Zacarïas
6 Tsëpitanam rikarqä cobripita ishkë jirkakuna chowpimpita* guërrapaq chusku carrëtakuna yarqëkämoqta. 2 Punta kaq carrëtatam puka cawallukuna sutëkäyarqan, ishkë kaq carrëtatanam yana cawallukuna sutëkäyarqan,+ 3 kima kaq carrëtatanam yuraq cawallukuna sutëkäyarqan y chusku kaq carrëtatanam muru muru y manchayoq cawallukuna sutëkäyarqan.+
4 Tsënam noqawan parlaq angelta, “teytallë, ¿imatan tsëkuna kayan?” nir tapurqä.
5 Tsënam angelqa nimarqan: “Tsëkunaqa entëru patsata gobernaq Teyta Diospa puntampita+ yarqëkämoq chusku grüpukunam*+ kayan. 6 Yana cawallukuna sutëkäyanqan carrëtaqa patsapa norti lädumpam ëwarqan,+ yuraq cawallukunanam inti o rupay jeqanan lädupa ëwayarqan,* muru muru cawallukunanam sur lädupa ëwayarqan. 7 Manchayoq cawallukunanam entëru patsapa ëwëta munarnin këkäyarqan”. Tsëmi angelqa, “entëru patsapa ëwayë” nirqan. Tsënam cawallukunaqa entëru patsapa ëwayarqan.
8 Tsëpitanam angelqa qayëkamar nimarqan: “Patsapa norti lädumpa cawallukuna ëwashqa kayaptinmi, Teyta Jehoväqa tsë läduchö kawaqkunawan cölerashqanatsu këkan”.
9 Tsëpitanam Teyta Jehoväqa yapë parlapämar kënö nimarqan: 10 “Babiloniachö apashqa këkaq israelïtakunapita Heldäi, Tobïya y Jedayä apayämunqanta chaski, y entregayäshunqëkita aparkurmi tsë nunakunawan juntu Sofonïaspa tsurin Josïaspa wayinta tsë junaq ëwayänëki. 11 Tsë entregayäshunqëki plätawan y öruwan corönata* rurëkurmi, Jehozadacpa tsurin mandakoq sacerdöti Josuëpa+ peqanman o umanman churanëki, 12 y kënömi ninëki:
‘Angelkunata mandaq Teyta Jehovämi këta nin: “Këchömi këkan Tseqllipi+ jutiyoq nuna. Pëqa këkanqan sitiuchömi tseqllinqa, y noqa Jehoväpa templütam ruranqa.+ 13 Awmi pëmi noqa Jehoväpa templüta ruranqa, y respetashqam kanqa. Pëqa gobernanampaqmi täkunanchö jamakunqa, tsëpitam sacerdöti kar+ yanapakunqa, y ishkan cargunkunatam alli cumplinqa. 14 Hëlem, Tobïya, Jedayä,+ Sofonïaspa tsurin Hen yarpashqa kayänampaqmi, tsë corönaqa* noqa Jehoväpa templüchö quedakunan. 15 Y karuchö këkaqkuna shamurmi noqa Jehoväpa templüta rurar yanapakuyanqa”. Tsëchömi musyayanki angelkunata mandaq Teyta Jehovä mandamashqa kanqanta. Tsë llapanqa pasakunqa Jehovä Diosnikikuna llapan niyäshunqëkita cäsukuyaptikim’”.