Isaïas
31 ¡Allaw yanapëkuyänampaq Egiptuman rogakoq ëwaqkuna,+
cawallukunaman, guërrapaq mëtsika carrëtakunaman
y cawallu montashqa soldädukunaman confiakoqkuna!+
Pëkunaqa manam Israelpa Limpiu Diosninman confiakuyantsu,
ni Teyta Jehoväta ashiyantsu.
2 Peru Teyta Diospis yachaq karmi imëka mana allikunawan castiganqa
y parlanqantaqa imëpis cumplinqam.
Awmi, mana allita ruraqkunata
y pëkunata yanapaqkunatapis castiganqam.+
3 Egipciukunaqa nunallam kayan,
y manam Teyta Dioswan ichikllapis igualayantsu.
Cawallunkunapis manam Teyta Diosnö espïritutsu kayan.+
Teyta Jehovä makinta pallarkuptinqa,*
yanapakoqkuna y yanapakuyta chaskeqkunapis ishkirmi ushayanqa,
y llapankunam juntu ushakäyanqa.
4 Tsënöqa pasanqa, Teyta Jehovä kënö nimashqa kaptinmi:
“Imanömi kallpasapa mallwa leonqa
mitsikoqkuna qarquyta munayaptimpis,
wanutsinqan animalpa jananchö büllar këkan
y büllata rurayaptimpis mantsantsu,
tsënömi noqa angelkunata mandaq Jehoväqa
Sion jirkata y taksha jirkata defendir pelyanäpaq urämushaq.
5 Pishqukuna wawankunata defendeqnömi
noqa angelkunata mandaq Jehoväpis Jerusalen nunakunata defendishaq.+
Awmi, defendirmi salvashaq, y perdonarmi yanapashaq”.
6 “Israel nunakuna, mana penqakushpam Teyta Diospa contran kayarqunki. Peru kananqa pëman kutiyë.+ 7 Tsë witsanqa, jutsata* rurar örupita y plätapita rurayanqëki santuykikunatam dejayanki.
8 Asiria nunakunataqa espädawanmi wanutsiyanqa,
peru manam nunakunapa espädanwantsu.
Espädawanmi ushakätsiyanqa, peru manam nunapa espädanwantsu.+
Pëkunaqa espädata mantsarmi qeshpir ëwakuyanqa, y jövinkunatanam imëkachö trabajatsir sufritsiyanqa.