Isaïas
24 ¡Rikäyë! Teyta Jehoväqa llapankunatam kë markakunapita qarquykan y tsunyaqtam dejëkan.+
Entërutam ushakätsishqa+ y tsëchö kawaqkunata mëtsëman apayänantam permitishqa.+
2 Markachö nunakunata y sacerdötita,
patronninta y sirweqninta,
patrönanta y sirweqnin warmita,
ranteqta y rantikoqta,
prestakoqta y prestaqninta,
qellëta prestakoqta y qellëta debikoqtapis igualmi pasanqa.+
3 Teyta Jehovä nishqa kaptinmi
kë markakunapitaqa llapankuna qarqushqa kayanqa,
y imëkankunatapis jukkunam apakuyanqa.+
4 Kë patsaqa tsunyaqmi këkan* y manam imapis kantsu.+
Murukuykunapis qarwashtarmi tsakiriyan
y reqishqa nunakunapis wëta tsakeqnömi ushakäyan.
5 Nunakuna mana allita rurayaptinmi
kë patsaqa Teyta Diospa rikëninchö limpiutsu këkan.+
Nunakunaqa manam Teyta Diospa leyninkunata cäsukuyantsu,+
mandakunqankunatapis juknöpam rurayan+
y pëwan unë acuerduta rurayanqantapis manam cumpliyantsu.+
6 Tsëmi Teyta Diospa maldicionninwan kë patsaqa ushakëkan,+
y tsëchö kawaqkunapis culpayoqmi kayan.
Tsëmi kë patsachö kawaqkunaqa wallkaqlla kayan.
Awmi, nunaqa yupashqallam kayan.+
7 Üvas plantakunapis tsakirmi ushakëkäyan+ y llullu vïnupis manam kannatsu.
Unë kushishqa kaqkunapis llakishqam këkäyan.+
8 Panderëtakunata wiyar kushishqa tushoqkunapis manam kayannatsu,
fiestan fiestan pureqkunapis manam kushikur büllayannatsu,
y manam arpatapis tocayannatsu.+
9 Vïnuta upoqkunapis manam cantayanqanatsu,
y upuyanqan alcoholpapis manam gustun kannatsu.
10 Dejaskir ëwakuyanqan markaqa ushakashqam këkan,+
y llapan wayinkuna wichqaraptinmi ni pï yëkuyta puëdintsu.
11 Cällikunachömi vïnupaq waqar këkäyan
y entëru patsachö manana kushishqa kayaptinmi
ni pï kushishqanatsu këkan.+
13 Mëtsëman apashqa sirwimaqnïkunataqa këmi pasanqa:
pëkunaqa olïvus plantanta wirur*+ cosechayaptin quedaq aceitünasnö
y üvas plantata cosechayaptin pallapakuyänampaq quedaq üvasnömi kayanqa.+
14 Pëkunaqa kushikurmi fuertipa büllayanqa.
15 Tsëmi inti o rupay jeqanan läduchö nunakunapis Teyta Jehoväta alabayanqa.+
Tsënöllam islakunachö kawaqkunapis Israelpa Diosnin Jehoväpa jutinta alabayanqa.+
16 Patsa kuchunchö kënö cantayanqanmi wiyakan:
“¡Alli kaqta ruraq Teyta Dios alabashqa katsun!”.+
Noqanam kënö nï: “¡Alläpa llakikuptïmi kallpäpis kannatsu!
¡Allaw noqallä! Nunakunaqa jukkunatam engañayan y traicionayan.
Awmi, jukkunata traicionar y engañarmi këkäyan”.+
17 Kë patsachö nunakuna, imëka mana allikunapam pasayanki, uchkuman y trampamanmi ishkiyanki.+
18 Imëka mana allikunata wiyar qeshpir ëwaqkunapis uchkumanmi jeqayanqa,
y uchkupita yarqoqkunapis trampamanmi ishkiyanqa.+
Tsënöqa kanqa, ciëluchö yakupa punkunkuna kichakäriptin
y patsapa cimientun kuyuptinmi.
19 Kë patsaqa feyupa kuyurmi kichakärishqa.
Awmi, alläpa mantsakëpaqmi karkaryëkan.+
20 Kë patsaqa machashqa nuna wakman këman ishkikachaqnö,
y tsukllata fuerti vientu wakman këman kuyutseqnömi këkan.
21 Tsë witsanmi Teyta Jehoväqa, ciëluchö këkaq soldädukunata
y patsachö gobernaqkunata juzganqa,
22 y prësukunatanömi uchkuman juntanqa,
y carcelchömi wichqarätsinqa.
Tsëpitanam pëkunata juzganqa.