Isaïas
22 Revelacionta Chaskiyänan Pampata* ima pasanampaq kaqmi këchö qellqarëkan:+
¿Imatan pasayäshurqunki? ¿Imanirtan wayikikuna jananchö këkäyanki?
2 Qamkunaqa pantashqa y büllata rurarmi këkäyarqëki,
y kikikikunamanmi alläpa confiakuyarqëki.
Tsënö kaptimpis, qamkunapita wanoq o wañoq nunakunaqa,
manam espädawantsu ni guërrachötsu wanuyanqa.+
3 Sufritsiyäshoqniki dirigeqkunapis qeshpirmi ëwakuyashqa.+
Flëchawan mana chätsishllapam llapankunata prësuyashqa.
Karuyaq qeshpir ëwashqa kayaptimpis,
llapantam prësu apakuyashqa.+
4 Tsëmi nirqä:
5 Tsë junaqqa, Llapanta Gobernaq
angelkunata mandaq Teyta Jehovä permitiptinmi,
Revelacionta Chaskiyänan Pampachö pantashqa puriyan,
vencishqa kayan y manam imanö këtapis puëdiyantsu.+
Murällakunatam ushakätsiyan+ y jirkamanmi fuertipa qayakuyan.
6 Elampita+ nunakunam, guërrapaq carrëtankunachö
y cawallunkuna montashqa, flëcha churakuyänanta aptashqa shamuykäyan,
y Quirpita+ nunakunanam escüdunkunata alistëkäyan.
7 Mas alli pampëkikunachöpis
guërrapaq carrëtakunallanam atska kayanqa, y punkuykikunapa frentinmanmi
cawallunkuna montashqa soldädukuna churakäyanqa.
8 Y Judä nunakunata tsapaq murällapis ushakätsishqam kanqa.
Tsë junaqqa, Monti Wayichö këkaq armakunamanmi confiakuyanki.+ 9 David Marka niyanqampa murällankunatapis uchkur ushashqatam rikäyanki,+ y ura kaq jatun pözupitam yakutapis chaqayanki.+ 10 Jerusalenchö wayikunata rikapakurmi markapa murällanta altsayänampaq wakin wayikunata juchutsiyanqa.* 11 Y unë kaq jatun pözuchö yakuta juntayänampaqmi, tsë murällakuna chowpinchö* pözuta rurayanqa. Tsënö kaptimpis, manam tsëkuna pasakunanta permiteq Kamakoq Dios Yayaman confiakuyanqatsu ni unëpitana tsëkunata patsätseq Diosman pensayanqatsu.
12 Tsë junaqmi Llapanta Gobernaq angelkunata mandaq Teyta Jehoväqa,
waqayänampaq, llakikuyänampaq,+ aqtsankunata pasëpa* rutukuyänampaq
y chukru tëlata janankunaman churakuyänampaq nunakunata mandanqa.
13 Peru Teyta Diosta cäsukuyänëkipa rantinmi
qamkunaqa fiestata rurar, kushikur, wäkata y üshata pishtar,
ëtsata mikur y vïnuta upur këkäyanki.+
Y kënömi niyanki: ‘Mikushun y upushun warë warätinmi wanukushun’”.+
14 Tsëpitanam angelkunata mandaq Teyta Jehoväqa, suëñuynïchö revelamar kënö nimarqan: “‘Kë jutsata* rurayanqëkipitaqa manam wanukuyanqëki junaqyaqpis perdonayashqëkitsu’,+ ninmi Llapanta Gobernaq angelkunata mandaq Teyta Jehovä”.
15 Llapanta Gobernaq angelkunata mandaq Teyta Jehoväqa, kënöpis nimashqam: “Gobernaqpa palaciunta* rikaq Sebnä+ jutiyoq nunaman ëwar këta nï: 16 ‘¿Imëkitaq këchö o pïnikitaq këchö, këman shamuykur sepultürata ruranëkipaq?’. Pëqa altu sitiuchömi sepultürata uchkuykan y qaqachömi sepultürata rurëkan. 17 ‘¡Rikë! Teyta Jehoväqa mana llakipashpam* patsaman jitarkushunki, y tsëpitam llapan kallpanwan pallarkushunki.* 18 Pelötatanö wankurkushurnikim mëtsikan nacionman jitarkushunki. Tsëchömi guërrapaq shumaq cärruykikunapis ushakäyanqa, y kikikipis wanunki. Tsënömi patronnikipa wayinchö kawaqkunata penqakuychö dejanki. 19 Mandakoq kanqëkipitam jipishqëki, y carguykipitam qarqushqëki.
20 Tsë witsanmi sirwimaqnï Eliaquimta+ qayatsishaq, pëqa Hilquïaspa tsurinmi. 21 Pëtam largu röpëkita vistitsishaq y wachukuykiwanmi tseqllanta watashaq,+ y qampa autoridänikitam* pëpa makinman churashaq. Jerusalenpita y Judäpita nunakunapaqmi papänin cuenta kanqa. 22 Davidpa wayimpa llävintam+ pëpa cargunman churashaq. Pë kichanqantaqa manam ni pï wichqanqatsu, y pë wichqanqantaqa manam ni pï kichanqatsu. 23 Pëtaqa clävutanömi chukru perqaman clavashaq, y chipapäkoq gobernar täkunanömi papänimpa wayinchö kaqkunapaq kanqa. 24 Y papänimpa wayinchö kaqkunapa, kastankunapa y tsëpita yureq kastankunapa väleq cösasninkunatam tsëman warkuyanqa. Awmi, tsëmanmi taksha y jatun tazonkunata y jatusaq järrakunata warkuyanqa.
25 Angelkunata mandaq Teyta Jehovämi nin: “Tsë junaqqa noqa Jehovä mandakushqa kaptïmi, chukru perqachö clavashqa clävuta roquriyanqa,+ y roquriyaptin jeqarkuptinmi tsëchö warkurëkaqkunapis patsaman jeqar pasëpa* ushakäyanqa”’”.