2 Crönicas
12 Mas puëdeq tikrarmi+ Rehoboamqa Jehovä Diospa Leyninta+ cäsukurqannatsu, tsënöllam israelïtakunapis cäsukuyarqannatsu. 2 Jehovä Diosta mana cäsukuyanqampitam, pitsqa watapa Rehoboam gobernëkaptin Egiptuchö gobernaq Sisac+ ëwarqan Jerusalen markata atacanampaq. 3 Sisacqa mil doscientus carrëtankunawan y cawallunkuna montashqa sesenta mil soldädunkunawanmi ëwarqan. Y pëkunawanmi mëtsikaq libiu soldädukuna, sukiyim soldädukuna y etïopi soldädukuna ëwayarqan.+ 4 Judächö alli murallashqa markakunatam atacarnin duëñutukurqan y tsëpitanam Jerusalen markaman charqan.
5 Peru Rehoboamwan Judächö dirigentikunaqa Sisacta mantsarmi Jerusalen markachö juntakäyarqan. Tsëman ëwëkurmi Diospa willakoqnin Semäya+ kënö nirqan: “Jehovä Diosmi kënö niyäshunki: ‘Qamkunaqa manam cäsuyamarqunkitsu, tsëmi Sisac atacayäshuptiki defendiyashqëkitsu’”.+ 6 Tsënö niptinmi Israelchö dirigentikuna y gobernantipis, “Jehovä Diosqa alli ruraqmi” nir llakishqa këkäyarqan.+ 7 Tsënö llakikuyanqantam Jehovä Dios rikarqan. Tsëmi Jehovä Diosqa Semäyata kënö nirqan: “Mana allita rurayanqampitam llakishqa këkäyan, tsëmi ushakätsiyänanta dejashaqtsu.+ Cölerashqa këkarpis Jerusalen markata Sisac ushakätsinantaqa manam dejashaqtsu. 8 Peru sirweqninkunam kayanqa, tsëmi musyayanqa juk nacionkunapa gobernantinkunata sirwiqa, noqata sirwiyämanqampita jukläya kanqanta”.
9 Egiptuchö mandakoq Sisacqa Jerusalen markatam atacarqan. Y Teyta Jehoväpa templumpita y palaciu wayipitam llapan väleq cösaskunata apakurqan,+ hasta Salomon ruratsinqan örupita escüdukunatapis.+ 10 Tsënam Rehoboamqa apakuyanqan escüdukunapa rantin cobrillapitana escüdukunata ruratsirqan. Y palaciu punkuchö cuidakoq soldädukunapa mandaqninkunatam cuidayänampaq mandarqan. 11 Jehovä Diospa templunman gobernanti Rehoboam ëwaptinmi soldädukunaqa escüdunkunawan ëwayaq, y palaciuman kutiptinnam churaränan cuartuman escüdukunata kutitsiyaq. 12 Gobernanti arrepentikuptinmi Jehovä Diospa cöleranqa pasarirqan+ y manam ushakätsiyänanta permitirqantsu.+ Judächö allita rurayanqankunatam cuentachö katsirqan.+
13 Gobernanti Rehoboamqa Jerusalen markachömi mas puëdeq tikrarqan. Pëqa cuarenta y ünu watayoq këkarmi mandakur qallëkurqan y diecisiëti watapam Jerusalen markachö mandakurqan. Tsë markatam Jehovä Diosqa akrarqan jutimpa reqishqa kanampaq. Rehoboampa mamäninqa Naamä jutiyoq ammonïta warmim karqan.+ 14 Rehoboamqa manam llapan shonqunwantsu Jehovä Diosta kuyarqan, tsëmi mana allikunata rurarqan.+
15 Rehoboam llapan ruranqanqa, qallanampita ushananyaqmi unë familiankunapa jutinkuna qellqaranqan libruchö qellqarëkan. Tsëtaqa qellqayarqan Diospa willakoqnin Semäya+ y pasakunqankunata rikaq Idömi.+ Rehoboamwan Jeroboanqa+ imëpis guërrachömi kayarqan. 16 Rehoboam wanuriptinnam, unë kastankuna pamparäyanqan David Markachö pampayarqan.+ Tsëpitanam Abïas+ jutiyoq tsurin gobernar qallëkurqan.