkuna makyariyaptinmi, Aaronqa altarpa llapan lädunkunaman tsë yawarta pillchitsirqan.*+ 13 Tsënöllam ushakanqanyaq rupatsina qarëpaq apanqan üshapa ëtsantapis prësa prësa roqur, tsë prësakunata y üshapa peqanta o umanta Aaronta makyayarqan, y pënam altarchö rupatsirqan. 14 Tsëpitanam tsë üshapa aqishninta* y chakinkunata yakuwan awirqan,* y altarchö ushakanqanyaq rupatsina qarëkunapa jananmanmi rupanampaq churarqan.

15 Tsëpitanam, israelïtakuna jutsankunapita* perdonashqa kayänampaq apayanqan chïvuta* pishtarqan. Y jutsata ruranqampita apanqan mallwa töruta altarchö rupatsinqannöllam, israelïtakuna apayanqan chïvutapis rupatsirqan. 16 Y ushakanqanyaq rupatsina qarëtapis Teyta Dios mandakunqannöllam rupatsirqan.+

17 Tsëpitanam apayanqan harinapita aptarkur,+ patsa warë ushakanqanyaq rupatsina qarëkunatawan altarchö rupatsirqan.+

18 Tsëpitanam Teyta Dioswan amïgu kayanqanta rikätsikur israelïtakuna apayanqan töruta y carnëruta pishtarqan. Y tsë animalkunapa yawarninta tsurinkuna makyäriyaptinmi, Aaronqa altarpa llapan lädunman tsë yawarta pillchitsirqan.*+ 19 Y törupa wiranta,+ carnërupa chupanchö wirata, aqishninchö* wirata, ishkan riñonninta y ñatinninchö wiratam jipiyarqan.+ 20 Y tsë llapan wiratam ishkan animalpa pëchun jananman churayarqan. Tsëpitanam Aaronqa tsë llapanta altarchö rupatsirqan.+ 21 Peru tsë animalkunapa pëchunta y derëcha kaq chankankunataqa, Teyta Jehoväpa rikëninchömi puntaman y qepaman kuyutsirqan. Tsëtaqa rurarqan Teyta Dios Moisesta mandanqannöllam.+

22 Jutsankunapita* perdonashqa kayänampaq apayanqan qarëkunata, Teyta Diospaq ushakanqanyaq rupatsina qarëkunata y Teyta Dioswan amïgu kayanqanta rikätsikur apayanqan qarëkunata ruparatsirmi, Aaronqa makinta pallarkur* llapan israelïtakunata bendicirqan.+ Tsëpitanam altarpita bajarqan. 23 Tsëpitanam Moiseswan Aaronqa carpa* wayiman yëkuyarqan, y yarqaramurmi llapan israelïtakunata bendiciyarqan.+

Tsë höram israelïtakunaqa Teyta Jehovä alläpa puëdeq kanqanta rikäyarqan.+ 24 Y Teyta Jehoväpita nina yarqamurmi+ altarman churayanqan wirata y ushakanqanyaq rupatsina qarëkunata usharirqan. Tsëta rikarnam israelïtakunaqa kushikurnin qayëkachar urkunkunapis patsaman chanqanyaq qonqurikuyarqan.+