2 Crönicas
13 Jeroboan+ Israelchö dieciöchu watapa gobernëkaptinmi, Abïasqa gobernar qallëkurqan. 2 Kima watapam Jerusalen markachö mandakurqan. Mamäninqa Guibeä+ markapita Urielpa tsurin Micaya+ jutiyoq warmim karqan. Abïaswan Jeroboanqa+ guërrachömi kayarqan.
3 Tsëpitanam Abïasqa Jeroboanwan pelyanampaq cuatrocientus mil valienti y alli pelyëta yachaq soldädunkunawan ëwarqan.+ Jeroboanpaqa alli valienti y alli pelyëta yachaq ochocientus mil soldädunkunam karqan. 4 Tsënam Abïasqa Efrainchö këkaq Zemaräim jirkaman witsarkur kënö qayakurqan: “¡Jeroboan y llapëki israelïtakuna wiyayämë! 5 ¿Manaku musyayanki Israelpa Diosnin Jehoväqa, Davidwan y pëpa kastankunawan+ mana ushakaq acuerduta* ruranqanta?+ Tsë acuerduwanmi Israelchö imëyaqpis gobernanti tikrayarqan.+ 6 Tsënö këkaptimpis, Nebatpa tsurin Jeroboanmi+ sirweqnin këkar, Davidpa tsurin Salomonpa contran churakarqan.+ 7 Pëtam mana trabajaq mana alli nunakuna yanapayarqan. Tsëmi Salomonpa tsurin Rehoboamqa jövinllaraq karnin pëkunata vencita puëdirqantsu.
8 Jehovä Diosqa Davidpa tsurinkunatam gobernayänampaq yanapëkan. ¿Tsënö këkaptinku qamkunaqa atskaq kayanqëkiman confiakur venciyänëkipaq kaqta pensayanki? ¿Adorayänëkipaq Jeroboan ruratsinqan örupita becërrumanku confiakuyanki?+ 9 Qamkunaqa Aaronpa kastankunatam y levïtakunatam, sacerdöti kayänampaq Jehovä Dios churashqa këkaptin+ qarquyarqunki. Tsënö qarquskirmi, juk nacion nunakuna rurayanqannö juk nunakunata sacerdöti kayänampaq churayarqunki.+ Pï nunapis sacerdöti këta munar, juk mallwa töruta y qanchis carnëruta aparkur shamuptinqa chaskipäyaqmi kayanki. Tsënöpam santukunapa sacerdötin tikraq, y tsë santukunaqa manam diostsu kayan. 10 Peru noqakunapaqa Jehovämi Diosnïkuna+ y pëllatam sirwikäyä. Aaronpa kastan sacerdötikunam Jehovä Diosta sirwikäyan y yanapaqninkunapis levïtakunam kayan. 11 Patsa waraptin y patsa tardiyaptinmi qarëkunata+ y pukutaq o mushkoq inciensukunata+ Jehovä Diospaq rupatsiyan. Y alli kaq örupita rurashqa mësachömi tantakunapis+ churarëkan. Tsënöllam candelabrukunachö+ këkaq chiwchikunatapis+ cada tardi tsaritsiyan. Noqakunaqa Jehovä Dios ninqannömi rurëkäyä, peru qamkunaqa qonqëkuyarqunkim. 12 ¡Rikäyë! Noqakunataqa Teyta Diosmi sacerdötinkunawan yanapëkäyäman. Pëkunam trompëtata tocayämunqa pelyar qallanapaq. Israel nunakuna, unë kastëkikunapa Diosnin Jehoväwan ama pelyayëtsu, pëtaqa manam venciyankitsu”.+
13 Tsënam Jeroboanqa, wakin soldädukunata mandarqan Judä soldädukunata qepampa atacayänampaq y wakinwannam puntampa atacayarqan. 14 Tsënam Judä soldädukunaqa rikäriyarqan qepampa y puntampa ataquëkäyanqanta. Tsëmi sacerdötikuna trompëtata fuertipa tocayanqanyaq, Jehovä Diosman mañakuyarqan.+ 15 Tsëpitanam Judä soldädukunaqa pelyar qallëkuyänampaq fuertipa qapariyarqan. Tsë höram Teyta Diosqa Jeroboanta y Israel soldädukunata venciyänampaq yanaparqan. 16 Tsëmi israelïtakunaqa, Judä soldädukunapita qeshpir ëwakuyarqan, Teyta Dios yanapaptinmi mëtsikaqta wanutsiyarqan o wañutsiyarqan. 17 Abïaswan soldädunkunaqa, allin kaq israelïta soldädukunatam quinientus milta wanutsiyarqan. 18 Pëkunaqa unë kastankunapa Diosnin Jehoväman confiakurmi venciyarqan. Y israelïta soldädukunaqa penqakushqam qeshpir ëwakuyarqan.+ 19 Abïasqa, Jeroboanta qatipar ëwarmi kë markakunata duëñun tikrarqan: Betel+ markata y ichik markankunata, Jesanä markata y ichik markankunata y Efren+ markata y ichik markankunata. 20 Abïas kawanqan witsanqa, Jeroboanqa manam puntatanönatsu puëdeq karqan. Y Jeroboanqa Jehovä Dios castigaptinmi wanukurqan.+
21 Abïasqa mas puëdeqmi tikrarqan. Abïasqa catorci warmiyoqmi karqan, y ollqu tsurinkunam veintidos kayarqan y warmi tsurinkunam dieciseis kayarqan.+ 22 Abïas ruranqankunapita y parlanqankunapitaqa Diospa willakoqnin Idö qellqanqanchömi qellqarëkan.+