2 Crönicas
11 Jerusalen markaman Rehoboam+ chëkurnam, pëpita rakikashqa israelïtakunaman pelyaq ëwayänampaq Judäpa kastankunapita y Benjaminpa+ kastankunapita cientu ochenta mil valienti soldädukunata qayatsirqan. Tsëtaqa rurarqan llapan israelïtakuna mandädunchö kayänanta munarmi. 2 Tsënam Jehovä Diosqa willakoqnin Semäyata+ kënö nirqan: 3 “Judä kastapa mandaqnin Salomonpa tsurin Rehoboamta, Judäpa kastankunata, Benjaminpa kastankunata y wakinkunatapis kënö nï: 4 ‘Këtam Jehovä Dios mandakushqa: “Noqam kë pasananta permitirqö. Ama israelïta mayikikunawan pelyaq ëwayëtsu, tsëpa rantinqa wayikikunata kutikuyë”’”.+ Semäya tsënö niptinmi, Jehovä Dios mandakunqanta cäsukur llapankuna kutikuyarqan.
5 Jerusalen markachömi Rehoboam kawakurqan y alli següru kanampaqmi Judächö markakunata seguratsirqan. 6 Tsë markakunaqa karqan Belen,+ Etam, Tecöa,+ 7 Bet-Zur, Socö,+ Adulam,+ 8 Gat,+ Maresä, Zif,+ 9 Adoräim, Lakis,+ Azecä,+ 10 Zorä, Ayalon+ y Hebronmi.+ Tsë markakunatam Judächö y Benjaminchö alli seguratsirqan. 11 Tsënöllam alli murallashqa markakunatapis mas seguraratsir soldädukunapa mandaqninkunata churarqan. Y pëkunapaqmi mikuyta, aceitita y vïnuta apatseq. 12 Tsë markakunachö alli defendikuyänampaqmi jatusaq escüdukunata y lanzakunata apatsirqan. Judächö y Benjaminchö markakunaqa Rehoboampa poderninchömi karqan.
13 Y entëru Israelchö këkaq sacerdötikuna y levïtakunaqa markankunata dejarirmi Rehoboamta yanapayarqan. 14 Levïtakunaqa qewayoq chakrankunata y imëkankunata+ dejarirmi Judäta y Jerusalenta ëwakuyarqan. Tsënöqa ëwakuyarqan, Teyta Jehoväpa sacerdötin këkäyaptimpis, Jeroboanwan tsurinkuna sacerdöti këninkunapita qarqushqa kayaptinmi.+ 15 Jeroboanqa, juk nunakunatanam churarqan sagrädu altu sitiukunachö+ sacerdöti kayänampaq, pëkunataqa churarqan cabra niraq demoniukunata+ y ruratsinqan becërrukunata+ nunakunata adoratsiyänampaqmi. 16 Peru entëru Israelchö Jehovä Diosta cäsukoq israelïtakunaqa, levïtakuna y sacerdötikuna rurayanqannöllam unë kastankunapa Diosnin Jehoväta adorayänampaq Jerusalenta ëwakuyarqan.+ 17 Salomonpa tsurin Rehoboamta kima watapa yanapayaptinmi Judä nacionqa mas puëdeq tikrarqan. Israelïtakunaqa kima watapam Davidwan Salomon rurayanqannölla rurayarqan.
18 Tsëpitanam Rehoboamqa Mahalat jutiyoq warmiwan casakurqan. Mahalatpa papäninqa Davidpa tsurin Jerimotmi karqan y mamäninnam Eliabpa tsurin Abihäil karqan. Eliabqa Jesëpa+ tsurinmi karqan. 19 Mahalat warminchömi Rehoboampa tsurinkuna kayarqan Jeus, Semarïas y Zaham. 20 Tsëpitanam Rehoboamqa Absalonpa+ willkan Maacä jutiyoq warmiwan casakurqan. Tsë warmichömi tsurinkuna Abïas,+ Atäi, Zizä y Selomit yuriyarqan. 21 Rehoboampaqa dieciöchum legïtimu warminkuna karqan y sirweqnin warmikunatapis*+ sesentatam wätarqan. Tsëmi ollqu tsurinkunaqa veintiöchu karqan y warmi tsurinkunanam sesenta karqan. Peru Rehoboamqa Absalonpa willkan Maacätam mas kuyarqan. 22 Rehoboamqa warmin Maacächö yurikoq tsurin Abïastam churarqan wawqinkunapa mandaqnin kanampaq. Tsënöqa churarqan gobernanti kananta munarmi. 23 Y wakin tsurinkunataqa alli pensëkurmi Judächö y Benjaminchö alli murallashqa markakunaman täkuyänampaq* mandarqan.+ Y tsëllamannam atska mikuyta apatsirqan y warminkunapis mëtsikatam ashipurqan.