1 Crönicas
23 Davidqa awkinnam karqan. Y wanukunampaqna këkarmi tsurin Salomonta+ churarqan Israelchö gobernanti kanampaq. 2 Y Israelchö dirigentikunata, sacerdötikunata+ y levïtakunatam+ qayatsirqan. 3 Treinta watayoqpita witsëpam+ levïtakunata yuparqan, llapanqa treinta y öchu mil ollqukunam kayarqan. 4 Pëkunapitaqa veinticuatru mil ollqukunam Teyta Jehoväpa templunchö rurayanqankunata dirigiyaq, y seis milnam oficialkuna y juezkuna+ kayarqan. 5 Cuatru milmi punkuchö trabajayaq+ y cuatru milnam instrumentukunata tocarnin Jehovä Diosta alabayaq,+ tsëmi David nirqan: “Noqam tsë instrumentukunata rurarqö Teyta Diosta alabanapaq”.
6 Tsëpitanam Davidqa yanapakuyänampaq Levïpa kastankunata* rakirqan.+ Cada grüpum Guersonpa, Cohatpa y Merarïpa+ jutinchö karqan. 7 Guersonpa kastankunachömi këkäyarqan Ladanwan Simeï. 8 Ladanpa kima tsurinkunam kayarqan dirigenti Jehiel, Zetam y Joel.+ 9 Simeïpa kima tsurinkunam kayarqan Selomot, Haziel y Haran. Pëkunam Ladanpa unë kastankunachö dirigentikuna kayarqan. 10 Simeïpa tsurinkunam kayarqan Jähat, Zinä, Jeus y Berïas. Pëkunam Simeïpa chusku tsurinkuna kayarqan. 11 Jähatmi dirigenti karqan, y yanapaqninnam Zizä karqan. Jeuspawan Berïaspaqa manam atskatsu tsurinkuna karqan, tsëmi juk familiatanölla yupayarqan y tsë rurëllata rurayänampaqmi churayarqan.
12 Cohatpa chusku tsurinkunam kayarqan Amram, Izhar,+ Hebron y Uziel.+ 13 Amrampa tsurinkunam Aaronwan+ Moises+ kayarqan. Aarontawan tsurinkunatam churayarqan Alläpa Sagrädu Cuartuchö yanapakuyänampaq,+ Jehovä Diospaq pishtashqa animalkunata rupatsiyänampaq y Diospa jutinchö bendicionta imëpis mañakuyänampaq.+ 14 Y Diospa sirweqnin Moisespa tsurinkunataqa, Levïpa kastankunatawan juntum yupayarqan. 15 Moisespa tsurinkunam Guersomwan+ Eliezer+ kayarqan. 16 Guersompa kastankunachöqa Sebuelmi+ dirigenti karqan. 17 Eliezerpa tsurin Rehabïaspis+ dirigentim karqan. Eliezerpaqa pëllam tsurin karqan, peru Rehabïaspaqa mëtsikam tsurinkuna kayarqan. 18 Izharpa+ kastankunachönam Selomit+ dirigenti karqan. 19 Hebronpa mayor tsurinmi karqan dirigenti Jerïas, pëpa qepanmannam yurikurqan Amarïas, qepanmannam Jahaziel y qepanmannam Jecameam.+ 20 Uzielpa+ tsurinnam karqan dirigenti Miquëas, y pëpa qepanmannam yurikurqan Isïas.
21 Merarïpa tsurinkunam Mahlïwan Musï+ kayarqan. Mahlïpa tsurinkunam Eleazarwan Quis kayarqan. 22 Eleazarpa tsurinkunaqa warmillam kayarqan y manam ollquqa karqantsu. Tsëmi pëkunaqa tiyun Quispa tsurinkunawan casakuyarqan. 23 Musïpa kiman tsurinkunam kayarqan Mahlï, Ëder y Jeremot.
24 Pëkunam kayarqan cada familiapa y cada dirigentipa jutipa jutipa listachö apuntarëkaq Levïpa kastankuna. Pëkunam veinti watayoqpita qallëkur Jehovä Diospa templunchö trabajayaq. 25 Davidmi kënö nishqa karqan: “Israelpa Diosnin Jehovämi sirweqninkunata yanapamarquntsik tranquïlu kawakunapaq.+ Pëmi kananqa Jerusalen markachö imëyaqpis täkunqa.*+ 26 Y levïtakunaqa manam Diospa carpa* wayinta y tsëchö utilizäyanqan cösaskunatapis wakman këman puritsiyanqanatsu”.+ 27 David mandakunqannömi veinti watayoqpita witsëpa levïtakunata yupayarqan. 28 Pëkunam Aaronpa kastankunata+ yanapayaq Jehovä Diospa templumpa patiunkunachö+ y mikuyänan cuartukunachö rurapakurnin y templuchö utilizäyanqan sagrädu cösaskunata yakuwan awirnin.* Y imëkapis rurëpaq kaqkunachömi yanapakuyaq. 29 Tsënöllam yanapakuyaq Teyta Diospaq* churayänampaq+ tantakunata rurarnin, tsaki mikuyta rupatsiyänampaq alli aqashqa harinata alistarnin, levadürannaq gallëtakunata+ rurarnin, sartinchö tantakunata rurarnin, masakunata rurarnin+ y imëkakunata pesarnin y medirnin. 30 Cada junaqmi patsa waraptin+ y patsa tardiyaptin Jehovä Diosta agradecikuyänampaq y alabayänampaq templuman ëwayaq.+ 31 Tsënöllam säbadu junaqchö,+ llullu killachö+ y fiesta junaqkunapis+ Jehovä Diospaq animalkunata pishtëkur rupatsiyaptimpis yanapakuyaq. Diospa leynin ninqannömi Jehoväpa puntanchö yanapakuyaq. 32 Tsënöllam Diospa carpa* wayinchö y sagrädu sitiuchö yanapakuyaq. Pëkunam Jehoväpa templunchö imëkakunata rurarnin Aaronpa kastankunata yanapayaq.